الداعى 5-11 قىركۇيەك ارالىعىندا Astana Opera حالىقارالىق وپەرا اكادەمياسىنىڭ تىڭداۋشىلارى دىنمۇحامەد كوشكىنباەۆ پەن گۇلدانا الدادوسوۆا ۆەنگريادا وتەتىن ەۆا مارتوننىڭ V حالىقارالىق ۆوكاليستەر بايقاۋىنا قاتىسادى. ولار الەمنىڭ 29 ەلىنەن كەلگەن 70-كە جۋىق جاس وپەرا ورىنداۋشىلارىمەن بىرگە سىنعا تۇسەدى.
Astana Opera حالىقارالىق وپەرا اكادەمياسىنىڭ كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى تيمۋر ۋرمانچەەۆ ءوز سوزىندە ونەر جولىن ەندى باستاعان وپەرا انشىلەرى ءۇشىن وسىنداي بايقاۋلارعا قاتىسۋ ولاردىڭ ۆوكالدىق قابىلەتىن عانا ەمەس, تابيعي تالانتىن كورسەتۋگە ۇلكەن مۇمكىندىك ەكەنىن ايتادى.
ايتا كەتەيىك, ەۆا مارتوننىڭ حالىقارالىق بايقاۋى ۆەنگريانىڭ جەتەكشى جوعارى وقۋ ورنى – فەرەنتس ءليستتىڭ مۋزىكا اكادەمياسى نەگىزىندە وتكىزىلەدى. ونىڭ ىرگەتاسىن وپەرا ديۆاسى ەۆا مارتون قالاعان.
ءبىزدىڭ ەلىمىزدەن بايقاۋعا قاتىساتىن دىنمۇحامەد كوشكىنباەۆ ايگىلى ءانشى بيبىگۇل تولەگەنوۆانىڭ ح حالىقارالىق ۆوكاليستەر بايقاۋىنىڭ لاۋرەاتى.
– بۇل بايقاۋعا قاتىسۋ – مەنىڭ ارمانىم. سوعان جەتۋ ءۇشىن ءبىراز ەڭبەكتەنىپ, ءۇش اي دايىندالدىم. اسىرەسە دايىندىق كەزىندە بىزگە «استانا وپەرا» كونتسەرتمەيستەرى ءزارۋ جازىقباەۆا كوپ كومەكتەستى. بايقاۋعا بۇرىن ساحنادا ورىنداعان شىعارمالارىمەن بىرگە ف.ءليستتىڭ Lasst mich ruhen رومانسىن الىپ شىعامىن. ءبىر قاراعاندا بۇل تۋىندى قاراپايىم كورىنگەنىمەن وتە كۇردەلى, – دەسە, ەكىنشى قاتىسۋشى گۇلدانا الدادوسوۆا: – جالپى العاندا, ءبىز بايقاۋعا 8 تۋىندى دايىنداپ وتىرمىز, ولار داۋىستىڭ تەحنيكالىق مۇمكىندىكتەرىن ەسكەرە وتىرىپ, ونىڭ اۋقىمىن, شىدامدىلىعىن, سيپاتىن كورسەتۋ ءۇشىن تاڭداپ الىندى. ءبىرىنشى كەزەڭدە بارلىق قاتىسۋشىعا ف.ءليستتىڭ شىعارماسىن ورىنداۋ مىندەتتى سانالعان. ال ءوزىم بايقاۋعا گ.ف.گەندەلدىڭ وپەراسىنان التسينانىڭ ارياسىن, ۆ.بەللينيدىڭ «كاپۋلەتتي مەن مونتەككي» وپەراسىنان دجۋلەتتانىڭ ارياسىن, ۆ.ا.موتسارتتىڭ «دون جۋان» وپەراسىنان دوننا اننانىڭ ارياسىن جانە ن.ريمسكي-كورساكوۆتىڭ «التىن اتەش» وپەراسىنان شەماحان پاتشايىمىنىڭ ءانىن ورىندايمىن, – دەدى ول.
الەمنىڭ جاس وپەرا انشىلەرى باق سىنايتىن ءدۇبىرلى دودانىڭ سوڭعى كەزەڭى 10 قىركۇيەكتە ۆەنگريا مەملەكەتتىك وپەرا وركەسترىنىڭ قاتىسۋىمەن وتەدى.