باس پروكۋراتۋرانىڭ مىندەتتەرىنىڭ ءبىرى زاڭدىلىقتى قامتاماسىز ەتۋ جانە ادىلەتسىز سوت اكتىلەرىنە كاسساتسيالىق نارازىلىق كەلتىرۋ ارقىلى ازاماتتاردىڭ كونستيتۋتسيالىق قۇقىقتارىن قورعاۋ بولىپ تابىلادى.
جىل باسىنان بەرى باس پروكۋروردىڭ كاسساتسيالىق نارازىلىعى بويىنشا جوعارعى سوت 17 ادامدى اقتادى. بۇل رەتتە, وتكەن جىلدارداعى قىلمىستىق ىستەر مۇقيات تەكسەرىلدى. زاڭ سوتتالعان ادامنىڭ جاعدايىن جاقسارتۋ تۋرالى ماسەلە قويىلعان كەزدە ۇكىمدەردى قايتا قاراۋدىڭ مەرزىمدەرىن شەكتەمەيتىنىن اتاپ وتكەن ءجون.
ماسەلەن, بيىل 16 تامىزدا جوعارعى سوت پروكۋروردىڭ كاسساتسيالىق نارازىلىعى بويىنشا 2012 جىلى ءجاسوسپىرىم كەزىندە قىلمىستىق كودەكستىڭ 328-بابى بويىنشا قىلمىس جاساۋعا قاتىستى بيلىك وكىلى اتاعىن ءوز ەركىمەن بەرگەنى ءۇشىن سوتتالعان ەكى ازاماتقا قاتىستى قىلمىستىق قۋدالاۋدى توقتاتتى. بۇل ارەكەت ءۇشىن قىلمىستىق جاۋاپتىلىق 16 جاستان باستالادى. قىلمىس جاسالعان كەزدە سوتتالعان ازامات 15 جاستا بولعان. بۇدان بولەك, ونىڭ كىناسى تولىق دالەلدەنبەگەن.
تاعى ءبىر مىسال, قىلمىستىق قۇقىق بۇزۋشىلىقتىڭ ەلەۋسىزدىگى 2019 جىلى 6 مىڭ تەڭگەگە ازىق-ت ۇلىك ۇرلاعانى ءۇشىن كىنالى دەپ تانىلعان كەلىنشەككە قاتىستى سوت اكتىسىنىڭ كۇشىن جويۋعا نەگىز بولدى. جالعىزباستى ايەل ەكى بالاسىن ءبىر ءوزى تاربيەلەپ وتىرعانى بەلگىلى بولدى. بالالارىنىڭ كىشىسى ءبىر جاسقا دا تولماعان, شاراسىزدىقتان ۇرلىق جاساعان. شىعىن ۇستالعاننان كەيىن بىردەن وتەلدى. اۋىر ماتەريالدىق جاعداي, بولماشى زالال جانە ونى تەز ارادا وتەۋ فاكتىسى ونىڭ ءىس-ارەكەتىنىڭ قوعامعا قاۋىپ توندىرمەيتىنىن ايعاقتادى. سول سەبەپتى دە جوعارعى سوت قىلمىستىق قۋدالاۋدى توقتاتتى.
پروتسەسكە قاتىسۋشىلاردىڭ شاعىمدارى, وبلىستار پروكۋرورلارىنىڭ ءوتىنىش حاتتارى جانە ءوز باستاماسى بويىنشا قىلمىستىق ىستەر ماتەريالدارىن تەكسەرۋ ءالى دە جالعاسۋدا.