ەلوردادا «جاستار» سارايىندا جۇمىسسىز ازاماتتار, پروباتسيا قىزمەتىنىڭ ەسەبىندە تۇرعان, باس بوستاندىعىنان ايىرۋ ورىندارىنان بوساتىلعان ادامدار جانە اليمەنت بويىنشا بورىشكەرلەر ءۇشىن جالپى قالالىق بوس جۇمىس ورىندارى جارمەڭكەسى ءوتتى. وعان 60-تان استام جۇمىس بەرۋشى قاتىستى, دەپ حابارلايدى Egemen.kz نۇر-سۇلتان اكىمدىگىنىڭ رەسمي سايتىنا سىلتەمە جاساپ.
قالانىڭ 60-قا جۋىق جۇمىس بەرۋشىسى ءتۇرلى باعىتتار بويىنشا 1700-گە جۋىق بوس جۇمىس ورنىن ۇسىندى, ونىڭ ىشىندە «ROYAL CARS ASTANA» جشس, «Hilton Astana» قوناق ءۇيى, «ARENA S» جشس جانە وزگەلەرى سياقتى ەلوردانىڭ جەتەكشى كاسىپورىندارى بار. سونداي-اق, 9 جۇمىس بەرۋشى پروباتسيا قىزمەتىنىڭ ەسەبىندە تۇرعان جانە باس بوستاندىعىنان ايىرۋ ورىندارىنان بوساتىلعان ادامداردى جۇمىسقا ورنالاستىرۋ ءۇشىن 170-تەن استام بوس جۇمىس ورنىن ۇسىندى.
جارمەڭكەنىڭ العاشقى ساعاتىندا 100-دەن استام ادام كەلدى. ەلوردا تۇرعىنى رايسا باراتوۆا اسپازشى جۇمىسىن ىزدەدى. مۇندا جۇمىس بەرۋشىلەرمەن تىكەلەي سويلەسىپ, بىردەن بىرنەشە ۇيىمعا سۇحباتتاسۋعا شاقىرۋ الدى.
«قازىر جۇمىسسىزداردى جۇمىسپەن قامتۋ ورتالىعىندا تىركەلىپ تۇرمىن. چاتقا حابارلاما كەلدى. مۇنداي اكتسيالاردىڭ بولعانى جاقسى. شامامەن 5-6 بوس ورىندى كوردىم. ازىرگە اسپازشى جۇمىسىن ىزدەپ ءجۇرمىن. ۇسىنىلعان جالاقى مولشەرى ويداعىداي, 300 مىڭعا دەيىن بارادى», دەيدى رايسا باراتوۆا.
جارمەڭكەگە نۇر-سۇلتان قالاسى پروكۋراتۋراسىنىڭ, جۇمىسپەن قامتۋ جانە الەۋمەتتىك قورعاۋ باسقارماسىنىڭ, ادىلەت دەپارتامەنتىنىڭ جانە قىلمىستىق-اتقارۋ جۇيەسى دەپارتامەنتىنىڭ وكىلدەرى قاتىستى.
ء«بىز اقپان ايىنان بەرى باس-اياعى 49 جارمەڭكە وتكىزدىك. ازاماتتاردىڭ جەكەلەگەن ساناتتارى ءۇشىن شاعىن جارمەڭكەلەر وتكىزۋگە تىرىسامىز. بىزدە قالا اكىمدىگىنىڭ قاۋلىسى بار, وندا مۇگەدەكتىگى بار ادامدار ءۇشىن, باس بوستاندىعىنان ايىرۋ ورىندارىنان بوساتىلعاندار ءۇشىن, پروباتسيا قىزمەتىندە ەسەپتە تۇرعان ادامدار ءۇشىن جۇمىس ورىندارىنا كۆوتا بەلگىلەنگەن. ولاردى كۆوتا اياسىندا جۇمىسقا ورنالاستىرۋعا تىرىسامىز», دەدى نۇر-سۇلتان قالاسى اكىمدىگىنىڭ جۇمىسپەن قامتۋ ورتالىعىنىڭ ورىنباسارى تالعات ەسىموۆ.
جۇمىس ىزدەۋشىلەر وزدەرىن قىزىقتىراتىن سالادا بوس جۇمىس ورىندارىن ىزدەپ قانا قويماي, جۇمىس بەرۋشىلەرمەن تىكەلەي سويلەسۋگە مۇمكىندىك بەرىلدى. سونداي-اق ازاماتتارعا جۇمىسپەن قامتۋ ورتالىعىنىڭ ماماندارىنان وزدەرىن قىزىقتىراتىن ماسەلەلەر بويىنشا كەڭەستەر ايتىلدى.
ايتا كەتەيىك, جىل سوڭىنا دەيىن نۇر-سۇلتاندا 28 مىڭ جاڭا جۇمىس ورنى اشىلادى. بوس ورىندار جارمەڭكەسىنىڭ ماقساتى – ازاماتتاردى بوس جۇمىس ورىندارىنا ورنالاستىرۋ. «جاستار» سارايىندا وتكىزىلگەن جالپى قالالىق جارمەڭكەگە 400-گە جۋىق جۇمىس ىزدەۋشى قاتىستى. حالىقتى جۇمىسپەن قامتۋ ورتالىعىنىڭ مالىمەتىنشە, جىل سوڭىنا دەيىن وسىعان ۇقساس 7 ءىس-شارا وتەدى.