الماتىدا ارالاس جەكپە-جەكتەن Naiza Fighting Championship 42 ءتۋرنيرى ءوتتى. اتالعان جارىستىڭ باستى باسەكەسىندە قازاقستاندىق ءالىبي ىدىرىس ءوز اتاعىن ساقتاپ قالۋ ءۇشىن برازيليالىق فلاۆيو سانتوسپەن سايىسقا ءتۇستى.
ءدال وسى پروموۋشندە اسا جەڭىل سالماقتا ونەر كورسەتىپ جۇرگەن ءالىبي جەتى جەكپە-جەك وتكىزىپ, بارلىعىندا جەڭىسكە جەتتى. بۇعان دەيىن ول مەدەت جۇمامۇرات, يسلام ايباتوۆ, تەيمۋر جاپاروۆ, ارگەن مالىكوۆ جانە اسلان وتەعاليەۆتى ۇتىپ, التىن بەلبەۋدى يەلەندى. ودان كەيىن چەشەنستاندىق جوحار ەسكيەۆتى ەسىنەن تاندىرىپ, چەمپيوندىق اتاعىن ساقتاپ قالدى. مىنە, ەندى قانداسىمىز برازيليادان كەلگەن ساقا سپورتشىنى سان سوقتىرىپ, ءوزىنىڭ مىقتىلىعىن تاعى ءبىر مويىنداتتى.
Naiza ۇيىمىنىڭ باسشىسى نۇربەك قارابالانىڭ سوزىنە سەنسەك, UFC مەنەدجەرلەرىنىڭ ءالىبي ىدىرىسقا ءبىراز ۋاقىتتان بەرى كوزدەرى ءتۇسىپ جۇرگەن كورىنەدى. «قازىر كەلىسسوزدەر جۇرگىزىلىپ جاتىر», دەيدى ول. ەگەر وسى اڭگىمە راس بولسا, وندا الەمدەگى ەڭ بەلدى ءپروموۋشننىڭ قاتارى تاعى ءبىر قازاق جىگىتىمەن تولىعادى.
الماتىدا وتكەن جارىستا تاعى بىرنەشە سپورتشىمىز وزدەرىنىڭ ورەلى ونەرىمەن جەرگىلىكتى جانكۇيەردى قۋانتتى. اتاپ ايتساق, باعدات جۇبانىش قىرعىزستاندىق سۇلتانبەك وروزمامات ۇلىن «قىلقىندىرىپ» تاستادى. جۇمان جۇمابەكوۆ نۇربەك وتاردى «سابميشن» ادىسىمەن جەڭدى. نۇربەك قابدىراحمانوۆ ازەربايجاندىق حازار رۋستاموۆقا ءدال وسىنداي ءتاسىل قولداندى. ايبەك بەكبولاتوۆ پەن ولجاس جاقىپبەك ۇلى اراسىنداعى باسەكەدە تەحنيكالىق نوكاۋت تىركەلدى. جەڭىس ايبەكتىڭ ۋىسىندا كەتتى. ال اكىمجان حاشيموۆ وزبەكستاندىق فيرۋز ياكۋبوۆتى ۇپاي سانىمەن ۇتتى.
سونداي-اق UFC-دە ونەر كورسەتىپ جۇرگەن قوس جەرلەسىمىزدىڭ قارسىلاسى انىقتالدى. بىلتىر يسلام ءدىنىن قابىلداپ, نامازعا جىعىلعان اقتوبەلىك سەرگەي موروزوۆ 17 جەلتوقساندا امەريكالىق دجورني نيۋسونمەن كۇش سىناسادى. «موروزدىڭ» جەرلەسى جالعاس جۇماعۇلوۆ 19 قاراشادا اقش-تىڭ تاعى ءبىر وكىلى چارلز دجونسونمەن جەكپە-جەككە شىعادى. اسا جەڭىل سالماقتاعى سپورتشىلارىمىزدىڭ UFC-دە الا-قۇلا ونەر كورسەتىپ جۇرگەندەرى بارشاعا ءمالىم. ولار بىردە ۇتسا, ەندى بىردە ۇتىلىپ ءجۇر. سول سەبەپتى دە ءدال وسى جەكپە-جەكتەردە ەكەۋىنە دە جەڭىس اۋاداي قاجەت.