ساعىندىق ءجۇنىس ۇلى كەنجەباەۆ – بالالىعى قالىڭ ەلدىڭ قابىرعاسى جاپپاي اشارشىلىق پەن ساياسي قۋعىن-سۇرگىن زوبالاڭىنان قايىسىپ, جىگىت شاعى ۇلى وتان سوعىسىنىڭ تۇسىنا كەلىپ, الاپات قىرعىن, وت پەن وقتىڭ ورتاسىنان امان وتكەن قايسار ۇرپاقتىڭ وكىلى.
ولاردىڭ جاستىق داۋرەنى ءتورت جىلعا سوزىلعان سوعىس اۋانىنا تۋرا كەلدى. تالايى وتان قورعاۋ جولىندا قىرشىنىنان قىرقىلىپ, مايدان دالاسىندا جەر قۇشتى. سۇراپىل سوعىستان امان قالعانى باقىتىنا تاۋبە دەپ جەڭىمپازدار قاتارىندا ەلگە ورالدى. بەيبىت ومىرگە ەرەكشە قۇشتارلىقپەن كەلىپ, ەل تۇرمىسىنىڭ وڭالۋىنا بىلەك سىبانا كىرىسكەندەردىڭ الدىڭعى شەبىندە ساعىندىق اعامىز ءجۇردى. ساعىندىق ءجۇنىس ۇلى ءوز زامانىندا وقۋ, بىلىمگە, جاسامپازدىققا تالپىنىپ, قاتارلاستارىمەن بىرگە 1942 جىلى مايدانعا اتتانىپ, سوڭىنا دەيىن بولعان, سوعىستان كەيىن كۇيزەلگەن حالىق شارۋاشىلىعىن قالپىنا كەلتىرىپ, بەيبىت ءومىردى تۇراقتاندىرۋعا ۇزاق جىلدار قاجىماي, تالماي ەڭبەك ەتىپ, بۇگىن ابىز اتا دارەجەسىنە كوتەرىلگەن سيرەك ارداگەر اعالارىمىزدىڭ ءبىرى. ساعىندىق اعانىڭ ءومىرى – ەلىمىزدىڭ باسىنان كەشكەن قايشىلىعى مول زامانمەن استاسىپ جاتقان بايانى ءالى تولىق جاريا بولا قويماعان قىرى مەن سىرى تەرەڭ ءومىردىڭ ايناسىنداي. تاريحتىڭ باسقا كەزەڭدەرىن تىزبەلەمەي-اق, ءبىر عانا ەكىنشى دۇنيەجۇزىلىك سوعىس جىلدارى مەن سوعىستان كەيىنگى كۇيزەلگەن حالىق شارۋاشىلىعىن قالپىنا كەلتىرىپ, جاڭا ءوندىرىس سالالارىن دامىتۋ داۋىرىنە كوز جۇگىرتسەك تە جەتكىلىكتى. سوعىستان كەيىنگى جىلداردا ماسكەۋ مەملەكەتتىك ۋنيۆەرسيتەتىنىڭ فيلوسوفيا فاكۋلتەتىن, كەيىن كوكپ ورتالىق كوميتەتىنىڭ جانىنداعى قوعامدىق عىلىمدار اكادەمياسىن ءبىتىرىپ, 1946-1960 جىلدار ارالىعىندا ساكەڭنىڭ ءومىرى جاستار تاربيەسىمەن, كومسومولداعى باسشىلىق قىزمەتىمەن تىكەلەي بايلانىستى بولدى. ول كەزدە جاستارعا جەتەكشىلىك ەتكەن كومسومول ۇيىمى جاستار ومىرىندە شەشۋشى ءرول اتقاراتىن. جاستار كومسومول ارقىلى قوعامدىق ەڭبەك تاربيەسىن كورىپ, ءومىر مەكتەبىنەن وتەتىن.
سوعىس وتىنان امان ورالعان جاس وفيتسەر ساعىندىق ءجۇنىس ۇلى كومسومولدىڭ باستاۋىش ۇيىمىندا دا, قارقارالى اۋداندىق, قاراعاندى وبلىستىق كومسومول كوميتەتتەرىنىڭ ءبىرىنشى حاتشىسى قىزمەتتەرىن ابىرويمەن اتقارىپ, 1951 جىلدان 1960 جىلدىڭ ساۋىرىنە دەيىن ون جىلعا جۋىق قازاقستان كومسومولى ورتالىق كوميتەتىنىڭ يدەولوگيا جونىندەگى حاتشىسى, ەكىنشى جانە ءبىرىنشى حاتشىسى دارەجەسىنە كوتەرىلىپ, جاستىق جىگەر جالىنمەن, تىنىمسىز ىزدەنىسپەن ەڭبەك ەتتى. كومسومول جۇمىسى حالىق شارۋاشىلىعىن قالپىنا كەلتىرۋمەن بايلانىستى بولىپ, ەل اراسىندا جاستاردىڭ ەڭبەكتەگى, قوعامداعى بەلسەندىلىگىن ۇيىمداستىرۋ ارقىلى ولاردىڭ حالىقتىڭ تۇرمىسىن كوتەرۋگە مەيلىنشە ىقپالدىلىعىن ارتتىرۋعا ايرىقشا كۇش سالىندى. ساكەڭ جاستاردى وقۋعا, ەڭبەككە ۇيىمداستىرۋدا, اسىرەسە سوعىستان كەيىنگى بەيبىت ءومىر سالتىنا جاستاردى بەيىمدەۋ باعىتىندا كوپتەگەن جاڭا ۇردىسكە باستاماشى بولىپ, كوپ ەڭبەك ءسىڭىردى. سوعىس جىلدارى وقىماي قالعان جاستاردى بىلىمگە تارتۋ, ولاردىڭ ەڭبەككە ارالاسىپ, ونەركاسىپ وندىرىسىنە, اۋىل شارۋاشىلىعىن, سونىڭ ىشىندە تىڭ جەرلەردى يگەرۋگە قاتىناسۋىن ۇيىمداستىرۋدا جاستاردىڭ پاتريوتتىق, وتانسۇيگىشتىك, ادالدىق, ەڭبەككە بەيىمدىلىك قاسيەتتەرىن قالىپتاستىرۋدا كومسومولدىڭ اتقارعان جۇمىسى وراسان مول بولىپ, جاستار جەتەكشىسى ۇلكەن قوزعالىستىڭ باسىندا ءجۇردى. وتكەن عاسىردىڭ 50-جىلدارىندا كومسومول ۇيىمدارى جاستاردىڭ قازاقستاندا قانات جايىپ, قۇرىلىپ جاتقان جاڭا ءوندىرىس ورىندارىندا, جاڭا ءومىر قۇرىلىسىنا بەلسەنە ارالاسۋىنا باستاماشى بولىپ, جاڭا ءداستۇردىڭ تۋىن كوتەردى.
كەزىندە, 50-60-جىلدارداعى تەمىرتاۋ داڭقى تۋرالى قازىرگى ۇرپاق ەلباسى نۇرسۇلتان نازارباەۆتىڭ جاستىق شاعىمەن تانىسۋ ارقىلى شىنايى ماعلۇماتتار الدى. سول كەزەڭدەردە قازاقستاندا تىڭ جەرلەردى يگەرۋگە, تەمىرتاۋدا قاراعاندى مەتاللۋرگيالىق كومبيناتىنىڭ ىسكە قوسىلۋىنا بايلانىستى قوعامدا ەلەۋلى سەرپىلىس بولىپ, جاڭا ونەركاسىپ ورىندارى قازاقستاننىڭ كوپتەگەن وڭىرلەرىندە بوي كوتەرە باستادى. ولاردىڭ قۇرىلىستارىنا جاستار كوپتەپ شاقىرىلدى. جاستاردىڭ جاڭا قۇرىلىستارعا قۇلشىنا ارالاسۋىن ىنتالاندىرۋ ماقساتىندا كومسومول ۇيىمدارى «كومسومولدىق ەكپىندى قۇرىلىس» اتتى بۇكىلقازاقستاندىق قوزعالىسىن ۇيىمداستىرىپ, جاريالاپ, جاستاردىڭ ۇيىمشىلدىعىنا جاڭا مازمۇن ءبىتىرىپ, ولاردى ەڭبەككە جۇمىلدىرۋعا ايرىقشا قوعامدىق سيپات بەردى. بۇل قوزعالىس جىلدان-جىلعا كەڭىنەن ورىستەپ, جاستار ومىرىنە, ولاردىڭ بەلسەندىلىگىنىڭ ارتىپ, جاپپاي ەڭبەككە جۇمىلۋىنا ەلەۋلى ۇلەس قوستى. كومسومولدىق ەكپىندى قۇرىلىستارعا جاستاردىڭ كوپتەپ كەلۋى بۇكىل قازاقستاندا جاستاردىڭ دۇنيەتانىمىنا, ولاردىڭ ەڭبەك تاربيەسىنە ءتيىمدى اسەر ەتىپ, جاس وسكىندەردىڭ ازامات بولىپ, ومىردەن ءوز ورىندارىن تابۋىنا كومەك كورسەتتى. جاڭادان ىسكە قوسىلىپ جاتقان ونەركاسىپ ورىندارىندا جاستاردىڭ كاسىپتىك-تەحنيكالىق ۋچيليششەلەردە وقىپ, ماماندىق الىپ, سول ماماندىقتارىنا سايكەس اشىلىپ جاتقان زاۋىت, فابريكالارعا بارىپ, تۇراقتاپ جۇمىس ىستەۋگە جاستار ايرىقشا ق ۇلىقتى بولدى.
بۇل قازاقستان بويىنشا جاستار ءومىرىنىڭ جاڭا كەلبەتىن قالىپتاستىردى. قازاقستان كومسومولىنىڭ جەتەكشىسى بولعان ساعىندىق كەنجەباەۆ قازاقستاندا كومسومولدىڭ ءرولىن پارتيالىق باسشىلىققا سايكەس ارتتىرۋ ارقىلى ءوزى دە ۇلكەن مەكتەپتەن ءوتتى. ساكەڭ – جاستار ۇيىمىنىڭ بەدەلىن كوتەرۋگە ونىڭ بەلسەندى باسشىسى رەتىندە ايرىقشا ەڭبەك سىڭىرگەن كومسومول جەتەكشىلەرىنىڭ ءبىرى دەپ ايتۋىمىزعا تولىق بولاتىن تۇلعا. وتكەن عاسىردىڭ 50-60-جىلدارىندا تىڭ جەرلەردى يگەرۋگە بايلانىستى قازاقستانعا سىرتتان, باسقا وداقتاس رەسپۋبليكالاردان كوپتەگەن جاستار جىبەرىلدى. ولاردىڭ قۇرامى ۇلتتىق جاعىنان دا, الەۋمەتتىك جاعىنان دا سان الۋان بولدى. سونىمەن بىرگە سىرتتان كەلگەندەردىڭ ىشىندە ءارتۇرلى قىلمىستارعا بايلانىستى تۇرمەلەردە وتىرعان جاستاردى دا بوساتىپ, ولاردى تىڭ يگەرۋگە, تاعى باسقا وندىرىسكە دەپ قازاقستانعا كوپتەپ جىبەرگەن جاعدايلار دا جەتكىلىكتى بولعانى ءمالىم. ولاردىڭ جاپپاي كەلۋى قازاقستاندا ەداۋىر قيىندىقتار تۋعىزدى. تەك 1954-1964 جىلدار ارالىعىندا ءبىزدىڭ وڭىرلەرگە ءبىر ميلليونعا جۋىق ادام تىڭ يگەرۋگە كەلدى. كەلگەندەردىڭ نەگىزگى دەنى جاستار ەدى. بۇل ەڭ الدىمەن ۇلتتىق مادەنيەت پەن ءداستۇرىمىزدىڭ تىنىسىن تارىلتتى. قازاق ءتىلىنىڭ اياسى شەكتەلدى. كوپتەگەن ەلدى مەكەندەردە قازاق تىلىندەگى مەكتەپتەر جابىلىپ قالدى. كەيبىر جەرلەردە سودىرلىق, ماسكۇنەمدىك, بۇزاقىلىق ءورىس الدى.
قوعامعا جات قىلىقتارمەن, ىشىمدىككە سالىنۋ, زورلىق, ۇرلىق, تەنتەكتىك تە كوپ ورىن الىپ تۇردى. «قازاقستانعا اۋىل شارۋاشىلىعىن, جاڭا ءوندىرىستى كوتەرۋگە شىن پاتريوتتارمەن قاتار, ءارتۇرلى, قوعامعا جات قىلىقتارمەن قالىپتاسقان ادامدار دا كەلىپ جاتىر. ولار پاتريوتتىق سەزىممەن ەڭبەك ەتۋدىڭ ورنىنا جۇرگەن جەرلەرىندە قوعامعا, مادەنيەتىمىزگە جات قىلىقتار جاساپ, ۇرىس, توبەلەس, ۇرلىق, زورلىق, تاعى باسقا قىلمىستى ورىستەتكەنى جاسىرىن ەمەس. ءبىزدىڭ ۇلتتىق مەكتەپتەرىمىز بەن مادەنيەتىمىز دە قيىندىقتارعا كەزدەسىپ جاتتى. قازاقستانعا مەيلىنشە شىن مانىندە پاتريوت, جەرگىلىكتى جاستارمەن بىرگە ءبىر ماقساتتا ەڭبەك ەتكىسى كەلەتىن ادامداردىڭ كەلگەنى دۇرىس بولار ەدى», – دەپ بۇكىلوداقتىق مىنبەردە تىڭ يگەرۋ ناۋقانىنىڭ كولەڭكەلى جاقتارىن دا اشىق ايتقان رەسپۋبليكا باسشىلارىنىڭ ءبىرى, وسى جاستار جەتەكشىسى ساعىندىق كەنجەباەۆ بولاتىن. مەملەكەتتىك تاۋەلسىزدىك العان العاشقى جىلداردا كەيبىر وتكەن تاريحىمىزعا ءالى دە بۇرىنعى كەڭەس وداعىندا قالىپتاسقان كوزقاراسپەن قاراپ, سوعان باعا بەرۋ ماسەلەلەرىندە «شولاق» كوزقاراس كەزەڭىن دە باسىمىزدان وتكىزدىك. ونى ايتىپ وتىرعانىمىز, وكىنىشكە قاراي, كەڭەس وداعىنىڭ بۇكىل ساياساتىن جۇرگىزگەن پارتيا سول كەزدەگى تاريحتىڭ ءبارىن تەك ءوز داۋىرىنەن عانا باستاپ, وعان دەيىن ەشنارسە بولماعان سياقتى ەتىپ كورسەتۋگە تىرىسىپ باققانى سول بيلىك قۇلاعاننان كەيىن ايگىلەندى. ءبىز تاۋەلسىز مەملەكەت بولعاندا ەڭ الدىمەن ەلدىك, ۇلتتىق تاريحىمىزدىڭ تامىرى تەرەڭنەن باستالاتىنىنا ەكپىن بەردىك. سونداي-اق, كەڭەس وداعى قۇرامىندا بولعان 74 جىلدا ۇستەمدىك ەتكەن كوممۋنيستىك پارتيانىڭ يدەولوگياسىنان باس تارتتىق, الايدا, ول كەزەڭدە ەلدىڭ يگىلىگى ءۇشىن جاسالعان قاجەتتى قۇندىلىقتار ساقتالدى. ارينە, ەندى ولاردى تاۋەلسىز مەملەكەت تالابىنا ساي رەفورمالاۋ قاجەتتىگى كۇن تارتىبىنە كوتەرىلدى. كەڭەس وداعى كەزىندە ماسەلەن, دەنساۋلىق ساقتاۋ, جالپىعا بىردەي ورتا ءبىلىم بەرۋ جۇيەسى قالىپتاستى.
بۇلار ەشكىم دە جوققا شىعارمايتىن تاريحي شىندىق. مۇنداي قۇندىلىقتار – ءوسۋ جولدارىمىزدىڭ كورىنىستەرى. دۇنيەجۇزىندە وركەنيەتتى ەلدەردە قانداي ساياسي جۇيە بولسا دا, ول كەزەڭدە وتكەن وقيعالار مەن ماتەريالدىق يگىلىكتەر تاريحتان ءوشىرىلىپ تاستالعان ەمەس. ولاي بولعان جاعدايدا تاريحتىڭ وزىنە ادىلەتسىزدىك, قيانات بولار ەدى. كەڭەس وداعىندا وسىنداي ادىلەتسىزدىكتى باستان كەشىردىك. وتكەن تاريحىمىزدا, اسىرەسە, ادام تاعدىرىمەن بايلانىستى جاعدايلارعا قيانات جاسالعانى بولاشاق ۇرپاققا ۇمىتىلماس ساباق بولۋى كەرەك. ەڭ باستىسى, ونداي جاعدايدىڭ قايتالانۋىنا جول بەرمەۋىمىز قاجەت. كەڭەس وداعى كەزىندە بۇكىل قوعامدا, اسىرەسە, ادامداردىڭ دۇنيەتانىمىن, ولاردىڭ مورالدىق, رۋحاني سانا جاعدايلارىن قالىپتاستىرۋدا ۇلكەن ءرول اتقارعان پارتيادان كەيىنگى كومسومول ۇيىمدارىنىڭ جۇمىسىن دا تاريح بەتىنەن سىزىپ تاستاۋ مۇمكىن ەمەس. ءسوز جوق, كومسومول – كەشەگى ءداۋىر, بۇگىنگى, ەرتەڭگى جاستارعا ونى ناسيحاتتاۋدىڭ قاجەتى جوق شىعار. بىراق, ونىڭ كەزىندە, جاستار ومىرىنە وڭ ىقپال ەتكەنى دە راس. كومسومول قاتارىندا بولعان ميلليونداعان جاستار, بىرنەشە ۇرپاق كومسومولدىڭ ساياسي-قوعامدىق تاربيە, ەڭبەك, ەسەيۋ مەكتەبىنەن ءوتتى. ولار ۇرپاقتار بۋىنىمەن كومسومول ارقىلى ءوتىپ, باسقا وڭ جۇمىستارىن ايتپاعاندا, پاتريوتتىق, وتانسۇيگىشتىك دۇنيەتانىمدارى نەگىزىنەن وتە جوعارى بولدى. جاستار ساناسىندا ءوز وتانىنىڭ يگىلىگىنە ەڭبەك ەتۋ, وتانىن ءسۇيۋ, ونى قورعاۋ سياقتى قاسيەتتى ۇعىمداردىڭ قالىپتاسۋىنا كومسومولدىڭ ىقپالى زور ەدى.
سونداي كەزەڭدەردىڭ ءبىرى – ۇلى وتان سوعىسىنان كەيىنگى حالىق شارۋاشىلىعىن قالپىنا كەلتىرۋ, ەل تۇرمىسىن وڭالتۋ كەزەڭدەرى دە دامۋىمىزدىڭ ماڭىزدى جولدارى بولعانى دا تاريحي شىندىق. ەندى ولارعا قايتا انىقتاما بەرۋگە تىرىسۋ ەشكىمگە دە قاجەت ەمەس. حالىق شارۋاشىلىعىن قالپىنا كەلتىرۋ كەزەڭىندە تاريح ساحناسىنا شىققان ءارتۇرلى لاۋازىمدى ساياساتكەرلەر, ولاردىڭ بارلىعى ءبىزدىڭ حالقىمىزدىڭ تاريحىندا ءوز ورنى بار ازاماتتار. ساعىندىق ءجۇنىس ۇلى تاياۋدا 90 جاسقا كەلەدى. ابىزدىق بيىككە كوتەرىلگەن ازامات اعانىڭ جەكە باسىنا, ءومىرى مەن ەڭبەگىنە بايلانىستى لەبىز ءبىلدىرىپ, الدىڭعى تولقىن تۋرالى ءسوز ايتۋدى پارىزىم سانادىم. ول دا كومسومول قاتارىندا بولىپ, ەلىمىزدىڭ تاعدىرىنا, تاريحىنا بەلسەنە ارالاسىپ, حالىق الەۋەتىن كوتەرۋگە وراسان زور ەڭبەك ءسىڭىردى. ەلىمىزدىڭ ۇجداندى پاتريوتى بولدى. كومسومول قوعامدىق تاربيە مەكتەبى بولۋمەن قاتار, جۇزدەگەن, مىڭداعان جاستار ءۇشىن قوعامدىق, مەملەكەتتىك ەڭبەك ۋنيۆەرسيتەتى بولعانىن دا اتاپ ءوتۋ ءادىل ءارى ورىندى. كەزىندە كومسومول ۇيىمدارىن باسقارعان تالاي ازاماتتار ەلىمىزدىڭ سان الۋان سالاسىندا وتە ناتيجەلى, ابىرويلى قىزمەت ەتە العانى دا قوعامدا تانىلعان.
ەلباسى نۇرسۇلتان ءابىش ۇلىنىڭ كاسىبي ماماندىق تاڭداۋى, جاستىق شاقتاعى ءومىرى كومسومولدان باستاۋ الىپ, تەمىرتاۋ قالالىق كومسومول ۇيىمىن باسقارعانى, بۇكىلوداقتىق, قازاقستان كومسومولى ورتالىق كوميتەتتەرىنىڭ بەلسەندى مۇشەسى بولىپ, ساياسي شىڭدالۋدان وتكەنى الەمگە ايان. ساعىندىق ءجۇنىس ۇلى كومسومولدان كەيىن پارتيا قىزمەتىندە ءوزىن ءبىلىمدى باسشى ەتىپ كورسەتە الدى. اقتوبە وبلىستىق پارتيا كوميتەتىنىڭ حاتشىسى, سونداي-اق قازاقستان كومپارتياسى ورتالىق كوميتەتىنىڭ سولتۇستىك قازاقستان ءوڭىرى بويىنشا بيۋرو توراعاسىنىڭ ءبىرىنشى ورىنباسارى, رەسپۋبليكا جوعارى جانە ورتا ءبىلىم ءمينيسترىنىڭ ورىنباسارى قىزمەتتەرىن بىلىكتىلىكپەن, ابىرويمەن اتقاردى. ول وسى كەزەڭدە قازاقستان كومپارتياسى ورتالىق كوميتەتىنىڭ مۇشەسى, قازاقستان جوعارعى كەڭەسىنىڭ, كەڭەس وداعى جوعارعى كەڭەسىنىڭ دەپۋتاتى, قازاقستان كومپارتياسى جانە كوكپ سەزدەرىنىڭ دەلەگاتى بولدى. كەيىن عىلىمي-پەداگوگيكالىق قىزمەتپەن اينالىسىپ, عىلىم دوكتورى, پروفەسسور دارەجەسىندە ۇستازدىق ەڭبەك ەتىپ كەلەدى.
تاۋەلسىز قازاقستان تۇسىندا كورنەكتى قوعامدىق كوپشىلىك, ۇستازدىق ەڭبەگىمەن بۇگىنگى ءومىر ۇردىسىنە دە بەلسەنە اتسالىسىپ جۇرگەنى ۇلگى بولسا كەرەك. ساعىندىق ءجۇنىس ۇلى قازاقستان جاستار قوزعالىسىنىڭ ەڭ جاقسى داستۇرلەرىنە وزىندىك ۇلەسىن قوسا العان كورنەكتى جەتەكشى بولىپ, وزىنەن بۇرىنعى جەتىستىكتەرگە ءوز ىسىمەن جاڭا مازمۇن بەرىپ, جالعاستىرا الدى. قازاقستان كومسومولىن 1921, رەسپۋبليكا كومسومول ۇيىمىنىڭ رەسمي قۇرىلعان جىلىنان بەرى, 1991 جىلدىڭ قازانىنا دەيىن, 70 جىلدا ونىڭ ءبىرىنشى باسشىسى, ياعني ءبىرىنشى حاتشىسى بولعان ازاماتتار سانى 32 ەكەن. 1936 جىلى قازاق سوۆەتتىك سوتسياليستىك رەسپۋبليكاسى اتالىپ, وداقتاس 15 رەسپۋبليكانىڭ قاتارىنا كىرگەننەن كەيىنگى جەردە, ياعني, 1937-1991 جىلدار ارالىعىندا قازاقستان كومسومولى ورتالىق كوميتەتىنىڭ ءبىرىنشى سەكرەتارى لاۋازىمىندا 20 ازامات جەتەكشىلىك ەتكەن بولسا, سونىڭ ون ءبىرىنشىسى – ساعىندىق كەنجەباەۆ. ساعىندىق كەنجەباەۆ الدىڭعى بۋىن اعالاردىڭ كوزىندەي ءبىلىمى, سىرى مول, ادەبى زور, زەردەلى, ىشكى, سىرتقى مادەنيەتى باي, زيالى تۇلعا رەتىندە قازاقستان تاريحىن, قازاقستان قايراتكەرلەرىنىڭ تاريحىن تەرەڭ, تياناقتى بىلەدى. اعامىزدىڭ زەردەسى مىقتى, ويى سەرگەك, ءجۇرىسى شيراق. وسى كۇنگە دەيىن قالامىن قولىنان تاستاماي وتان تاريحى تۋرالى, ءوزى كوزكورگەن زامانداستارى تۋرالى بۇگىنگى ۇرپاقپەن وي ءبولىسىپ وتىرادى. تاۋەلسىزدىك تۇسىنداعى قوعامدىق ەڭبەگى جوعارى باعالانىپ, «قۇرمەت» وردەنىمەن ماراپاتتالدى. تاۋەلسىز قازاقستاننىڭ يگىلىگىن كوزىمەن كورىپ, جان-تانىمەن قابىلداپ, شىنايى ىقىلاسىمەن تىلەكتەس بولىپ وتىرعان باتاگوي اعانىڭ ءومىرى ۇزاق بولعاي.
قۋانىش سۇلتانوۆ,
پارلامەنت ءماجىلىسىنىڭ دەپۋتاتى, «نۇر وتان» پارتياسى ساياسي كەڭەسىنىڭ بيۋرو مۇشەسى.