جۋىردا وڭىردەگى ەكونوميكالىق ءوسىم رەزەرۆتەرى بويىنشا قالالار مەن اۋدانداردىڭ اكىمدەرى ەسەپ بەردى. ەسەپتى تىڭداۋ بارىسىندا وبلىس ەكونوميكاسى ءوسىمىنىڭ ونەركاسىپ, اگروونەركاسىپتىك كەشەن, شاعىن جانە ورتا كاسىپكەرلىك, تۋريزم سىندى نەگىزگى قورلارىنا نازار اۋدارىلدى.
جۇرگىزىلگەن ساراپتاماعا سايكەس, سوڭعى ۋاقىتتا نەگىزگى ونەركاسىپ ونىمدەرىنە باعا مەن سۇرانىستىڭ تومەندەۋ قاۋپى پايدا بولدى. ماسەلەن, لوندوندىق بيرجادا ەكسپورتقا شىعارىلاتىن مەتالل قۇنى ورتا ەسەپپەن 13 پايىزعا دەيىن تومەندەدى. قولايسىز بولجامدارعا سۇيەنسەك, ونەركاسىپتىك كاسىپورىندارداعى ءوندىرىس كولەمى 72 ميلليارد تەڭگەگە دەيىن, سالىق كولەمى 5 ميلليارد تەڭگەگە دەيىن قىسقارۋى مۇمكىن. ودان وزگە 13 مىڭنان استام ادام جۇمىستان بوساۋى كادىك. تىعىرىقتان شىعار جول ىزدەگەن وبلىس اكىمدىگى ەكونوميكالىق ءوسىم قورلارىن قامتاماسىز ەتۋ تەتىكتەرىن قاراستىرىپ وتىر.
ونەركاسىپ ءوسىمىن ارتتىرۋ ءىرى ينۆەستيتسيالىق جوبالاردى جۇزەگە اسىرۋمەن تىكەلەي بايلانىستى بولۋدا. «ازيا اۆتو» اق اۆتوبولشەكتەر ءوندىرىسى تەحنوپاركى جانە جىلىنا 120 مىڭ ماشينا شىعارۋ قۋاتىنا يە اۆتوزاۋىتى, اقتوعاي تاۋ-كەن بايىتۋ كومبيناتى, «قازنيكەل» جشس, كوبالت-نيكەل كەن وڭدەۋ جانە بايىتۋ قۇرىلىستارى اتالعان ءىرى ينۆەستيتسيالار ساناتىنا جاتادى.
ەكونوميكالىق ءوسىمدى قامتاماسىز ەتۋدىڭ تاعى ءبىر شىنايى تارماعى – ءوندىرىستى ءارتاراپتاندىرۋ. يندۋستريالاندىرۋدىڭ ەكىنشى بەسجىلدىق كەزەڭىندە وبلىستا وسىعان دەيىن باستالىپ كەتكەن جانە جاڭادان قولعا الىنعان جوبالاردى جۇزەگە اسىرۋ جالعاسىن تابادى. ايتالىق, 2014 جىلى 17,5 ميلليارد تەڭگە كولەمىندە 13 ينۆەستيتسيالىق جوبا جوسپارلانىپ وتىر.
اۋىل شارۋاشىلىعىن دامىتۋ سالاسىندا جاڭا جانە سۋدى ۇنەمدەۋ تەحنولوگياسىن قولدانۋعا, پايدالانىلماي جاتقان شابىندىقتاردى يگەرۋگە تاپسىرما بەرىلدى. بۇل رەتتە سۋارمالى جەرلەردى 9 مىڭ گەكتارعا ارتتىرۋ جوسپارلانىپ وتىر. ءمۇيىزدى ءىرى قارا ەتىن ەكسپورتتاۋ الەۋەتىن دامىتۋ, «سىباعا», «جايلاۋ» باعدارلامالارى جالعاسا بەرمەك. وڭىرارالىق جانە سالالىق كووپەراتسيالاردىڭ ەسەبىنەن, سونداي-اق قازاقستاندىق ۇلەستىڭ ءوسىمى ارقىلى ءىس بارىسىنداعى كاسىپورىنداردىڭ جۇگىن ارتتىرۋ جوسپارلاندى.
تاۋ-كەن ءوندىرۋ سالاسىنىڭ الەۋەتىن كوتەرۋ ءۇشىن قوسىمشا جەكە ينۆەستيتسيالار تارتا وتىرىپ, گەولوگيالىق بارلاۋ جۇمىستارىن جۇرگىزۋ قاجەت. بۇل – ونەركاسىپ ونىمدەرىنىڭ كولەمىن جىلىنا 5-10 پايىزعا ۇلعايتۋعا مۇمكىندىك بەرەدى.
ىشكى قوردىڭ تاعى ءبىر ءتۇرى رەتىندە ءىرى كاسىپورىنداردىڭ ماڭايىنداعى شاعىن جانە ورتا كاسىپكەرلىكتى ايتۋعا بولادى. وبلىستا مەملەكەتارالىق جانە وڭىرارالىق ينتەگراتسيا شەڭبەرىندە وتكىزىلگەن ءىس-شارالار ءوڭىر ەكونوميكاسى ءۇشىن عانا ەمەس, ەلىمىز بويىنشا دا جاڭا كوكجيەكتەر اشتى. الماتى, قاراعاندى, پاۆلودار وبلىستارىمەن جانە رەسەي فەدەراتسياسىنىڭ التاي ايماعىمەن ەكىجاقتى قارىم-قاتىناستار نىعايىپ كەلەدى. شىعىس قازاقستان وبلىسىنىڭ ءتيىمدى ورنالاسۋى كولىكتىك-لوگيستيكالىق جۇيە قۇرۋعا مۇمكىندىك بەرەدى.
تىڭداۋ بارىسىندا مونوقالالار مەن تىرەك اۋىلداردى ودان ءارى دامىتۋ قاجەتتىلىگى ايتىلدى. مونوقالالار باعدارلاماسىن جۇزەگە اسىرۋدى باستاعان ءوڭىر رەتىندە قالالاردىڭ دامۋىن تومەندەتۋگە بولمايدى.
اۋداندار ءوڭىردىڭ تۋريستىك الەۋەتىن دامىتۋ مىندەتتەمەسىن الدى. ءوڭىر باسشىسىنىڭ ايتۋىنشا, تۋريزم بيۋدجەت كىرىسىنىڭ نەگىزگى كوزى بولۋى كەرەك. اسىرەسە, ەكولوگيالىق, مەديتسينالىق جانە اۋىلدىق تۋريزمگە نازار اۋدارىلۋى ءتيىس. بۇل – تۋريستەر سانىن 3 ەسەگە كوبەيتۋگە, قىزمەت كولەمىنىڭ 2,5 ەسەگە ارتۋىنا مۇمكىندىك بەرەدى.
جالپى العاندا, كۇتىلگەن ناتيجەلەر ىشىندە ايماقتىق جالپى ءونىمنىڭ ءوسىمىن 7,9 پايىزعا, ونەركاسىپتىك ءوندىرىس ءونىمىن 433,9 ميلليارد تەڭگەگە ءوسىرۋ, سونداي-اق 35 مىڭنان استام جاڭا جۇمىس ورنىن قۇرۋ كوزدەلگەن.
دۋمان اناش,
«ەگەمەن قازاقستان».
وسكەمەن.