بالا دەسە بارلىعىنان باس تارتاتىن باۋىرمال اتا-انا ءۇشىن ونىڭ الاڭسىز اسىر سالعانىنان ارتىق باقىت جوق. امان ساۋ جۇرگەنى, ويناپ كۇلگەنى جۇزدەرىنە كۇلكى, جۇرەكتەرىنە قۋانىش سىيلايدى. تامىز ايى تۋا سالا اتا-انالار قاۋىمى ابىر-سابىر بولادى. جازعى دەمالىستا جان-جاققا كەتكەن بالالارى ورالىپ, وقۋعا دايىندالىپ, مەكتەپ قۇرالدارى مەن كيىم-كەشەك الاتىن سابىلىسار ءسات.
وسىعان وراي اتا-انالار مەن بالالار ءۇشىن ەلوردا اكىمدىگىنىڭ قولداۋىمەن «QazExpoCongress» ۇلتتىق كومپانياسىنىڭ ۇيىمداستىرۋىمەن EXPO حالىقارالىق كورمە ورتالىعىنىڭ الاڭىندا بالالار تاۋارلارىنىڭ «KIDS EXPO. بالالار الەمى» اتتى ءبىرىنشى قالالىق كورمە-جارمەڭكەسى ءوتتى. پرەمەر-ءمينيستردىڭ ورىنباسارى ەرالى توعجانوۆ بالالار تاۋارلارىنىڭ العاشقى «Kids EXPO. بالالار الەمى» كورمە-جارمەڭكەسىنە بارىپ, كورمە-جارمەڭكەدە ۇسىنىلعان تاۋارلاردىڭ اسسورتيمەنتىمەن جانە قۇنىمەن تانىستى.
ۆيتسە-پرەمەر مۇنداي كورمە-جارمەڭكەلەر اتا-انالارعا بالالارىن الداعى وقۋ جىلىنا دايىنداۋ ءۇشىن وتە ىڭعايلى ەكەنىن, ۇسىنىلعان اسسورتيمەنت قولجەتىمدى باعامەن ساتىلىپ جاتقانىن اتاپ ءوتتى. 30-عا جۋىق كومپانيا ءوز ونىمدەرىن 30%-عا دەيىن تومەن باعامەن ۇسىندى.
ەرالى توعجانوۆ كورمەمەن تانىسۋ بارىسىندا مەملەكەتتىك ورگاندارعا بارلىق وڭىردە وسىنداي فورماتتا جارمەڭكەلەر ۇيىمداستىرۋدى تاپسىردى. ەكى كۇندە بالالار تاۋارلارىنىڭ «KIDS EXPO. بالالار الەمى» جارمەڭكەسىنە كەلۋشىلەر سانى 20 مىڭنان استى. ۇيىمداستىرۋشىلار جارمەڭكەنى جىل سايىن وتكىزۋدى جوسپارلاپ وتىر.
«KIDS EXPO. بالالار الەمى» جارمەڭكەسى EXPO حالىقارالىق كورمە ورتالىعىندا 17-21 تامىز ارالىعىندا ساعات 12:00-دەن 21:00-گە دەيىن جالعاستى. بۇل كىتاپ, كەڭسە, توقىما, ءبىلىم بەرۋ جانە ويىن-ساۋىق يندۋسترياسى, بالالار مەن ولاردىڭ اتا-انالارىنا ارنالعان تاۋارلار مەن قىزمەتتەر وكىلدەرىن ءبىر الاڭدا بىرىكتىرۋگە مۇمكىندىك بەرگەن العاشقى ءىرى قالالىق جوبا. كورمەنىڭ نەگىزگى باعىتى – ءبىلىم بەرۋ, حوببي, دەمالىس, بالالار مادەنيەتى (جۋرنالدار, كىتاپتار جانە مۋزىكا), ويىندار الەمى (ويىنشىقتار, ويىندار جانە قولونەر), بالالار ءسانى مەن كيىمدەرى, كەرەك-جاراقتار مەن اكسەسسۋارلار جانە تاعى باسقالار. 5 كۇن ىشىندە جەرگىلىكتى تاۋار وندىرۋشىلەردىڭ, كومپانيالار مەن ءىرى برەندتەردىڭ 100-گە جۋىق قاتىسۋشىسى ءوز ونىمدەرىن ەڭ قولايلى باعامەن ۇسىندى. جارمەڭكەگە Marwin, Abdi, FasTracKids, Utaria, CAES, روبوتەك, Foliant, «الماتى كىتاپ» باسىلىمدارى جانە باسقا دا ءىرى برەندتەر قاتىستى.
«بيىل ءبىرىنشى رەت وتكەنىنە قاراماستان جارمەڭكە كەلۋشىلەر تاراپىنان سۇرانىسقا يە بولىپ جاتىر. وسىنداعى 93 كاسىپكەر كومپانيانىڭ 28-ءى الەۋمەتتىك باعا ورناتۋعا كەلىسىپ, نارىقتاعى باعادان 10-20 پايىزعا ارزان ساتىپ وتىر. باس قالادان باستاۋ العان جارمەڭكە جۇمىسىن ودان ارى جالعاستىرۋ ءۇشىن وزگە وڭىردەگى اكىمدىكتەرمەن, كاسىپكەرلەرمەن ءتۇسىندىرۋ جۇمىستارى جۇرگىزىلۋدە. ءبىر قۋانتارلىعى, وسىنداي كورمە-جارمەڭكە وتكىزۋ ءۇشىن كۇنى كەشە ەلورداداعى «اسەم» ساۋدا ءۇيىنىڭ اكىمشىلىگى حابارلاسىپ, جابىق عيماراتتاعى 320 شارشى مەتر الاڭدى قازان ايىنا دەيىن تەگىن بەرەتىندەرىن جەتكىزدى. وسى بويىنشا كاسىپكەرلەرمەن سويلەسىپ جاتىرمىز», دەدى نۇر-سۇلتان قالالىق ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ەركەعالي كاربوزوۆ.
جارمەڭكە اشىلعان كۇنى كورمە ورتالىعىنىڭ الاڭىندا «استانا» ەسترادالىق-سيمفونيالىق وركەسترىنىڭ, بي ۇجىمدارىنىڭ, «ۆايناح» ءانسامبلىنىڭ ونەر كورسەتۋى, دەرەكسىز كەسكىندەمە, ۇلتتىق ويىندار (اسىق اتۋ, توعىزقۇمالاق) بويىنشا شەبەرلىك سىنىپتارى, سونداي-اق قازاقستان قۇراماسىنىڭ ويىنشىسى جانە «استانا» باسكەتبول كلۋبىنىڭ كاسىبي شەبەرلىك فورۆاردى رۋسلان ايتقاليدىڭ باسكەتبولدان شەبەرلىك سىنىبى ءوتتى.
ء«بىزدىڭ كومپانيا قازاقستان نارىعىندا 13 جىلدان بەرى جۇمىس ىستەيدى. نەگىزگى جۇمىسىمىز – ءبىلىم وردالارىنا يننوۆاتسيالىق شەشىم ۇسىنۋ. ول جەردە بالاباقشادان باستاپ مەكتەپتەرگە دەيىن قامتىلادى. ءبىزدىڭ «Intellectum» دەگەن ويىندارىمىز بار. بۇل بالانىڭ كرەاتيۆتى ويلانۋىنا, توپپەن جۇمىس ىستەي بىلۋىنە, تۇستەردى دالمە-ءدال اجىراتا بىلۋىنە كوپ كومەكتەسەدى. بالالاردىڭ لوگيكاسىن دامىتاتىن بالاباقشا جانە باستاۋىش سىنىپ بالالارىنا ارنالعان ويىندار جيىنتىعى تولىقتاي اۆتورلىق مەتوديكامەن جۇمىس ىستەيدى. قازىرگى تاڭدا, قازاقستان بويىنشا 300-گە جۋىق بالاباقشاعا ءبىزدىڭ مەتوديكامىز ەنگىزىلگەن. سونىمەن قاتار روبوتتەحنيكاعا بايلانىستى بىرنەشە جوبامىز بار. ءبىز وسىنداي كورمە-جارمەڭكەگە قاتىسقانىمىزعا قۋانىشتىمىز, ءارى قاراي جالعاسىن تابا بەرسە ەكەن», دەيدى PINE حولدينگ كومپانياسىنىڭ كورپوراتيۆتىك مەنەدجەرى ارمان بايگاسكين.
جالپى جارمەڭكەدە 18 اقپاراتتىق, 22 مادەني جانە 22 سپورتتىق ءىس-شارا, سونداي-اق 20 ART شەبەرلىك ساباعىن وتكىزدى. جيىنى 80-نەن استام ءىس-شارا وتكىزىلدى.