شولپان-اتاعا جۇمىس ساپارى اياسىندا قازاقستان پرەمەر-ءمينيسترى ءاليحان سمايىلوۆ قىرعىز رەسپۋبليكاسى مينيسترلەر كابينەتىنىڭ توراعاسى – پرەزيدەنت اكىمشىلىگىنىڭ باسشىسى اقىلبەك جاپاروۆپەن ەكىجاقتى كەلىسسوز جۇرگىزدى.
كەزدەسۋ باسىندا ءاليحان سمايىلوۆ رەسەي فەدەراتسياسىنىڭ ۋليانوۆ وبلىسىندا قىرعىزستان ازاماتتارىنىڭ كولىك اپاتىنا ۇشىراپ, قازا بولۋىنا بايلانىستى كوڭىل ايتتى.
«وسىنداي اۋىر كەزدە قايعىلارىڭىزعا ورتاقپىن, زارداپ شەككەندەردىڭ تەز ساۋىعىپ كەتۋىن تىلەيمىن. قازاقستان پرەزيدەنتى جانە ءوز اتىمنان جاقىندارىنان ايىرىلعان وتباسىلارعا جانە جالپى باۋىرلاس قىرعىز حالقىنا كوڭىل ايتامىن», دەدى پرەمەر-مينيستر.
ۇكىمەت باسشىسى قىرعىز رەسپۋبليكاسىنىڭ باۋىرلاس ەل, سونداي-اق قازاقستاننىڭ وڭىردەگى نەگىزگى ساياسي جانە ەكونوميكالىق ارىپتەستەرىنىڭ ءبىرى ەكەنىن اتاپ ءوتتى.
«ەكى ەل اراسىنداعى ىنتىماقتاستىقتىڭ بارلىق سپەكترى بويىنشا تابىستى ءوزارا ءىس-قيمىل جولعا قويىلعان», دەدى ءا.سمايىلوۆ.
پرەمەر-مينيستر وسى جىلدىڭ ناۋرىز جانە مامىر ايلارىندا وتكەن مەملەكەت باسشىلارىنىڭ كەزدەسۋلەرى بارىسىندا ەكىجاقتى ستراتەگيالىق ارىپتەستىكتىڭ الداعى باعىتتارى ايقىندالعانىن ەسكە سالدى.
ء«بىزدىڭ نەگىزگى ماقساتىمىز – مەملەكەت باسشىلارى قويعان مىندەتتەردى تولىق جۇزەگە اسىرۋ جانە قازاق-قىرعىز ىنتىماقتاستىعىن ودان ءارى نىعايتۋ. اتاپ ايتقاندا, ءوزارا ساۋدا كولەمىن 2 ملرد دوللارعا دەيىن ۇلعايتۋ», دەدى ءا.سمايىلوۆ.