داڭق مەموريالى الاڭى كەۋدەسى وردەن مەن مەدالعا تولى قاريالار مەن قىپ-قىزىل گۇل شوقتارىن ۇستاعان ءنوپىر حالىققا تولى بولدى. ءوڭىر باسشىسى ب.ساپارباەۆ پەن وبلىستىق ارداگەرلەر كەڭەسىنىڭ توراعاسى گ.بەرديۋگين باستاعان وبلىس ورتالىعىنىڭ جۇرتشىلىعى, اسكەري بولىمدەر, كاسىپورىندار مەن مەكەمەلەردىڭ وكىلدەرى بار تاعزىم ەتۋشىلەردىڭ قالىڭ قاتارى سۇراپىل سوعىستا قان توككەن مايدانگەرلەر رۋحىن ەسكە الىپ, ماڭگىلىك الاۋعا گۇل شوقتارىن قويدى.
بۇگىندە وسكەمەندە 240 ۇوس ارداگەرى, 8051 تىل ەڭبەككەرى تۇرادى. شىعىس وڭىرىنەن مايدانعا 170 مىڭعا تارتا ادام اتتانسا, ولاردىڭ اراسىندا سوعىس دالاسىندا اجال قۇشىپ, حابارسىز كەتكەندەردىڭ ءوزى 96 مىڭعا جۋىق. شىعىسقازاقستاندىقتار اتالعان سوعىستا اسقان ەرلىك كورسەتكەنىن وڭىردەن اتتانعان 109 جاۋىنگەردىڭ كەڭەس وداعىنىڭ باتىرى اتاعىنا يە بولعانىنان بىلۋگە بولادى. سونداي-اق, 24 جەرلەسىمىز «داڭق» وردەنىنىڭ تولىق كاۆالەرى بولدى. بۇل – باتىر اتاعىنا تەڭەستىرىلگەن جاۋىنگەرلىك جوعارى ماراپات. 30 مىڭعا جۋىق ساربازدار ءتۇرلى دارەجەدەگى وردەندەرمەن, مەدالدارمەن, 9 مىڭ تىل ەڭبەككەرى « ۇلى وتان سوعىسىنداعى قاجىرلى ەڭبەگى ءۇشىن» مەدالىمەن ماراپاتتالدى.
جەڭىس رۋحىن ايشىقتاعان سالتاناتتى مەرەكە رەسپۋبليكا الاڭىندا اسكەري شەرۋمەن جالعاستى. شەرۋدى ىشكى ىستەر مينيسترلىگى ۇلتتىق ۇلانىنىڭ «شىعىس» وڭىرلىك قولباسشىلىعىنىڭ قولباسشىسى, گەنەرال-مايور باۋىرجان ءابجانوۆ باسقاردى. «شىعىس» وڭىرلىك قولباسشىلىعىنىڭ وفيتسەرلەرى, 5518 اسكەري ءبولىمىنىڭ قىزمەتكەرلەرى, توتەنشە جاعدايلار دەپارتامەنتىنىڭ وفيتسەرلەرى مەن اۋعان سوعىسىنىڭ ارداگەرلەرى, د.سەرىكباەۆ اتىنداعى شقمتۋ اسكەري كافەدراسىنىڭ ستۋدەنتتەرى جانە وسكەمەن قالاسىنداعى «قاھارمان», «تۇلپار», «جۇلدىز-زۆەزدا», «ايبىن» اسكەري-پاتريوتتىق كلۋبتارىنىڭ مۇشەلەرى بار 15 كولوننا ساپ تۇزەگەن سالتاناتتى شەرۋ بارىسىندا ءارتۇرلى تاقىرىپتا بەزەندىرىلگەن جۇك كولىكتەرى ۇلى وتان سوعىسىنداعى شەشۋشى ۇرىستاردى بەينەلەگەن كورىنىستەر ۇسىندى. ماسەلەن, «برەست قورعانى», «ماسكەۋ ءۇشىن شايقاس», «كۋرسك شايقاسى», «لەنينگراد قورشاۋى», «بەرليندى الۋ» جانە بۇگىنگى بەيبىت ءومىردى بەينەلەگەن «ماڭگىلىك ەل» كورىنىستەرى الاپات سوعىس پەن اتا-بابالارىمىزدىڭ بەكەر قان توكپەگەنىن ۇتىمدى كورسەتە ءبىلدى. سالتاناتتى شەرۋدى ۇلتتىق ۇلاننىڭ 5518 اسكەري ءبولىمىنىڭ وركەسترى مارشتىق اۋەندەرمەن سۇيەمەلدەدى.
– بۇگىنگى زامان وكىلدەرى ەل ەگەمەندىگىنىڭ, بەيبىت ءومىردىڭ قالاي كەلگەنىن ۇمىتپاۋى كەرەك. ءبىز, اتا-اجەلەرىمىز, اكە-انالارىمىز, اعالارىمىز الدىندا بورىشتارمىز. سوعىستىڭ قايعىسى, قاسىرەتى كوپ بولادى. سوندىقتان وتان ءۇشىن جانىن قيعان اعا بۋىن ەرلىگى, ەڭبەكتەگەن بالادان ەڭكەيگەن قارياعا دەيىن ەتكەن ولشەۋسىز ەڭبەك ەش ۋاقىتتا ۇمىتىلمايدى, – دەدى ءوڭىر باسشىسى ب.ساپارباەۆ.
سونىمەن قاتار, جامبىل اتىنداعى ساياباقتا ۇوس ارداگەرلەرى مەن تىل ەڭبەككەرلەرى سارباز بوتقاسىنان ءدام تاتىپ, اسكەري-پاتريوتتىق اندەردى شىرقادى. ال ەرتىس جاعاسىنداعى امفيتەاتردا «جەڭىس رەكوردى» سپورتتىق اكتسياسى ءوتتى. وندا ۇلى وتان سوعىسىنان بەرى وتكەن 25203 بەيبىت كۇننىڭ قۇرمەتىنە اتالعان ساندىق كورسەتكىشپەن ساي كەلەتىن دەنە كۇشىن سىناۋدان, بەلتەمىردە ويناۋدان جانە گىر تاسىن كوتەرۋدەن سپورتتىق جارىستار ءوتتى. جەڭىس مەرەكەسى ەرتىس جاعاسىنداعى بارقىت اسپاندى سانسىز جۇلدىزدارعا بولەگەن وتشاشۋمەن اياقتالدى.
وسكەمەن.