مەن پولياك ەتنوسىنىڭ وكىلىمىن. تۇپكى تامىرىم بۇرىنعى كوكشەتاۋ وبلىسىنان باستاۋ الادى. سول جەرگە كەزىندە ءبىزدىڭ اۋلەتتى, اتامدى جەر اۋدارعان ەكەن. مەن دە كوكشەدە تۋىپ, اسكەر قاتارىنان كەيىن پاۆلودار وبلىسىنا قونىس اۋداردىم. وسى جەردەگى اسسامبلەيا قاتارىنا 39 جاسىمدا كەلىپپىن.
قازىر, مىنە, 21 جىل بويى وسى قازاقستان حالقى اسسامبلەياسىنىڭ وبلىستىق بولىمشەسىندە قىزمەت جاساپ كەلەمىن. وسى جولعى ەلباسى نۇرسۇلتان نازارباەۆتىڭ توراعالىعىمەن وتكەن اسسامبلەيا سەسسياسى ومىرىمدەگى ۇمىتىلماس كەزەڭدەردىڭ بىرىنە اينالدى. سەبەبى, ەلباسىنىڭ قولىنان ماراپاتقا يە بولىپ, قۋانىشقا بولەندىم.
پرەزيدەنت ەلىمىزدەگى ءارتۇرلى ۇلت وكىلدەرىنىڭ مادەنيەتىن, سالت-ءداستۇرىن, ءتىلىن, ءدىنىن دامىتىپ, جاڭعىرتۋدى جانە ەل ىشىندەگى بىرلىكتى ساقتاۋدى ويلايدى. البەتتە, وتكەن كەزەڭنىڭ جاقسى-جامان دەگەندەي تۇستارى بولدى. ويتكەنى, مەن دە سول كەزدە كوپشىلىكپەن بىرگە ءبىلىم الىپ, وبلىس ورتالىعىنداعى يندۋستريالىق ينستيتۋتىن ءبىتىردىم. كەيىن ءاربىر ەتنوستىڭ ۇلتتىق مادەنيەتىن, ءتىلىن, سالت-ءداستۇرىن قايتا جاڭعىرتۋ رۋحى, اسسامبلەيانىڭ ەرەكشە لەبى ەسكەن ءبىزدىڭ ەلىمىزدىڭ تاۋەلسىزدىك العان جىلدارى باستالدى.
قازىرگى تاڭدا ەلىمىزدە 820 ەتنومادەني بىرلەستىك بار ەكەن. ولاردىڭ قاتارىندا 70 مىڭنان استام بەلسەندى ەتنوس وكىلدەرى قىزمەت اتقارۋدا. بارلىعى دا تەك قانا ەل بىرلىگىن ساقتاۋ ماقساتىن كوزدەيدى. ال, بىزدەر, قوعامدىق بىرلەستىك مۇشەلەرى, مەملەكەتىمىزدەگى ۇلتتار دوستىعىن, بەيبىتشىلىكتى ساقتاۋدا ءوز جولىمىزدى تاڭدادىق دەپ ويلايمىن. يگى ىستەرىمىزدى قازاقستان حالقى اسسامبلەياسى اتتى بىرەگەي ينستيتۋت ارقىلى جۇزەگە اسىرۋدامىز. ەڭ باستىسى – قازاق جەرىندە تۇرىپ جاتقان سوڭ ءتۇرلى مادەنيەتتى بايلانىستىراتىن مەملەكەتتىك ءتىل – قازاق ءتىلى بولۋى ءتيىس. جاپپاي جۇمىلا مەملەكەتتىك ءتىلدى مەڭگەرۋ ءبىزدى بىرىكتىرە ءتۇسۋى ءتيىس.
ۆيتالي سۆينتسيتسكي,
«پولونيا» پولياك
ەتنومادەني بىرلەستىگىنىڭ توراعاسى.
پاۆلودار.