زادىندا ءوزى ءبىر قاراپايىم, ۇلكەنگە دە, كىشىگە دە قۇرمەتپەن قارايتىن جاندار بولادى. مۇنداي ازاماتتاردىڭ جانىنا البەتتە ادامدار ۇيىرسەك كەلەدى. مەيلى, ول قاندايدا ءبىر بيىك بەلەستەردە جۇرسە دە, ءتۋابىتتى قاراپايىمدىلىعى ولاردىڭ بولمىسىن بەكزاتتىققا جەتكىزەدى. وسىنداي جانىنا شۋاق شاشىپ جۇرەتىن ابزال جانداردىڭ قاتارىندا ادەبيەتشى عالىم, ساياساتتانۋشى, جۋرناليست باقىت رۇستەموۆ تە بار.
ءبىز ءسوز ەتكەلى وتىرعان ارىپتەسىمىز وزبەكستان رەسپۋبليكاسىندا تۋىپ-ءوسىپ, ەلىمىز تاۋەلسىزدىك العاندا اتامەكەنگە ءبىر كىرپىش بوپ قالانسام دەپ كەلگەن قانداسىمىز ەدى. سودان بەرگى ءومىرىنىڭ جيىرما جىلدان استامى مەملەكەتتىك قىزمەتتە ءوتتى. جازۋ-سىزۋدىڭ سان سالاسىنا قالام تارتىپ جۇرەتىن ول ەڭبەكتەرىن قازاق, ورىس, وزبەك تىلدەرىندە جازىپ, بۇگىندە 20-عا جۋىق كىتاپتىڭ اۆتورى اتانىپ وتىر.
ءوزىنىڭ تىنىمسىز زەرتتەۋشىلىك, جۋرناليستىك قىزمەتىنىڭ ارقاسىندا الەمنىڭ ءار قيىرىنان كوپتەگەن جاڭا دوستار تاپتى. مادەنيەت, عىلىم, ونەر جانە ادەبيەت سالاسىنداعى قايراتكەرلەرمەن كەزدەسىپ اڭگىمەلەسۋى, ونىڭ شىعارماشىلىعىن ودان ءارى بايىتا تۇسكەندەي. حالىقارالىق پۋبليتسيستيكاعا ارنالعان بىرقاتار ەڭبەكتەرى ەلىمىزدە اككرەديتاتسيالانعان شەتەلدىك ديپلوماتيالىق كورپۋس اراسىندا دا ونىڭ قارىم-قابىلەتىنىڭ قانداي ەكەنىن تانىتتى. بۇل رەتتە, ەلشىلىكتەر تاراپىنان قالامگەردىڭ شىعارماشىلىعىنا بايلانىستى ءتۇرلى مادەني شارالار وتكىزۋ جونىندە دە ۇسىنىستار ءتۇستى. ونىڭ ءتۇرلى شەتەلدىك باق-تاردا ماقالالارى جاريالانسا, قالامگەردىڭ مۇنداعى نەگىزگى ماقسات-ويى وزگە جۇرتتىڭ وتانىمىز قازاقستان مەن ەڭبەكسۇيگىش حالقىمىز جايلى بارىنشا مولىراق بىلە تۇسسە دەگەن ۇستانىمعا سايادى.
«دوستىق ءۇيى» اتانعان باقىت تولەگەن ۇلىنىڭ شاڭىراعى بەرەكە مەن شاتتىققا, قايماعى بۇزىلماعان قازاقى تاربيەگە تۇنعان. ونىڭ دالەلى ءوسىرىپ وتىرعان التىن اسىقتاي ۇل- قىزدارى. «بۇل وتباسىندا اكەگە دەگەن قۇرمەتتىڭ زور ەكەندىگىن بايقادىم. وسىنىڭ ءبارى باقىتتىڭ بەرگەن تاجىريبەسىنىڭ بەلگىسى بولسا كەرەك», دەيدى كۋبا ەلشىسى كارلوس ۆالدەس دە لا كونسەپسيون.
ءوزىنىڭ وتانعا دەگەن ءسۇيىسپەنشىلىگىنىڭ ءبىر كورىنىسىن اۆتور بىلاي دەپ ەسكە الادى. «تاشكەنت ۋنيۆەرسيتەتىنە وقۋعا كەلىسىلىپ, شەشىلىپ قويعان جەرىمنەن «ەلىمنىڭ ۋچيليششەسى مەن تەحنيكۋمىنا تۇسەمىن» دەپ تاريحي وتانىما ورالۋعا اسىققام. تاشكەنتتە سۋۆوروۆ مەكتەبىندە (5-6-7 سىنىپتاردا) وقىپ جۇرگەن كەزىمدە بىرنەشە اسكەري پارادتارعا قاتىسقانىم بار-دى. جاس اسكەري بارابانشىلار مەرەكەلىك شەرۋدى اشاتىن. سونداي پارادتىڭ بىرىندە ءبىزدىڭ قۇرام ساپ تۇزەپ ءوتىپ بولعان سوڭ سول كەزدەگى وزبەكستان رەسپۋبليكاسىنىڭ باسشىسى شاراف راشيدوۆ مىنبەرگە شاقىرتىپ الىپ ارقامىزدان قاعىپ, بەتىمىزدەن ءسۇيدى. سونداي-اق, بارلىعىمىزعا كەلەشەكتە جاقسى ازامات بولۋىمىزعا تىلەك بىلدىرگەن ول سەندەردى بولاشاقتا كوپ جاقسىلىقتار كۇتىپ تۇر دەدى. وسىدان كەيىن وزبەكستان باسشىسى بارىمىزدەن: «ساباقتا ۇلگەرىمدەرىڭ جاقسى ما؟ تارتىپتەرىڭ دە جاقسى ەكەنىن كورىپ تۇرمىن», – دەدى ك ۇلىپ. مەنەن سۇراعان كەزدە ءوز انا تىلىمدە «جاقسى» دەپ جاۋاپ بەردىم. ول كىسى مەنىڭ قازاق ەكەنىمدى ءبىلىپ: «دۇرىس, ءوز ءتىلىڭدى بىلگەنىڭ جاقسى, قاي تىلدە وقيسىڭ؟» دەدى. مەن: «ورىس تىلىندە وقيمىن, بىراق وزبەك تىلىندە بىزگە ءدارىس بەرەدى, سوندىقتان وزبەكشە وقۋدى دا, جازۋدى دا جاقسى بىلەمىن», دەدىم. مەنىڭ اسكەري ەكپىنمەن جىگەرلى تۇردە ناقپا-ناق بەرگەن جاۋاپتارىما شاراف اكا تىپتەن ريزا بولدى. ويتكەنى, سول روتاداعى ەڭ بويى كىشكەنتايى دا جانە جالعىز قازاق تا مەن ەدىم...».
قالامىن ۇشتاۋعا ءبىرجولا كىرىسكەن ب.رۇستەموۆتىڭ جەتپىسىنشى جىلداردىڭ ورتاسىن الا بەرە ستۋدەنتتىك شاقتارىندا جاڭا سازگەرلىك قىرى اشىلدى. اقىن ءماريام حاكىمجانوۆانىڭ «بالالىق شاق, باقىتتى شاق» دەگەن ولەڭىنە ءان شىعارىپ, ول سول كەزدەرى اقىن مۇزافار الىمباەۆ رەداكتورلىق ەتكەن «بالدىرعان» جۋرنالىندا جاريالانادى. سوندا ءماريام اپانىڭ ءان جازىلعان نوتانىڭ بەتىنە: «وسى ولەڭنىڭ كەيىپكەرى دە ءوزىڭ سياقتىسىڭ. قاناتىڭ تالماسىن, سامعاي بەر!» دەپ قولتاڭبا بەرگەن ەكەن.
«كەيىنگى جاس بۋىنعا رۋحاني-مادەني تاربيە بەرۋگە باسا كوڭىل بولەتىن باقىت ىزگىلىك پەن كىشىپەيىلدىلىكتىڭ اسىل جىبىنەن اتتاپ وتكەن جان ەمەس. ناعىز ازاماتتىق-پاتريوتتىق رۋحتا ءومىر ءسۇرۋدىڭ ۇلگىسىن وسى ازاماتتان كورۋگە بولادى. مەملەكەتتىك قىزمەتتە جۇرگەن كەزدەرىندە ىسكەرلىگىمەن كوزگە ءتۇسىپ, ابىرويلى ەڭبەك ەتتى. پرەزيدەنت اكىمشىلىگى بولىمدەرىندە سەكتور مەڭگەرۋشىسى بولىپ قىزمەت اتقارعان كەزدەرىندە دە وسى قالپىنان تايعان جوق. بۇگىندە دە سول اقجارقىن, قاراپايىم, مادەنيەتتى قالپىندا. قالامىن جانىنا سەرىك ەتىپ, وتانشىلدىق رۋحتاعى ءوزىن تولعاندىرعان تاقىرىپتاردى كورۋگە اسىعاتىن ارىپتەسىمىز باقىت تولەگەن ۇلىنان وقىرماندارى ءالى دە سۇبەلى دۇنيەلەر كۇتەدى.
ءابدىراحمان قىدىربەك,
«ەگەمەن قازاقستان».
استانا.