م.دۋلاتوۆ اتىنداعى قوستاناي ينجەنەرلىك-ەكونوميكالىق ۋنيۆەرسيتەتىندە قازاقستان حالقى اسسامبلەياسىنىڭ كافەدراسى اشىلدى. ونىڭ تۇساۋكەسەرىنە قازاقستان حالقى اسسامبلەياسى توراعاسىنىڭ ورىنباسارى, پارلامەنت سەناتىنىڭ دەپۋتاتى اناتولي باشماكوۆ, ونىڭ سەناتور ارىپتەستەرى حۋساين ۆاليەۆ پەن جەڭىس نۇرعاليەۆ قاتىستى.
كافەدرانىڭ اشىلۋ سالتاناتىندا مازمۇندى ءسوز سويلەگەن ا.باشماكوۆ ۇلتتار مەن ۇلىستاردىڭ تاتۋلىعىن, ءبىرلىگىن ساقتاۋ بۇگىندە الەمدىك سيپات الىپ وتىرعان وزەكتى ماسەلە ەكەندىگىنە توقتالدى. ونىڭ مىسالىنا ۋكرايناداعى جاعدايدى كەلتىردى.
– ءبىزدىڭ ەلباسىمىز نۇرسۇلتان نازارباەۆ مەملەكەت تاۋەلسىزدىگىنىڭ العاشقى كۇنىنەن باستاپ, ەلىمىزدەگى ءتۇرلى ۇلتتار وكىلدەرىنىڭ بىرلىگىن ەڭ ءبىرىنشى ماسەلە ەتىپ قويدى. بىرلىگى بار ەل وزادى. قازىر الەمدەگى ەكونوميكالىق, قارجىلىق, ەكولوگيالىق داعدارىستاردىڭ بارلىعى دا حالىقتار تاتۋلىعى ورىن العاندا عانا دۇرىس شەشىمىن تابادى. سول ءۇشىن ءبىزدىڭ ءوز ءداستۇرىمىز, ءتىلىمىز ءتۇپ-تامىرىنان اجىراماعاندا عانا ۇلتتار تاتۋلىعى مۇمكىن بولادى. ول ءۇشىن ەلباسىمىز بارلىق جاعدايدى جاساپ وتىر,– دەدى اناتولي افاناسەۆيچ.
ۋنيۆەرسيتەت رەكتورى ءسابيت ەسمۇراتوۆ جۇرتشىلىققا كافەدرانىڭ اشىلۋ ماقساتى مەملەكەتتىك ەتنوساياسات مىندەتتەرىن ىسكە اسىرۋ, جاستاردى تولەرانتتىلىق جانە ەتنوسارالىق كەلىسىم رۋحىندا تاربيەلەۋ ەكەنىن ايتىپ ءوتتى. قازاقستانداعى جوعارى وقۋ ورىندارىندا اشىلعان بۇل ءۇشىنشى كافەدرا بولىپ سانالادى. ونىڭ مەڭگەرۋشىلىگىنە وبلىستا مەملەكەتتىك جانە شارۋاشىلىق قىزمەتتەر اتقارعان, ومىرلىك تاجىريبەسى مول ازامات ميراس نۇرعاليەۆ بەكىتىلدى.
م.دۋلاتوۆ اتىنداعى قوستاناي ينجەنەرلىك-ەكونوميكالىق ۋنيۆەرسيتەتىندە اشىلعان كافەدرا وبلىستىق قازاقستان حالقى اسسامبلەياسىنىڭ نەگىزگى ادىستەمەلىك ورتالىعى بولادى.
ءنازيرا جارىمبەتوۆا,
«ەگەمەن قازاقستان».
قوستاناي.