جازىم دەگەن اياق استىندا. يسپانيادان قازاقستاننىڭ كورىكتى جەرلەرىن تاماشالاۋعا كەلە جاتقان فەرناندو بودەلون ۇشاقتا ينسۋلت الىپ, تراپقا دا اياعى تيمەي, اۋرۋحانادان ءبىر-اق شىقتى.
44 جاستاعى يسپاندىق بۇعان دەيىن دەنساۋلىعىنا شاعىمدانىپ كورمەگەن ادام ەكەن. قازاقستاننىڭ تانىمال تۋريستىك باعىتتارى بويىنشا ساياحاتتاپ كورۋ ءۇشىن مادريد – الماتى باعىتىندا ۇشىپ كەلە جاتىپ, قونۋعا بىرنەشە ساعات قالعاندا ءوزىن ناشار سەزىنە باستايدى.
«ۇشاقتا موينىم اۋىرىپ, كۇرت ءتۇرىم بوزارىپ كەتتى, قايتا-قايتا قۇستىم. سودان كەيىن سول قولىم مەن سول اياقتا السىزدىك پايدا بولدى. الماتى اۋەجايىنا قونعان سوڭ مەنى جەدەل جاردەم دارىگەرلەرى كۇتىپ الدى», دەپ ەسكە الادى سول كۇندى فەرناندو بودەلون.
تۋريست №4 قالالىق اۋرۋحانانىڭ قابىلداۋ بولىمىنە كەلگەن كەزدە دارىگەرلەر ونىڭ جاعدايىڭ اۋىر دەپ باعالاعان. اۋرۋحانا نەيروحيرۋرگتەرى شەتەلدىك قوناقتىڭ ءومىرى ءۇشىن 27 كۇن بويى كۇرەستى.
«ميعا جاسالعان كت وڭ گەميسفەرانىڭ قىرتىس استى يادرولارى ايماعىندا قارىنشالىق جۇيەنىڭ بۇزىلۋىن, وعان قوسا گەمورراگيالىق ءتيپتى مي قان اينالىمىنىڭ جەدەل بۇزىلۋىن, ميدىڭ ءىسىنۋىن كورسەتتى. ناۋقاس شۇعىل جانساقتاۋ بولىمىنە جاتقىزىلدى», دەيدى №4 قالالىق كلينيكالىق اۋرۋحانانىڭ قابىلداۋ ءبولىمىنىڭ مەڭگەرۋشىسى ماگادين حايروەۆ.
ءتۋريستىڭ ءومىرىن ساقتاپ قالۋ ءۇشىن وعان جەدەل تۇردە وپەراتسيا جاساۋ قاجەت بولىپ, ونى نەيروحيرۋرگيا ءبولىمىنىڭ مەڭگەرۋشىسى نۇرجان اجىبەكوۆ, اسسيستەنت ەلدار بەسەنوۆ پەن انەستەزيولوگ مارجان مۋسينا قولعا الدى. وپەراتسيا 60 مينۋتقا سوزىلىپ, ءساتتى اياقتالدى. دارىگەرلەر ميدىڭ قان اينالىمىن قالپىنا كەلتىرە الدى.
ء«بىز ناۋقاسقا مي ىشىلىك گەماتوما درەناجىن جاسادىق. وپەراتسيادان كەيىنگى كەزەڭ تۇراقتى تۇردە اۋىر ءوتىپ, كەيىننەن وڭالا باستادى. دارىگەرلەردىڭ باقىلاۋىنان كەيىن فەرناندونىڭ جاعدايى جاقسارىپ, اۋرۋحانادان شىعارىلدى», دەيدى ەمدەۋشى دارىگەر, №4 قالالىق كلينيكالىق اۋرۋحانانىڭ نەيروحيرۋرگى الدوڭعار ايساۋىتوۆ.
ال ف.بودەلون اۋرۋحانادان شىققاننان كەيىن بىردەن يسپانياعا ورالىپتى, قازىر ونىڭ وڭالتۋ كۋرسىنان ءوتىپ جاتقان جايى بار. بولاشاقتا تۋريست ورىندالماعان ساپارىن جالعاستىرىپ, ەكىنشى تۋعان جەرى – قازاقستانعا قايتا ورالۋدى جوسپارلاپ وتىرعان كورىنەدى.
«مەن بۇل كلينيكانى, دارىگەرلەرى مەن قىزمەتكەرلەرىن قاشان دا ىستىق ىلتيپاتپەن ەسكە الاتىن بولامىن. ماعان ومىرگە ەكىنشى رەت ورالۋعا مۇمكىندىك بەرگەندەرىڭىز ءۇشىن راقمەت!», دەيدى ف.بودەلون.
الماتى