اتىراۋ. 12 مامىر. تاي بوكسىنان قازاقستان قۇراماسى ساپىندا الەم چەمپيوناتىندا ونەر كورسەتكەن اتىراۋلىق ءۇش سپورتشى التىن مەدال الدى. بۇل تۋرالى «قايسار» سپورت كلۋبى حابارلادى. مۋايتاي بوكسىنان مالايزيادا وتكەن جاھاندىق جارىستا 76 ەلدىڭ سپورتشىلارى باق سىناستى. وسى سىندا ەلىمىزدىڭ نامىسىن ابىرويمەن قورعاعان سپورتشىلاردىڭ ۇشەۋى التىن مەدال ەنشىلەدى. ەلىمىزدىڭ بايراعىن جەلبىرەتىپ, ءانۇرانىن اۋەلەتكەن ءابىل عاليەۆ, الىشەر مۇحتاروۆ جانە ەلامان ساياساتوۆ اتىراۋداعى «قايسار» جانە «الان» سپورت كلۋبتارىندا جاتتىعادى. قازاقستان قۇراماسىنا بۇيىرعان جەتى قولا مەدالدىڭ ءبىرىن اتىراۋلىق تاعى ءبىر سپورتشى ابىلاي قۇرالباەۆ يەلەندى. ەل قورجىنىنا ءۇش التىن جانە ءبىر قولا مەدال سالعان اتىراۋلىق سپورتشىلاردى م.عاليەۆ, ب.مۇحامبەتاليەۆ, ب.ءامىرجانوۆ جانە ا.راحمان سىندى تانىمال جاتتىقتىرۋشىلار جارىسقا دايىندادى. جولداسبەك شوپەعۇل. دەرەككوز: «قايسار» سپورت كلۋبى. فوتو: «قايسار» سپورت كلۋبى.