قر سىرتقى ىستەر مينيسترلىگى لاوستا الدانعان وتانداسىمىزعا قاتىستى مالىمدەمە جاسادى, دەپ حابارلايدى Egemen.kz قر سىرتقى ىستەر مينيسترلىگىنىڭ ءباسپاسوز قىزمەتىنە سىلتەمە جاساپ.
«بيىل 19 تامىزدا وتانداسىمىز كونسۋلمەن بايلانىسقا شىعىپ, ءوز جاعدايىن حابارلادى. قازاقستان رەسپۋبليكاسىنىڭ حانويداعى ەلشىلىگى لاوستىڭ سىرتقى ىستەر مينيسترلىگىنە ازاماتىمىزدى قۇتقارۋعا بارىنشا كومەك كورسەتۋ تۋرالى ءتيىستى نوتا جولدادى. لاوس پوليتسياسى بۇل ماسەلەمەن اينالىسىپ جاتىر, ەرتەڭ لاوستىڭ سىرتقى ىستەر جانە ىشكى ىستەر مينيسترلىگى وكىلدەرىمەن كەلىسسوزدەر وتەدى», دەلىنگەن رەسمي اقپاراتتا.
قازىرگى ۋاقىتتا قازاقستاندىقتىڭ ومىرىنە ەشقانداي قاۋىپ ءتونىپ تۇرعان جوق.
«جەرلەسىمىز ديپلوماتتارمەن جانە تۋىستارىمەن ۇنەمى بايلانىستا. ايتۋىنشا, قۇجاتتارى مەن تەلەفونىن الىپ قويماعان, تەلەفون مەن ينتەرنەت بايلانىسىن شەكتەمەگەن, سونداي-اق كۇش قولدانباعان», دەيدى ۆەدومستۆودان.
ەلىمىزدىڭ سىرتقى ىستەر مينيسترلىگىنىڭ حابارلاۋىنشا, وتانداسىمىز تايلاندقا جانە ودان ءارى مارشرۋت بويىنشا ءوز ەركىمەن بارعان.
«ازاماتشانىڭ ايتۋىنشا, ەگەر ول ءوزىنىڭ ۇشۋىنا, تۇرۋىنا جانە باسقا دا شىعىندارىنا جۇمسالعان قارجىنى قايتارسا, جۇمىس بەرۋشىلەر ونى جىبەرۋگە دايىن», دەپ تولىقتىردى مينيسترلىك.
سونداي-اق, رەسمي اقپاراتتا اتالعان ماسەلە قازاقستاننىڭ ۆەتنامداعى ەلشىلىگىنىڭ ەرەكشە باقىلاۋىندا ەكەنى ايتىلعان.
«سىرتقى ىستەر مينيسترلىگى جانە قر ۆەتنامداعى ەلشىلىگى وتانداسىمىزدىڭ ەلگە ورالۋىنا قاجەتتى كومەك كورسەتەدى. قازاقستان ءسىم ازاماتتارىنان شەتەلدە جۇمىس ىستەۋ ءۇشىن قۇجاتتار مەن كەلىسىمشارتتارعا قول قويۋعا دەيىن جانە شەتەلگە شىققانعا دەيىن ولاردى مۇقيات زەردەلەۋدى, سونداي-اق كۇتپەگەن جاعدايلاردىڭ تۋىنداۋىن بولدىرماۋ ءۇشىن جۇمىس بەرۋشىلەردى تەكسەرۋدى سۇرايدى», دەپ حابارلايدى ءسىم-ءنىڭ ءباسپاسوز قىزمەتى.
قر ىشكى ىستەر مينيسترلىگى اتالعان دەرەككە قاتىستى قىلمىستىق كودەكستىڭ 126-بابىنىڭ 1-بولىگىمەن (ادام ۇرلاۋعا بايلانىستى ەمەس باس بوستاندىعىنان زاڭسىز ايىرۋ) قىلمىستىق ءىس قوزعادى.