Amanat پارتياسىنىڭ ءباسپاسوز ورتالىعىندا وتكەن ءباسپاسوز ءماسليحاتىندا پارتيانىڭ ءبىلىم بەرۋ سالاسىنداعى سايلاۋالدى ۋادەلەرى قالاي ورىندالىپ جاتقانى جونىندە ايتىلىپ, ناقتى مالىمەتتەر بەرىلدى.
پارتيا جانىنداعى ءبىلىم بەرۋ جانە دەنساۋلىق ساقتاۋ ماسەلەلەرى جونىندەگى رەسپۋبليكالىق قوعامدىق كەڭەستىڭ توراعاسى جۇلدىز سۇلەيمەنوۆا سايلاۋالدى باعدارلامانى ىسكە اسىرۋ اياسىندا 2022 جىلى 214,5 مىڭ ورىندىق 225 جاڭا مەكتەپتى پايدالانۋعا بەرۋ جوسپارلانعانىن حابارلادى.
«مەكتەپتەردىڭ جالپى سانىنىڭ 138-ءى ماقساتتى قۇرىلىس ەسەبىنەن سالىنادى. قالعان 61 مەكتەپ – جەكە ينۆەستيتسيا ەسەبىنەن تۇرعىزىلادى. بۇل رەتتە جاڭا وقۋ جىلىنىڭ قارساڭىندا 37 مىڭعا جۋىق ورىنعا نەگىزدەلگەن 81 جاڭا مەكتەپ اشىلۋعا دايىن بولۋى ءتيىس. اكىمدىكتەر ۇسىنعان مالىمەتكە جانە جەكە ينۆەستورلارمەن الدىن الا جاسالعان شارتتارعا سايكەس بيىل قىركۇيەك ايىندا 41 مەملەكەتتىك جانە 40 جەكەمەنشىك مەكتەپ پايدالانۋعا بەرىلەدى دەپ جوسپارلانىپ وتىر», دەپ حابارلادى ءماجىلىس دەپۋتاتى.
بىلتىر پارتيانىڭ سايلاۋالدى باعدارلاماسىن جۇزەگە اسىرۋ اياسىندا 160 مىڭنان استام وقۋشىعا ارنالعان 277 جاڭا مەكتەپ اشىلدى.
سونىمەن قاتار پارتيا شاعىن قالالارداعى, اۋدان ورتالىقتارى مەن اۋىلدارداعى مەكتەپتەردى جاڭعىرتۋ بويىنشا اۋقىمدى جۇمىس جۇرگىزۋدە. دەپۋتاتتىڭ ايتۋىنشا, سايلاۋالدى باعدارلامانى ورىنداۋ اياسىندا جىل سايىن مىڭعا جۋىق مەكتەپتىڭ جاعدايىن جاقسارتۋ جوسپارلانعان.
«بۇگىندە 2021-2025 جىلدارعا ارنالعان جول كارتاسى بەكىتىلدى. سوعان سايكەس بيىل –1 003 جانە الداعى جىلدارى 994 مەكتەپتى جاڭعىرتۋ جوسپارلانعان. سونىڭ ناتيجەسىندە كوپ مەكتەپ كۇردەلى نەمەسە ءىشىنارا جوندەۋدەن ءوتىپ, جاڭا جيھازدار الىنىپ, پاندىك كابينەتتەر اشىلادى. سونىمەن قاتار مەكتەپ اسحانالارى مەن كىتاپحانالارى جاڭارتىلادى. ماسەلەن, 900-گە جۋىق مەكتەپ كىتاپحانالارىندا ماتەريالدىق-تەحنيكالىق جابدىقتاۋدى جاقسارتۋ جانە قوردى كوركەم ادەبيەتپەن تولىقتىرۋ جوسپارلانۋدا. ءوز كەزەگىندە, 450 اسحاناعا جيھاز, ءاسۇي تەحنيكاسى مەن جابدىقتار ساتىپ الىنادى. سونداي-اق تاماقتانۋ زالدارى جوندەلەدى. شاعىن قالالار مەن اۋىلداردا وقۋشىلاردىڭ مەكتەپ ىشىندەگى جانە ونىڭ اۋماعىنداعى قاۋىپسىزدىگىن قامتاماسىز ەتۋ ماسەلەسى وزەكتىلىگىن جويعان جوق. سوندىقتان قازىرگى ۋاقىتتا 500-گە جۋىق مەكتەپتە بەينەباقىلاۋدى, دابىل تۇيمەلەرىن, تۋرنيكەتتەر مەن كۇزەت جۇيەسىن ىسكە قوسۋ جۇمىسى جۇرگىزىلۋدە», دەپ اتاپ ءوتتى جۇلدىز سۇلەيمەنوۆا.
ايتا كەتۋ كەرەك, جاڭا وقۋ جىلىندا 3,6 ملن بالا مەن 384 مىڭ پەداگوگتى قامتيتىن 7 700-گە جۋىق مەكتەپ اشىلادى. بۇل تۋرالى وقۋ-اعارتۋ ءبىرىنشى ۆيتسە-ءمينيسترى شولپان كارينوۆا پارتيا الاڭىندا وتكەن ءباسپاسوز ءماسليحاتىندا حابارلادى. سونداي-اق شولپان تاڭاتقىزى الداعى وقۋ جىلىندا وقۋشىلاردى قانداي جاڭاشىلدىقتار كۇتىپ تۇرعانىن باياندادى.
«جاڭا وقۋ جىلىندا بالالار 31 مامىرعا دەيىن وقيتىن بولادى. سونىمەن قاتار مەكتەپ باعدارلاماسىنا بىرقاتار وزگەرىس ەنگىزىلدى. ماسەلەن, اعىلشىن ءتىلى ەندى ءبىرىنشى ەمەس, ءۇشىنشى سىنىپتان باستاپ وقىتىلادى. ال 1-سىنىپقا «ەڭبەككە باۋلۋ» جانە «بەينەلەۋ ونەرى» پاندەرى ەنگىزىلدى. بۇل قادام وقۋشىلاردىڭ ەرتە كاسىبي باعدار جاساۋىن قامتاماسىز ەتۋگە باعىتتالعان. جاڭاشىلدىقتار وقۋشىلاردىڭ ءبىلىم ساپاسىن جاقسارتۋعا جانە قوسىمشا ماشىقتاردى دارىتۋعا نەگىزدەلدى», دەدى شولپان تاڭاتقىزى.
سونىمەن قاتار وقۋ-اعارتۋ ءبىرىنشى ۆيتسە-ءمينيسترى اكىمدىكتەرمەن بىرلەسىپ شەشىلۋگە ءتيىس ماسەلەلەرگە نازار اۋداردى. سونىڭ ءبىرى – كەيبىر وڭىرلەردەگى كۇردەلى جوندەۋ جۇمىسىنىڭ مەرزىمىنەن كەشىگۋى بولىپ وتىر.
«بۇگىندە 261 مەكتەپتە كۇردەلى جوندەۋ جۇمىستارى جۇرگىزىلۋدە. 1 قىركۇيەككە دەيىن 213 مەكتەپتىڭ جوندەۋ جۇمىسىن اياقتاۋ جوسپارلانۋدا. الايدا 12 وڭىردە, اسىرەسە باتىس قازاقستان وبلىسىندا – 12, الماتى وبلىسىندا – 5, تۇركىستان وبلىسىندا – 4, جەتىسۋ وبلىسىندا – 4, اتىراۋ وبلىسىندا 3 مەكتەپتىڭ كۇردەلى جوندەۋ جۇمىسى مەرزىمىنەن كەشىگۋى مۇمكىن. بۇل مەكتەپتەردە جوندەۋ جۇمىستارى جىل سوڭىنا دەيىن جالعاسادى. وسىعان بايلانىستى, اكىمدىكتەر 48 مەكتەپتە وقۋ جۇمىسىن ۇيىمداستىرۋ ماقساتىندا جوندەۋ جۇمىستارى اياقتالعانعا دەيىن ساباق وتكىزىلەتىن ورىنداردى انىقتاپ, وقۋشىلاردىڭ مەكتەپتەگى قاۋىپسىزدىگىن قامتاماسىز ەتۋگە ءتيىس», دەدى ۆيتسە-مينيستر.
جاڭا وقۋ جىلىندا ەل اۋماعىنداعى 900 مىڭعا جۋىق بالا ءبىر رەتتىك تەگىن تاماقپەن قامتاماسىز ەتىلەتىنىن اتاپ وتكەن ءجون. ال مەكتەپكە اپارۋدى قاجەت ەتەتىن بالالار ءۇشىن بيىل 515 مەكتەپ اۆتوبۋسى ساتىپ الىندى. ايتا كەتەيىك, «مەكتەپكە جول» قايىرىمدىلىق اكتسياسى اياسىندا 500 مىڭعا جۋىق بالا مەكتەپكە دايارلانۋ ءۇشىن قاجەت كومەك الىپ جاتىر. ءوز كەزەگىندە, Amanat پارتياسى «بالانى مەكتەپكە دايارلايىق!» اكتسياسىن باستادى. ەستەرىڭىزگە سالا كەتەيىك, اتالعان اكتسيا اياسىندا بۇكىل ەل بويىنشا 30 مىڭنان استام بالا اماناتتىقتاردان جاڭا وقۋ جىلىنا ارنالعان كەرەك-جاراقتار الادى. ياعني بالدىرعانداردىڭ مەكتەپ فورماسى, وقۋلىقتار مەن كەڭسە زاتتارى بار سومكەلەر بەرىلەدى.