بيىلعى جىلدىڭ اقپان ايىنان بەرى باتىس قازاقستان وبلىسىنىڭ اۋداندارى مەن وكرۋگتەرى اراسىندا «بەيبىتشىلىك پەن كەلىسىم» رەسپۋبليكالىق مەگاجوبا اياسىندا شارالار جالعاسىن تابۋدا.
سونىڭ ايعاعىنداي, جانىبەك اۋدانىنىڭ ءتۇرلى سالالار وكىلدەرىنەن قۇرالعان دەلەگاتسيا كورشىلەس جاتقان قازتالوۆ اۋدانىندا بولدى. بۇل ەكى اۋدان دا رەسەيدىڭ ۆولگوگراد, ساراتوۆ گۋبەرنيالارىمەن شەكارالاس ورنالاسقان. رەسەيمەن «اۋىلى ارالاس, مالى قورالاس» بولعاندىقتان, ءتۇرلى ۇلت وكىلدەرى تۇرادى.
مەگاجوبا اياسىندا دوڭگەلەك ۇستەل باسىندا كەزدەسكەن قازتالوۆ جانە جانىبەك اۋداندارىنىڭ اكىمدەرى نۇرلان بەكقايىر مەن مۇرات مۇقاەۆ اۋداندارداعى اتقارىلىپ جاتقان جۇمىستار جونىندە اڭگىمەلەپ, تاجىريبەلەر الماستى. سونداي-اق, دەلەگاتسيا مۇشەلەرى تيپتىك جوبادا سالىنعان «نۇربالاپان» بالاباقشاسىندا, تاريحي-ولكەتانۋ مۇراجايىندا بولدى. ءبىر قۋانارلىعى, كورشىلەردىڭ اڭگىمەسىندە جانىبەك اۋدانىنىڭ ورتالىعىندا دا «نۇربالاپانداي» بالاباقشا قۇرىلىسى باستالىپتى. سونىمەن قاتار, جانىبەك اۋدانىنىڭ اقوبا وكرۋگى جەرىنەن جەراستى قازبا بايلىقتىڭ تابىلعانىن دا جەتكىزدى. بۇعان قازتالوۆتىقتار كورشىلەردىڭ قۋانىشىنا ورتاقتاستىق تىلەگىن ءبىلدىردى.
مەگاجوبا اياسىنداعى كەزدەسۋدە ءسوز العان ۇلتى ازەربايجان تامارا كافاروۆا جۇبايىنىڭ قازاق ەكەنىن ايتا كەلىپ, قۇدا-جەكجاتتارىنىڭ دا جەرگىلىكتى حالىقتان ەكەنىن جەتكىزدى. ال كونتسەرتتىك باعدارلامادا تامارا حالىق ءانى «ۋگاي - ايدى» ورىنداعاندا كورەرمەن قوشەمەتپەن قول سوقتى.
سونداي-اق, جانىبەك اۋداندىق «شۇعىلا» گازەتىنىڭ رەداكتورى احمەديار باتىرحانوۆ اۋدانىمىزدان ۇلى وتان سوعىسىندا حابارسىز كەتكەن بوزداقتاردىڭ تىڭ مالىمەتتەرىن الىپ كەلۋى – ۇلى جەڭىستىڭ 70 جىلدىعىنا بەرىلگەن تارتۋ دەۋگە بولادى.
وسىنداي ەل مەن ەلدى جاقىنداستىرعان, تاتۋلىق پەن بىرلىكتى ناسيحاتتاعان مەگاجوبا اياسىندا وتكىزىلگەن شاراعا اۋدان جۇرتشىلىعى ريزا بولدى.
گۇلفيا كوشباەۆا.
باتىس قازاقستان وبلىسى,
قازتالوۆ اۋدانى.