«قازاقستان حالقىنا» قوعامدىق قورىنىڭ باسقارما توراعاسى بولات جامىشەۆ پەن قالا اكىمى التاي كولگىنوۆ قالا اكىمدىگىندە تۇرعىندارمەن كەزدەسۋ وتكىزدى, دەپ حابارلايدى Egemen.kz ەلوردا اكىمدىگىنىڭ سايتىنا سىلتەمە جاساپ.
كەزدەسۋدە «قازاقستان حالقىنا» قق جۇمىسى تانىستىرىلىپ, قوردىڭ ءبىلىم بەرۋ, دەنساۋلىق ساقتاۋ جانە سپورت سالاسىنداعى ىسكە اسىرىلىپ جاتقان قايىرىمدىلىق باعدارلامالارى مەن جوبالارى كەڭىنەن تالقىلاندى. سپيكەرلەر مەديتسينالىق جانە وڭالتۋ ورتالىقتارىن جابدىقتاۋ, ەرەكشە قاجەتتىلىكتەرى بار ادامدار ءۇشىن ءبىلىم بەرۋ باعدارلامالارىن ەنگىزۋ, سونىڭ ىشىندە قايتا دايارلاۋ, شىعارماشىلىق جانە سپورتتىق باعدارلامالاردى قولداۋ بويىنشا ماسەلەلەردى ورتاعا سالدى. جۇرتشىلىقتىڭ اتىنان دا كوپتەگەن ۇسىنىستار كەلىپ ءتۇستى.
جيىنعا قالالىق قۇرىلىمداردىڭ باسشىلارى, ۇەۇ جانە قوعامدىق ۇيىمداردىڭ وكىلدەرى, مەديتسينالىق مەكەمەلەردىڭ, جوعارى وقۋ ورىندارىنىڭ باسشىلارى, ءماسليحات دەپۋتاتتارى, قوعامدىق كەڭەس مۇشەلەرى مەن مەتسەناتتار قاتىستى.
«قىركۇيەك ايىنىڭ ورتاسىندا ۇلتتىق قايىرىمدىلىق كونفەرەنتسياسى وتەدى دەگەن جوسپار بار. بۇل كونفەرەنتسياعا ءۇش اي بويى دايىندالدىق. ءىس-شارانىڭ مۇنداعى ماقساتى - قوردىڭ قايىرىمدىلىق باعدارلامالارى مەن جوبالارىنىڭ جاڭارتىلعان تۇجىرىمداماسىن بەكىتۋ», دەدى بولات جامىشەۆ ءوز سوزىندە.
«مەديتسينالىق ۇيىمداردى وفتالمولوگيالىق سكرينينگكە جانە شالا تۋعان نارەستەلەردىڭ رەتينوپاتياسىن ەمدەۋگە ارنالعان جابدىقپەن قامتاماسىز ەتۋ» باعدارلاماسى اياسىندا ەلورداداعى انا مەن بالانىڭ ۇلتتىق عىلىمي ورتالىعى, №2 كوپبەيىندى قالالىق اۋرۋحانا جابدىقتالادى.
«قازاقستان حالقىنا» قق ءبىلىم گرانتتارى باعدارلاماسىنا ەلوردانىڭ 11 جوعارى وقۋ ورنى قاتىسۋعا تىلەك ءبىلدىردى. ايتا كەتسەك, قالادا مۇمكىندىگى شەكتەۋلى بالالار مەن جاسوسپىرىمدەرگە ارنالعان «تۇساۋ كەسەر» دەنە شىنىقتىرۋ-ساۋىقتىرۋ ۇيىرمەسى جۇمىس ىستەيدى.
كەزدەسۋ اياسىندا نۇر-سۇلتان اكىمدىگى مەن «قازاقستان حالقىنا» قوعامدىق قورى ىنتىماقتاستىق تۋرالى مەموراندۋمعا قول قويدى.
«بۇگىندە قور جۇيەلى جۇمىس جۇرگىزىپ جاتقانى بەلگىلى. ىنتىماقتاستىق تۋرالى مەموراندۋم بىزگە الەۋمەتتىك جوبالاردى كەڭەيتۋگە مۇمكىندىك بەرەدى. بۇگىنگى پايدالى كەزدەسۋ بارىسىندا كەلىپ تۇسكەن ۇسىنىستار مەن ناقتى جوبالاردى بىرگە پىسىقتايتىن بولامىز. بىزگە ەرەكشە قاجەتتىلىكتەرى بار بالالاردى قولداۋ ماڭىزدى. ماسەلەن, قالادا ينكليۋزيۆتى مەكتەپتەردىڭ سانىن كوبەيتۋ, تسەرەبرالدى سال اۋرۋى, اۋتيزم, داۋن سيندرومى دياگنوزىمەن اۋىراتىن بالالارمەن اينالىساتىن پەريناتالدى ورتالىقتاردى, وڭالتۋ ورتالىقتارىن جانە ونكولوگيالىق ورتالىقتى قاجەتتى جابدىقتارمەن جابدىقتاۋ قاجەت», دەدى باس شاھار باسشىسى التاي كولگىنوۆ.