وڭىردە ەكونوميكالىق دامۋدىڭ الىنعان اسۋلارىنان الاسارماۋدىڭ سەنىمدى قادامدارى جاسالۋدا. بۇعان ۇستىمىزدەگى جىلدىڭ العاشقى توقسانىندا اتقارىلعان جۇمىستار بەرىك نەگىز قالاپ وتىر. وسى كەزەڭدە ونەركاسىپتىڭ بىرقاتار سالالارىندا سەرپىندى دامۋدىڭ العىشارتتارى جاسالعانى ايقىندالدى. وبلىس اكىمىنىڭ ورىنباسارى روزا كەمالوۆانىڭ مالىمدەۋىنشە, بيىلعى جىلدىڭ ءۇش ايىندا 272,0 ملرد. تەڭگەنىڭ ونەركاسىپ ونىمدەرى ءوندىرىلىپ, ناقتى كولەم يندەكسى 91,9 پايىزدى قۇراعان. جىل باسىندا «سنپس-اقتوبەمۇنايگاز» اق مۇناي مەن گاز, «قازاقويلاقتوبە» مۇناي ءوندىرۋدى جوسپارلى تۇردە ازايتقانىمەن, اعىمداعى جىل سوڭىنا دەيىن اقتوبە فەرروقورىتپا زاۋىتى, «قازكۋپەر» جشس, «اقتوبە رەلس ارقاۋى زاۋىتى» جشس سياقتى جاڭادان ىسكە قوسىلعان نىساندار ەسەبىنەن ونەركاسىپتىڭ ءوسۋ رەزەرۆتەرى بارىنشا پايدالانىلادى, سونىڭ ەسەبىنەن 60 ميللياردتان استام تەڭگەنىڭ ءونىمى وندىرىلەدى دەپ كۇتىلۋدە. ەسەپتى مەرزىمدە كەن ءوندىرۋ سالاسىنا قاراعاندا وڭدەۋشى ونەركاسىپتىڭ اناعۇرلىم دامۋ قارقىنى بايقالدى. ءوسىم نەگىزىنەن يندۋستريالاندىرۋ كارتاسىنا ەنگىزىلگەن جوبالارعا سايكەس پايدا بولدى. سول ارقىلى 43,7 ملرد. تەڭگەنىڭ ءونىمى شىعارىلدى. ءبىرىنشى توقساندا وبلىس ەكونوميكاسىنا 62,0 ملرد. تەڭگە ينۆەستيتسيا تارتىلعان. بۇل وتكەن جىلدىڭ وسى كەزەڭىمەن سالىستىرعاندا 0,5 پايىزعا كوپ. بيىلعى جىلعا تۇتاستاي العاندا يندۋستريالاندىرۋ كارتاسى جوبالارىن جۇزەگە اسىرۋ ەسەبىنەن, سونداي-اق, شاعىن جانە ورتا بيزنەس جوبالارىن ىسكە قوسۋدان بىلتىرعى 496,0 ميللياردتان كەم ەمەس دەڭگەيدە ينۆەستيتسيا تارتۋ كۇتىلۋدە.
وبلىستا قۇرىلىس جۇمىستارى قارقىندى جۇرگىزىلۋدە. بيىلعى ءبىرىنشى توقساندا 91,8 مىڭ شارشى مەتر تۇرعىن ءۇي پايدالانۋعا بەرىلدى. مۇنىڭ ءوزى وتكەن جىلعى وسى كەزەڭمەن سالىستىرعاندا پايدالانۋعا بەرىلگەن تۇرعىن ءۇي الاڭى 23,5 پايىزعا كوپ دەگەن ءسوز.
اۋىل شارۋاشىلىعىندا جالپى ءونىم ءوندىرۋ 17,3 ميلليارد تەڭگە قۇراپ وتىر. الداعى كەزەڭدە اۋىل شارۋاشىلىعى ءوندىرىسىن ارتاراپتاندىرۋعا, مال شارۋاشىلىعىن دامىتۋعا جانە ايماقتىڭ ەكسپورتتىق الەۋەتىن ارتتىرۋعا بايلانىستى جۇمىستار جانداندىرىلا تۇسپەك.
وڭىردە تۇتىنۋشىلاردىڭ سۇرانىسى جوعارى بولىپ وتىرعانى دا بايقالادى. بولشەك ساۋدا اينالىمى جىل باسىنان بەرى 7,1 پايىزعا ارتقان. جۇك اينالىمى 12,0 پايىزعا وسكەن. سىرتقى ساۋدا اينالىمىندا دا ىلگەرىلەۋلەر بار. يمپورت مولشەرىندە ازايۋ بايقالعانىمەن, تاۋارلاردى ەكسپورتتاۋ وسىمگە يە.
وبلىستا شاعىن جانە ورتا بيزنەستى دامىتۋعا باسا نازار اۋدارىلۋدا. بۇل رەتتە مەملەكەت تاراپىنان ۇسىنىلىپ وتىرعان مۇمكىندىكتەردى پايدالانۋدىڭ قايتارىمدى بولا تۇسكەنىن ايتۋ ورىندى بولماق. «بيزنەستىڭ جول كارتاسى-2020» باعدارلاماسى اياسىندا كوپتەگەن شارۋالار اتقارىلۋدا. الايدا, بىرقاتار اۋدانداردا شاعىن كاسىپورىندار بەلسەندىلىگىنىڭ تومەندەپ كەتكەنىن جاسىرۋدىڭ دا رەتى جوق. «بيزنەستىڭ جول كارتاسى-2020» باعدارلاماسى بويىنشا 26 جوبانىڭ 20-سى اقتوبە قالاسىنىڭ ەنشىسىندە, ال مۇعالجار جانە العا اۋداندارىنا ەكى جوبادان تيەسىلى بولسا, ىرعىز جانە شالقار اۋداندارىنىڭ ۇلەسىنە ءبىر-ءبىر جوبادان عانا كەلەدى. قالعان اۋدانداردان بىردە-ءبىر جوبا تۇسپەگەن. ازىق-ت ۇلىك تۇرلەرىنىڭ باعاسىن تۇراقتاندىرۋ دا تۇراقتى نازاردا ۇستالۋدا. «قازاگروماركەتينگ» اق مونيتورينگىندە ورنالاسقان ازىق-ت ۇلىكتىڭ 64 ءتۇرىنىڭ 62 ءتۇرى بويىنشا اقتوبەدەگى ونىمدەر باعاسى رەسپۋبليكالىق دەڭگەيدەن اسپايدى.
ايماقتىڭ ەكونوميكالىق الەۋەتىنىڭ وسۋىمەن تۇرعىنداردىڭ الەۋمەتتىك حال-احۋالى دا وسە تۇسۋدە. ەسەپتى كەزەڭدە ەڭبەكپەن قامتۋ سالاسىندا 2150 جۇمىس ورنى قۇرىلدى, بۇل وتكەن جىلعى وسى كەزەڭمەن سالىستىرعاندا 101,1 پايىزدى قۇرادى. جۇمىسپەن قامتۋ قىزمەتى ارقىلى 2013 جۇمىسسىز ەڭبەكپەن قامتىلدى, سونداي-اق, 1545 قوعامدىق جۇمىس ورنى ۇيىمداستىرىلدى. جۇمىسسىزدىقتى جويۋعا باعىتتالعان شارالار دا قايتارىمدى بولا تۇسكەن.
ءوڭىر ەكونوميكاسىنىڭ ۇستىمىزدەگى جىلدىڭ العاشقى توقسانداعى دامۋ قارقىنى جاڭا تابىستاردان ۇمىتتەندىرەدى. قىس قىسپاعىنان قۇتىلعان اقتوبەلىكتەر جازدىڭ جايساڭ مۇمكىندىكتەرىن پايدالانا وتىرىپ, ەڭبەك ونىمدىلىگىن ارتتىرۋعا باعىت ۇستاۋدا. بۇعان شاعىن جانە ورتا بيزنەس نىساندارىن تەكسەرۋگە جىل اياعىنا دەيىن موراتوري جاريالانۋى دا ىقپال ەتۋدە. العاشقى توقسانداعى قارقىندى ەڭبەك ىرعاعىن جالعاستىرۋعا جۇمىلعان كاسىپورىندار مەن شاعىن جانە ورتا بيزنەس نىساندارىنىڭ قاتارى كۇن ساناپ وسە تۇسۋدە. قازىردىڭ وزىندە جوسپارلى مەجەدەن كورىنۋدىڭ العىشارتتارى جاسالدى دەۋگە نەگىز بار.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.