استانا. 12 مامىر. ەلوردادا شاققان ادامىن ولتىرەتىن ۋلى ماسالار پايدا بولدى. ونىڭ وشاعى ازىرگە ىرگەدەگى اۋىلداردا كورىنەدى. قازىر بىرتىندەپ ورتالىققا قاراي جاقىنداپ كەلەدى. بۇل تۋرالى كتك ارناسى حابارلادى.
ەلوردانىڭ سانيتارلىق ەپيدەميولوگتارى قازىر قانسورعىشتارمەن كۇرەستى باستاپ كەتتى. بىراق كۇرەس نەگىزىنەن ماسا كورىنەتى قاس قارايعان شاقتا عانا جۇرەدى. الايدا, جۇرتتى «كەسەلدەن قورعايمىز» دەپ جۇرگەن جانداردى تۇسىنبەي جۇرگەندەر دە جەتەرلىك. ال سانيتارلار قاتەردىڭ الدىن-الۋ ماقساتىندا جاندىكتەردىڭ ءوسىپ-ونۋلەرى ىقتيمال جەرلەردى تۇگەل ۋلاپ جاتىر.
«بوشكەلەرگە قۇيىلعان سۋعا سەس قىزمەتكەرلەرى ۋ ارالاستىرادى. ويتكەنى, ماسالاردى وسى ۋلى قوسپامەن عانا كوزىن جويۋعا بولادى», دەپ حابارلادى كتك ارناسى.
«تۇنىمەن دارىلداتىپ جۇرگەنىمىز تۇرعىندارعا ۇنامايدى. ايقايلاپ, ۇرسىپ, پوليتسيا شاقىرتامىز دەيدى. باسقا امالىمىز جوق ەندى. شاشىپ جۇرگەنىمىز ۋلى عوي. كۇندىز ادامدار ۋلانىپ قالۋى ابدەن مۇمكىن. ال, بۇل جۇمىستىڭ ءبارى سول تۇرعىندار ءۇشىن», – دەيدى دەزينفەكتسيالاۋشى دەنيس رۋكابەرت.
سەس قانشا الەك بولعانىمەن, جاندىكتەردىڭ قاۋىپتى تۇرلەرى پايدا بولۋدا. بۇل جولى انوفلەس دەپ اتالاتىن ماسا باس كوتەرىپتى. قاۋىپتى قانسورعىش ەلوردا ىرگەسىن جاۋلاپ العان ەكەن. ەندى ورتالىققا جاپپاي اعىلۋى عاجاپ ەمەس.
ەڭ قورقىنىشتىسى, جاندىككە تالانعان ادام ءولىپ كەتۋى مۇمكىن. بولماسا بەزگەك اۋرۋىن جۇقتىرۋى ىقتيمال.
استانا قالالىق سەقب باس مامانى ايبارشا دۇيسەنبايدىڭ مالىمدەۋىنشە, استانا قالاسىندا انوفلەس ماساسىنىڭ پايدا بولۋ ءتۇرى بار. ويتكەنى, ونىڭ پايدا بولۋىنا قولايلى جاعداي تۋىپ وتىر. ماسانىڭ ءبىرىنشى وشاعى ميچۋرين كەنتىندە 2013 جىلى تابىلعان. ەكىنشى وشاعى جاقىندا الاش تاس جولىنان شىقتى.
قانسورعىشپەن كۇرەس قازىر كۇشەيتىلىپ كەلەدى. ونىڭ قالاعا جايىلماۋى ءۇشىن باتپاقتى جەرلەر مەن وزەن-كولدەر عانا ەمەس, تۇرعىن ۇيلەردىڭ جەرتولەلەرىنە ۋ سەبىلىپ جاتىر. ال قانسورعىشتاردان قورعانۋ ءۇشىن ەسىك تەرەزەنى قىمتاپ وتىرعان ءجون. ويتكەنى, قاۋىپتى جاندىكتەن قانشا قورعانعانىمەن, ول وسى جازدا ويران سالۋى ابدەن مۇمكىن.
مۇنىڭ ۇستىنە, بيىل سينوپتيكتەردىڭ بولجامىنشا ەلىمىزدە جاۋىن-شاشىن مول بولادى. بۇل تۇرعىنار ءۇشىن قاۋىپ. اسىرەسە جازدا. سەبەبى, جاڭبىردان كەيىن ماسالارعا جان ءبىتىپ, بەلسەندىلىكتەرى ارتا تۇسەدى ەكەن. ال ماسالار باس قالانى باسىپ الماسى ءۇشىن سەس قىزمەتكەرلەرى 24 تاۋلىك بويى ۇدايى كەزەكشىلىك ۇيىمداستىرادى.
مۇرات ايتقوجا.
دەرەككوز: كتك.
فوتو: www.ooocharli.ru.