9 مامىر كۇنى قارساڭىندا اۋدان ورتالىعى كوكتوبە اۋىلىندا تۇراتىن ماعاۋ سىزدىقوۆ اتامىزعا ءبىر كۇندىك ەڭبەكاقىلارىن ەسەپشوتقا اۋدارعان دارىگەرلەر, مۇعالىمدەر, كاسىپكەرلەر, باسقا دا سالا قىزمەتكەرلەرى سىي-قۇرمەت كورسەتتى.
سەمەيدىڭ كەلمەمبەت دەگەن اۋىلىندا ومىرگە كەلگەن ماعاۋ اتامىز 1942 جىلى مايدانعا اتتانادى. ول سوعىس جىلدارى 830-شى ارتيللەريالىق پولك قاتارىندا ۋكرايناداعى ۇرىس قيمىلدارىنا قاتىسقان. سوعىستان كەيىنگى جىلدارى ۋكرايناداعى قورعانىس زاۋىتىنا جۇمىسقا الىنعان. سودان ەلگە ورالعان بەيبىت كۇندەردە ءوندىرىس سالاسىندا, اك شىعاراتىن زاۋىتتا ەڭبەك ەتەدى.
بۇگىندە بۇل كىسى ءۇبىرلى-ءشۇبىرلى ۇلكەن اۋلەتتىڭ اتاسى, 8 بالا ءسۇيىپ, 21 نەمەرە,13 شوبەرە كورىپ وتىر. كوكتوبەلىكتەر ۇلكەن-كىشىسى بار ورتالارىنداعى جالعىز قالعان سوعىس ارداگەرىنە قۇرمەت كورسەتۋدە. اۋداندىق اكىمدىك اتامىزدىڭ ۇيىنە كۇردەلى جوندەۋ جاساپ, جاڭارتىپ بەردى.
فاريدا بىقاي,
«ەگەمەن قازاقستان».
پاۆلودار وبلىسى,
ماي اۋدانى.