جىل باسىندا وبلىستىڭ كاسىپكەرلىك پالاتاسى مەن وبلىستىق پروكۋراتۋرا اراسىندا كاسىپكەرلىكتى قولداۋ جانە ولاردىڭ قۇقىقتارىن قورعاۋ تۋرالى ءوزارا ىنتىماقتاستىق مەموراندۋمى جاسالعان بولاتىن. ەندى وسى ىنتىماقتاستىق مەموراندۋمى اياسىندا بيزنەستىڭ قۇقىن قورعاۋ باعىتىندا اتقارىلاتىن بىرلەسكەن ءىس-شارالار جوسپارىنا قول قويىلدى. وبلىس پروكۋرورى نۇرعالىم ءابدىروۆتىڭ ايتۋىنشا, پروكۋرورلار مەملەكەتتىك تەكسەرۋ ورگاندارىندا تىركەمەۋ جولىمەن جىل سايىن كاسىپكەرلىك نىساندارىن زاڭسىز تەكسەرۋدىڭ مىڭداعان دەرەكتەرىنىڭ الدىن الاتىن كورىنەدى. وتكەن جىلى 180 تەكسەرۋگە رۇقسات بەرىلمەپتى. 2013 جىلى پروكۋرورلار 250 كاسىپكەردىڭ قۇقىن قورعاعان. پروكۋراتۋراعا بيزنەس قاۋىمداستىعىنان 49 شاعىم ءتۇسىپ, سونىڭ 21-ءى دالەلدەنگەن, 55 لاۋازىمدى تۇلعا جاۋاپكەرشىلىككە تارتىلعان.
مونوپوليستەرگە قاتىستى كاسىپكەرلەردىڭ پروبلەمالىق ماسەلەلەرىن اشۋعا «تەكسەرۋشى جانە كاسىپكەر», «شەنەۋنىك جانە كاسىپكەر» اكتسيالارى مۇمكىندىك بەرەدى دەپ كۇتىلۋدە. وبلىستا «مونوپوليست جانە كاسىپكەر» اكتسياسى باستالىپ تا كەتتى.
وبلىس كاسىپكەرلەرى ءوڭىرلىك پالاتاسىنىڭ ديرەكتورى تولەمىس شوتانوۆ كاسىپكەرلەردىڭ قۇقىعىن جانە زاڭدى مۇددەسىن ءتيىمدى قورعاۋ ءۇشىن كاسىپكەرلەر پروبلەماسىنىڭ كارتاسىن ءتۇزۋ كەرەك, بيزنەسكە اكىمشىلىك كەدەرگىلەردى جويۋ قاجەت, زاڭ جوبالارىنا ساپالى ساراپتاما جاساۋ كەرەك جانە قولدانىستاعى نورماتيۆتىك-قۇقىقتىق اكتىلەردى تۇگەندەۋ قاجەت دەپ ەسەپتەيدى. ول سونداي-اق, كاسىپكەرلەر پالاتاسىنىڭ جانە ونىڭ فيليالدارىنىڭ نەگىزگى مىندەتى تەكسەرۋشى ورگانداردىڭ كاسىپكەرلىك قىزمەتكە زاڭسىز ارالاسۋىنىڭ الدىن الۋ بولىپ تابىلاتىنىن تاعى ءبىر ەسكە سالىپ ءوتتى. وڭىرلىك پالاتانىڭ باسشىسى وتكەن جىلى جۇرگىزىلگەن 9609 تەكسەرۋدىڭ 4175-ءى جوسپاردان تىس بولعانىن جەتكىزدى. وسى تەكسەرۋلەردىڭ ناتيجەسىمەن 40 مىڭ كاسىپكەر اكىمشىلىك جاۋاپكەرشىلىككە تارتىلىپ, 195 ميلليون تەڭگە ايىپپۇل سالىنعانىن العا تارتتى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.