مەملەكەتتىك ساياساتقا ساي جەتىسۋ جەرىندە دە مال تۇقىمىن اسىلداندىرۋ جۇمىسى جۇيەلى تۇردە جۇرگىزىلۋدە. فەرمەر الماسبەك سادىرباەۆ اۋىل شارۋاشىلىعى سالاسى عالىمدارىمەن بىرلەسە ءوزى باسقاراتىن «كوكتەم» شارۋا قوجالىعىندا يننوۆاتسيالىق عىلىمي جۇمىسقا جول اشىپ, ەكىنىڭ ءبىرى تاۋەكەل ەتە المايتىن تىڭ قادام جاسادى. ناقتىلاي تۇسسەك, جاڭا زەلانديا, اۆستراليا جانە اقش-تان «گەمپشير», «سۋففولك» اتتى اسىل تۇقىمدى قوشقارلاردىڭ مۇزداتىلعان ۇرىقتارىن اكەلىپ, ءوز باعىمىنداعى جەتىسۋ ءوڭىرىن جەرسىنگەن ساۋلىقتاردى ۇرىقتاندىرىپ ەكى جىلدان بەرى ءتول الۋدا. نەگىزى وسىعان دەيىن تمد ەلدەرىندە وسىرىلمەگەن قويلاردى تولدەتىپ سارقاندىقتار ەرەكشەلەنىپ وتىرعانىن باسا ايتقان دۇرىس. بۇل رەتتە سارقان اۋدانىنىڭ اكىمى تۇراتبەك شاراپيەۆتىڭ ىسكەر ازاماتتاردى بىردەن قولداپ, مال باسىن كوبەيتۋلەرى ءۇشىن اۋدان اۋماعىنان زاڭناما شەڭبەرىندە قاجەتىنشە جەر تەلىمىن ءبولىپ بەرگەنىن ەلباسىنىڭ سارابدال ساياساتىنا ساي جاسالعان باتىل قادامى دەپ تە باعالاعان ءلازىم.
«گەمپشير» قويىنىڭ ءتۇر-تۇرپاتى تۋرالى ايتساق, باسى مەن سيراقتارى قىزعىلتتاۋ نەمەسە قوڭىرقاي ءتۇستى بولىپ كەلەدى, ال «سۋففولك» قويىنىڭ باسى مەن تىزەسىنەن تومەن تىرسەكتەرى باقايشاعىنا دەيىن قارا ءتۇستى بولادى. اسىل تۇقىمدى قويلاردىڭ جون ارقاسى, ياعني جوتالارى تەگىس ءارى اقشىل كەلەدى. قوشقارى 124 كيلو, ال ساۋلىقتارى 90 كيلو تارتادى. ەتى ديەتالىق تاعام ءتۇرىنە جاتادى. بىلتىرعى جىلى 250 باس قوشقار ساتىپ ەدىك, بيىل 300 باس اسىل تۇقىمدى قوشقار ساتۋدى جوسپارلاپ وتىرمىز. سۇرانىس جاقسى, كەسىمدى باعامىزدان ءتۇسىرمەي ساۋدالاسپاي الىپ كەتەدى. ءسويتىپ, ەلىمىزدە اسىل تۇقىمدى قوي سانىن كوبەيتۋگە وزىندىك ۇلەسىمدى قوسۋدامىن. تاعى ءبىر ايتا كەتەر جايت, التى جىلدان بەرى قازاق مال شارۋاشىلىعى جانە مال ازىعىن ءوندىرۋ جونىندەگى عىلىمي زەرتتەۋ ينستيتۋتىنىڭ عالىمدارىمەن بىرلەسە وسىنداي جەتىستىككە قول جەتكىزىپ وتىرمىز», دەدى الماسبەك سادىرباەۆ.
قورىتا ايتقاندا, شوپان اتا تۇقىمىن ءوسىرۋ قازاقتىڭ اتاكاسىبى. ىقىلىم زاماننان بەرى جەرسىنگەن قازاقى قۇيرىقتى قوي, ەدىلباي تۇقىمدى قويلارى تۇرعاندا مۇحيتتىڭ ارعى جاعىنان قوي تۇقىمىن اكەلۋ بار دا, سول مالدىڭ جەرسىنۋى تاعى بار. بۇل اۋىل شارۋاشىلىعى سالاسىنىڭ وزەكتى ماسەلەسىنىڭ ءبىرى بولىپ تابىلادى. دەمەك, ىسكەر ازاماتتار جول تاۋىپ اكەلۋمەن بىرگە سول ەڭبەگىنىڭ جەمىسىن التى جىلدان سوڭ پاش ەتكەنىن ۇستامدىلىق دەپ باعالاعان دۇرىس. قۇدايعا شۇكىر, سان سىننان وتكەننەن كەيىن قويلارى جەتىسۋ جەرىن جەرسىنگەندىكتەن تولىققاندى ءتول الىپ, سول ءتولىنىڭ الدىن ساتىپ, جەمىسىن كورسەتىپ وتىر. مۇنداي فەرمەرلەردى قولداۋ ارقىلى ەلباسى ايتقان مەجە 60 مىڭ توننا ەتتى ەكسپورتقا شىعارۋ مۇمكىندىگىنە يە بولارىمىز انىق.
نۇربول الدىباەۆ,
«ەگەمەن قازاقستان».
الماتى وبلىسى.