فينليانديا پرەمەر-ءمينيسترى ساننا ءماريننىڭ باسى داۋعا قالدى. بۇل جولى ۇكىمەت باسشىسىنىڭ كوڭىلدى كەشتە بيلەگەن وقيعاسىن فين قوعامى قىزۋ تالقىلاپ جاتىر. كوپشىلىك ونى ەسىرتكى قولدانعان دەپ ايىپتاعان بولاتىن. مۇنى جوققا شىعارۋ ءۇشىن ساننا حانىمنىڭ تەست تاپسىرۋىنا تۋرا كەلدى.
وتكەن اپتادا الەۋمەتتىك جەلىلەردە فينليانديا پرەمەر-ءمينيسترىنىڭ كەشتە ءبيدىڭ ءتۇبىن ءتۇسىرىپ جۇرگەن ۆيدەوسى جاريالانعان. فينليانديانىڭ Iltalehti گازەتىنىڭ حابارلاۋىنشا, پرەمەر-مينيستر بىرنەشە شەنەۋنىكپەن, سونىڭ ىشىندە دەپۋتات يلماري نۋرمينەنمەن جانە مەديا جۇرگىزۋشى تينني ۆيكسترەممەن بىرگە تويلاتقان.
جەرگىلىكتى بۇقارالىق اقپارات قۇرالدارى Instagram Stories-تە سالىنعان بىرنەشە ۆيدەونى ساراپتاي كەلە, س.ءماريننىڭ بىرنەشە دوسىمەن بىرگە بيلەگەنى, قورشاعان ادامداردىڭ كوكاين تۋرالى ايعايلاعانى ەستىلگەنىن جازدى.
ۇكىمەت باسشىسىنىڭ كواليتسياداعى سەرىكتەسى, ورتالىق پارتياسىنىڭ دەپۋتاتى ميككو كارنا پرەمەر-ءمينيستردى ەسىرتكىگە تەست تاپسىرۋعا جانە ونىڭ ناتيجەلەرىن كوپشىلىككە جاريالاۋعا شاقىردى. «حالىققا مۇنى ءوز پرەمەر-مينيسترىنەن كۇتۋگە قۇقىعى بار», دەپ جازدى م.كارنا تۋيتتەردەگى پاراقشاسىندا.
ۆيدەولار جەلىگە تاراپ, بۇقارالىق اقپارات قۇرالدارى وقيعاعا قاتىستى تىڭ مالىمەتتەردى جاريالاعاننان كەيىن فين قوعامى گۋ ەتە ءتۇستى. كوپشىلىك ۇكىمەت باسشىسىنىڭ ارەكەتىن ايىپتادى. ءتىپتى ونى وتستاۆكاعا كەتۋگە شاقىرعاندار دا تابىلدى.
كوپ ۇزاماي-اق, ءبىر كۇننەن سوڭ س.مارين ءباسپاسوز ءماسليحاتىن وتكىزىپ, ەسىرتكى قولدانعانىن جوققا شىعارىپ, جاسىراتىن ەشتەڭەسى جوق ەكەنىن مالىمدەدى. «مەن بيلەدىم, ءان ايتتىم, تويلادىم, زاڭعا قارسى ەشتەڭە جاساعانىم جوق», دەدى پرەمەر-مينيستر. سونداي-اق كوپ ىشپەيتىنىن العا تارتىپ, ۆيدەونى تاراتقان ادامعا رەنىشىن ءبىلدىردى. «مەن جەكە كەشتە بولعاندىقتان, ۆيدەولار جاريالانبايتىنىنا سەنىمدى ەدىم. ونىڭ تاراپ كەتكەنىنە وكىنەمىن», دەدى س.مارين.
سكانديناۆيا ەلىندەگى داۋ مۇنىمەن توقتاعان جوق. جۇما كۇنى ۇكىمەت باسشىسىنىڭ ەسىرتكى قابىلداپ-قابىلداماعانى جونىندە تەست تاپسىرۋىنا تۋرا كەلدى. ءسويتىپ, ونى تاعى دا كوپشىلىككە حاباردار ەتتى.
«مەن بۇگىن ەسىرتكىگە تەست تاپسىردىم, ونىڭ ناتيجەلەرى شامامەن ءبىر اپتادان كەيىن شىعادى. ءتىپتى ءجاسوسپىرىم كەزىمدە دە ەسىرتكىنىڭ ەشبىر ءتۇرىن پايدالانباعانمىن. دەگەنمەن سەنىمدى بولۋ ءۇشىن سىناقتان ءوتتىم», دەدى س.مارين جۇمادا تۇستەن كەيىن كەسارانتا رەسمي رەزيدەنتسياسىندا وتكەن ءباسپاسوز ءماسليحاتىندا.
جيىن بارىسىندا جۋرناليستەر كەش كەزىندە باسقالاردىڭ ەسىرتكى قولدانعانى جونىندە سۇراعان. پرەمەر-مينيستر بۇعان ناقتى ەشتەڭە ايتا المايتىنىن, بىراق ءوز كوزىمەن ەشتەڭە كورمەگەنىن جەتكىزدى. «ارينە, مەن كورمەگەن نارسەنى ايتا المايمىن. بىرەۋدىڭ قولدانعانى جونىندە حابارىم جوق. بەينەجازبادا كورسەتىلگەن تۇندە ەشكىمنىڭ ەسىرتكى قولدانعانىن بايقامادىم», دەدى ول.
بۇل جولى دا جۋرناليستەر ۇكىمەت باسشىسىنا سۇراقتى قارشا بوراتتى. تىلشىلەردىڭ ءبىرى «رەسەيدىڭ ۋكرايناعا باسىپ كىرىپ, الەم الاڭداپ وتىرعاندا فينليانديا باسشىسىنىڭ توي تويلاپ جۇرگەنى قانشالىقتى ورىندى؟» دەگەن ساۋال تاستادى. بۇل سۇراققا س.مارين ارقاشان جۇمىسقا ءازىر ەكەنىن, كەڭسەسى كۇنى-ءتۇنى جۇمىس ىستەيتىنىن جەتكىزدى.
«مەملەكەتتىك كەڭسە ارقاشان جۇمىس ىستەيدى جانە ءتۇن ورتاسىندا وتىرىستارعا شاقىرىلمايدى. ەگەر قاجەت بولسا, مەن كەز كەلگەن ۋاقىتتا جۇمىس ىستەۋگە دايىنمىن», دەدى س.مارين.
فين پرەمەر-ءمينيسترى جاۋاپكەرشىلىكتى ەسكەرەتىنىنە ەكپىن بەرىپ, ءدال سول كۇنى ماڭىزدى ماسەلە كۇن تارتىبىندە تۇرماعانىنا توقتالدى. «ەگەر شەشىم قابىلداۋ ءۇشىن مەملەكەتتىك كەڭەسكە بارۋ كەرەك بولعاندا, تويلاتىپ جۇرمەس ەدىم. بىراق مۇنداي ەشتەڭە بولعان جوق», دەدى ول.
بۇدان بولەك, پرەمەر-مينيستر ازىرگە ورنىنان كەتپەيتىنىن, جاۋاپتى قىزمەتتەگى تۇلعالار ءۇشىن ءان ايتىپ, بيلەپ تۇرعاننىڭ ارتىعى جوق ەكەنىنە توقتالدى.
«مەن بولاشاقتا Ruisrock نەمەسە Flow فەستيۆالىنە جانە باسقا دا ءىس-شارالارعا, ءتىپتى كونتسەرتتەرگە بارامىن دەپ ۇمىتتەنەمىن. ادام بولىپ قالامىز دەپ سەنەمىن», دەدى ول.
ايتا كەتەرلىگى, فين قوعامى بيلىك تىزگىنىن ۇستاعانداردىڭ جەكە ءومىرىن ءجىتى قاداعالاپ وتىرادى. ساننا مارين حانىمنىڭ مۇنداي بولماشى داۋعا قالعانى ءبىرىنشى رەت ەمەس. بۇعان دەيىن ونىڭ تاڭعى اسقا جۇمسايتىن شىعىنى سكانديناۆيالىق مەملەكەتتە قىزۋ تالقىلانعان ەدى.
بىلتىر جەرگىلىكتى بۇقارالىق اقپارات قۇرالدارىندا پرەمەر-ءمينيستردىڭ رەزيدەنتسياسىندا تاڭعى اسقا جۇمسالاتىن شىعىنى بىردەن ءوسىپ كەتكەنى تۋرالى مالىمەت تاراعان.
Iltalehti باسىلىمىنىڭ حابارلاۋىنشا, تەك تاڭعى اسقا ساننا مارين ايىنا 850 ەۋرو جۇمسايدى ەكەن. بۇل شامامەن 445 مىڭ تەڭگەگە جۋىق. بۇعان دەيىن رەزيدەنتسياداعى تاڭعى اس شىعىنى شامامەن ايىنا 300 ەۋرو بولعان. باسىلىم شىعىننىڭ مۇنشالىقتى ءوسىپ كەتكەنىنە تاڭعالىپ, «ساننا حانىمنىڭ ارەكەتى قانشالىقتى زاڭعا ساي؟» دەگەن ساۋال تاستايدى.
كەيىننەن Iltalehti تاراتقان اقپاراتتى پرەمەر-ءمينيستردىڭ كەڭسەسى دە راستادى. سوعان سايكەس 2020 جىلعى قاڭتاردان 2021 جىلعى مامىر ارالىعىندا رەسمي رەزيدەنتسياعا تۇنەگەندە س.ءماريندى ءبىر رەت تاماقتاندىرۋعا جۇمسالعان قاراجات 14 363 ەۋرو 20 تسەنتتى قۇراعان. وسىلايشا, ايىنا شامامەن 845 ەۋرو كەتكەن ەكەن. پرەمەر-مينيستر كەڭسەسى تاراتقان مالىمدەمەگە سۇيەنسەك, بۇل باعاعا تاڭعى اس پەن تىسكەباسار عانا ەنگەن.
س.مارين سول كەزدە زاڭ بۇزباعانىن, بيۋدجەتتىڭ ءبىر تيىنىن ارتىق جەمەگەنىن مالىمدەدى. ونىڭ سوزىنە سەنسەك, 2019 جىلى پرەمەر-مينيسترلىك مىندەتىنە كىرىسكەندە ۋادە ەتىلگەن قىزمەتتەردى عانا پايدالانعان.
ونىڭ الدىندا فينليانديانىڭ قارجى ءمينيسترى كاتري كۋلمۋني مەدياترەنينگكە قاتىسۋ ءۇشىن بيۋدجەت قاراجاتىن جۇمساعانى تالقىعا تۇسكەن سوڭ قىزمەتىنەن كەتكەن ەدى.
ءبىر قىزىعى, ەكى وقيعادا دا شاشاۋ شىققان تيىن جوق. ءبارى تيەسىلى جەرىنە جەتكەن. بىراق بيلىكتىڭ جۇمساعان ءار تيىنىنان حاباردار فينليانديا قوعامى ءۇشىن بۇل ماڭىزدى. بۇل – بىرىنشىدەن. ەكىنشىدەن, سكانديناۆيا ەلى سىبايلاس جەمقورلىقتى جەڭگەن مەملەكەتتەر قاتارىندا. ونىڭ ۇستىنە, ەلدى باسقارۋعا اتسالىسىپ جۇرگەندەردىڭ كوبى – كىلەڭ جاستار. ماسەلەن, ۇكىمەت باسشىسى ساننا مارين 37 جاستا. جوعارىدا اتى اتالعان كاتري كۋلمۋني 35-تە. پرەمەر-ءمينيستردىڭ ورىنباسارى اننيكا سااريكو 39-دا, ىشكى ىستەر ءمينيسترى ماريا ويسالو 37-دە, ءبىلىم ءمينيسترى لي اندەرسسون 35 جاستا.
قوعامنىڭ وسىنداي ءجىتى قاداعالاۋىنان شىعار, سكانديناۆيالىق مەملەكەت الەمدەگى باقۋاتتى دا باقىتتى ەل سانالادى. ماسەلەن, بۇۇ ازىرلەگەن «الەمدەگى باقىت زەرتتەۋىندە» فينليانديا قاتارىنان ءتورتىنشى جىل شارتاراپتاعى «قوي ۇستىنە بوزتورعاي جۇمىرتقالاعان مەكەن» اتانىپ وتىر.