استانا. 12 مامىر. بۇگىن باس پروكۋراتۋرادا قازاقستان رەسپۋبليكاسىنىڭ باس پروكۋرورى اسحات داۋىلباەۆتىڭ قاتىسۋىمەن پروكۋراتۋرا ورگاندارى جاس ماماندارىنىڭ كاسىبي دەڭگەيىن ارتتىرۋدىڭ ءبىرىنشى رەسپۋبليكالىق كۋرسى اشىلدى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى.
جيىندى اشاردا باس پروكۋرور اتاپ وتكەندەي, قۇقىق قورعاۋ جۇيەسىن ودان ءارى جاڭعىرتۋدىڭ مەملەكەتتىك باعدارلاماسىن, سونداي-اق قۇقىق قورعاۋ ورگاندارىنىڭ قۇقىقتىق ساياساتى تۇجىرىمداماسىن جۇزەگە شەڭبەرىندە قاداعالاۋ ورگاندارىنىڭ الدىنا قويىلعان باستى مىندەتتەردىڭ ءبىرى ءتيىمدى كادرلىق الەۋەتتى قالىپتاستىرۋ جانە نىعايتۋ بولىپ تابىلادى. پروكۋرورلىق قاداعالاۋدىڭ تيىمدىلىگى, ازاماتتاردىڭ سەنىم دەڭگەيى قىزمەتكەرلەردىڭ كاسىبيلىگىنە جانە قۇزىرەتتىلىگىنە, ولاردىڭ ىسكەرلىك جانە مورالدىك قاسيەتتەرىنە تاۋەلدى. سوندىقتان جاس مامانداردى دايارلاۋ جانە ولاردىڭ كاسىبي قالىپتاسۋ ماسەلەلەرى ەرەكشە ماڭىزدىلىققا يە بولادى.
جاس پروكۋرورلارعا ارناپ ءسوز سويلەي وتىرىپ, ا.داۋىلباەۆ ولارعا ءاردايىم قويىلاتىن تالاپتارعا جوعارى دەڭگەيدە سايكەس كەلۋگە, وزدەرىنىڭ قىزمەتتىك مىندەتتەرىن ويداعىداي ورىنداۋعا, ازاماتتىق قۇقىقتار مەن بوستاندىقتاردىڭ, قوعام مەن مەملەكەت مۇددەلەرىنىڭ كۇزەتىندە بولۋعا, كۇندەلىكتى ەڭبەكپەن پروكۋراتۋرانىڭ بەدەلىن نىعايتۋعا, پروكۋرورلىق ەتيكانىڭ نورمالارىن مۇلتىكسىز ساقتاۋعا, پروكۋرورلىق كاسىپتىڭ كەرەمەت داستۇرلەرىن كوبەيتۋگە شاقىردى.
سونداي-اق پرەزيدەنت اكىمشىلىگىنىڭ وكىلدەرى, ەلىمىزدىڭ الدىڭعى قاتارلى جوعارى وقۋ ورىندارىنىڭ جەتەكشىلەرى, پروكۋراتۋرا ورگاندارىنىڭ ارداگەرلەرى جاس ماماندارعا جىلى لەبىزدەرىن ءبىلدىردى.
ەكى اپتالىق كۋرستار بارىسىندا تىڭداۋشىلار الدىندا باس پروكۋراتۋرانىڭ دەپارتامەنت باسشىلارى, وڭىرلىك پروكۋرورلار ءسوز سويلەپ, جاس ماماندارمەن قاداعالاۋ قىزمەتىنىڭ نەگىزگى باعىتتارى بويىنشا تاجىريبەلەرى مەن بىلىمدەرىن ورتاعا سالادى.
سونىمەن قاتار وقىتۋ باعدارلاماسىندا شەشەندىك ونەر, كوشباسشىلىق قاسيەتتەر, زاڭگەرلىك حاتتاردىڭ تەحنيكاسى ءتارىزدى قاجەتتى قوسىمشا داعدىلاردى دامىتۋعا باعىتتالعان ارنايى ساباقتار, سونداي-اق سترەسس تۇراقتىلىعى بويىنشا ترەنينگتەر وتكىزۋ جوسپارلانعان.
ساكەن مايلىباي.
دەرەككوز: باس پروكۋراتۋرانىڭ ءباسپاسوز قىزمەتى.
فوتو: باس پروكۋراتۋرانىڭ ءباسپاسوز قىزمەتى.