اتىراۋ. 12 مامىر. بۇگىن اتىراۋدا قازاقتىڭ بەلگىلى ونەر زەرتتەۋشىسى, كومپوزيتور يليا جاقانوۆ بەينەلەۋ ونەرى, سىزۋ ماماندىعى بويىنشا ديپلومدىق جۇمىسىن قورعادى. بۇل تۋرالى egemen.kz ءتىلشىسى حابارلادى.
بۇعان دەيىن جۋرناليستىك, جازۋشىلىق, كومپوزيتورلىق قىرىمەن كەڭىنەن تانىلعان قازاقستاننىڭ ەڭبەك سىڭىرگەن قايراتكەرى يليا جاقانوۆ بالا كەزىنەن سۋرەت سالىپ كەلەدى. ءوزىنىڭ ايتۋىنشا, قازاق دالاسىنىڭ تاڭعاجايىپ كەرەمەتتەرىن انمەن جەتكىزە الماعان كەزدە قولىنا قىلقالام الىپ, مايلى بوياۋمەن سۋرەت سالادى. ونىڭ جانارتاۋداي بۋىرقانعان سۋرەتكەرلىگىن بايقاعان جەرگىلىكتى قىلقالام شەبەرلەرى ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنەن كاسىبي ءبىلىم الۋعا ۇسىنىس جاساعان. ءسويتىپ, 2012 جىلى جەرگىلىكتى ءبىلىم ورداسىنا ەكى جىلدىق قىسقارتىلعان كۋرسقا وقۋعا قابىلدانعان.
بۇگىن قازاقتىڭ قابىرعالى قالامگەرى, تانىمال كومپوزيتور يليا جاقانوۆ ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ مەملەكەتتىك ەمتيحان كوميسسياسىنىڭ مۇشەلەرى كومپوزيتوردىڭ «جەرۇيىق» تاقىرىبىنداعى ديپلومدىق جۇمىسىن وتە جوعارى باعالادى. ديپلومدىق جۇمىستى قورعاۋ ش.ساريەۆ اتىنداعى كوركەم سۋرەت جانە قولدانبالى ونەر مۇراجايىندا ءوتتى. «ديپلومدىق جۇمىسىما التايدان اتىراۋعا دەيىن سوزىلىپ جاتقان قازاق دالاسىنىڭ سۇلۋ كورىنىستەرىن ارقاۋ ەتتىم. ءبىرىنشى سۋرەتتە التاي تاۋىنىڭ تاڭعاجايىبى, ەكىنشى سۋرەتىمدە سارىارقانىڭ كەڭ دالاسى كورىنىس تاپتى. ءۇشىنشى سۋرەتتە اقجايىقتىڭ كەرەمەتىن كەڭ اۋقىمدا باياندادىم» دەدى يليا جاقانوۆ.
ءبىر اتاپ وتەرلىگى, قازاقتىڭ تانىمال تۇلعاسىنىڭ ديپلومدىق جۇمىسىن قورعاۋىنا ۋنيۆەرسيتەتتىڭ وقىتۋشى-پروفەسسورلارى, ستۋدەنتتەرى, سونىمەن بىرگە جۇرتشىلىق وكىلدەرى دە قاتىستى. جۇرتشىلىق نازارىنا ي.جاقانوۆتىڭ ديپلومدىق جۇمىسىمەن بىرگە بۇرىن سالعان سۋرەتتەرى دە قويىلدى. ەسكە سالا كەتەيىك, جازۋشى, كومپوزيتور, ونەرتانۋشى تۇلعا 6 مامىردا 78 جاسقا تولدى.
جولداسبەك شوپەعۇل.
دەرەككوز: egemen.kz.
فوتو: egemen.kz.