قوستانايلىق شارۋالار اۋىل شارۋاشىلىعى سالاسىنا ارنالعان جەڭىلدەتىلگەن ليزينگ باعدارلاماسى بويىنشا جاڭا تەحنيكا ساتىپ الا باستادى. اتالعان باعدارلاما مەملەكەت قولداۋىنا ارقا سۇيەي وتىرىپ, جاڭا تەحنيكا ساتىپ الۋعا مۇمكىندىگى جەتە بەرمەيتىن شاعىن شارۋا قوجالىقتارىنىڭ تەحنيكالىق پاركىن جاڭارتۋدى كوزدەيدى.
وبلىستا سوڭعى وتىز جىلدىڭ ىشىندە جاڭا كومباين نەمەسە باسقا دا جەر يگەرەتىن زاماناۋي قۋاتتى تەحنيكا ساتىپ العان شاعىن شارۋا نەكەن-ساياق. جەرىنىڭ كولەمى از, قالتاسى جۇقا بولعاندىقتان, قىمبات تەحنيكا ساتىپ الۋ دا قيىنعا تۇسەدى. سوندىقتان شاعىن شارۋاشىلىعى بار ديقاننىڭ كوبى ءالى كۇنگە دەيىن كەڭەس كەزەڭىنەن قالعان كونە تەحنيكامەن امالداپ كەلگەن. سوڭعى جىلدارى وسى ماسەلەگە باسا نازار اۋدارا باستاعان مەملەكەت اۋىلداعى تىرشىلىكتى جانداندىراتىن نەگىزگى قوزعاۋشى كۇش – شاعىن شارۋالارعا دا شۋاق ءتۇسىرىپ, ولاردىڭ تەحنيكا جاڭارتىپ الۋىنا جاعداي جاساپ بەرۋدىڭ قامىنا كىرىسكەن سىڭايلى.
17 تامىزدا «اگروماشحولدينگ KZ» زاۋىتىندا باعدارلاماعا العاشقى بولىپ قاتىسقان بىرنەشە شارۋاعا «كيروۆەتس» تراكتورلارى مەن ESSIL كومباينى تاپسىرىلدى. «قازاگروقارجى» اق قوستاناي فيليالىنىڭ ديرەكتورى الىبەك قارايداروۆتىڭ ايتۋىنشا, بۇگىندە اكتسيونەرلىك قوعامنىڭ بارلىق ايماقتاعى فيليالدارى جەڭىلدەتىلگەن ليزينگ باعدارلاماسىنا قاتىسۋشىلاردان ءوتىنىم قابىلداي باستاعان.
– بۇگىنگە دەيىن ەلىمىزدىڭ 11 وڭىرىندە اۋىلشارۋاشىلىق تاۋارلارىن وندىرۋشىلەردەن 14,6 ملرد تەڭگەگە 187-دەن استام ءوتىنىم كەلىپ ءتۇستى. بۇگىن, مىنە, جەڭىلدەتىلگەن ليزينگ باعدارلاماسىمەن العاشقى ءوتىنىم بويىنشا راسىمدەلگەن 3 بىردەي تەحنيكا يەلەرىنە تابىس ەتىلىپ وتىر. جالپى, شارۋالارعا ليزينگكە تەحنيكا بەرۋ باعدارلاماسىن ىسكە اسىرۋ ءۇشىن 40 ملرد تەڭگە قاراستىرىلعان. ونىڭ 30 ملرد تەڭگەسىن «ونەركاسىپتى دامىتۋ قورى» «جاسىل دامۋ» (وكم وپەراتورى) قاراجاتىنان, ال 10 ملرد تەڭگەنى «قازاگروقارجى» كاپيتال نارىقتارىنان تارتاتىن بولادى. بۇل قاراجات اۋىلشارۋاشىلىق تەحنيكاسىن ليزينگكە جەڭىلدىكتى شارتتارمەن الاتىن تاۋار شارۋالاردى قارجىلاندىرۋ ءۇشىن «قازاگروقارجى» اق-نا بەرىلەتىن بولادى, – دەدى ءا.قارايداروۆ.
«اگروماشحولدينگ KZ» زاۋىتىنان شىققان سۋ جاڭا ESSIL-750 استىق كومباينىنىڭ ءبىرى «ۋتەميسوۆا گ.ن.» شارۋا قوجالىعىنىڭ باسشىسىنا سالتاناتتى تۇردە تابىس ەتىلدى.
– ءبىز مەملەكەتتىڭ مۇنداي قولداۋىن كوپتەن كۇتىپ كەلگەن ەدىك, بۇگىن, مىنە, ءوزىمىزدىڭ جەرگىلىكتى زاۋىتتان شىققان ESSIL-750 كومباينىن ءتيىمدى شارتپەن ساتىپ الدىق. ارينە, قۋانىشتىمىز. جاڭا تەحنيكانى دەر كەزىندە الدىق, ءوزىمىز 2-3 كۇننەن كەيىن ەگىن جيناۋعا شىعامىز, – دەيدى شارۋا قوجالىعىنىڭ باسشىسى ولجاس وتەمىسوۆ.
جوعارىدا ايتقانداي, باعدارلاما نەگىزىنەن شاعىن جانە ورتا اۋىلشارۋاشىلىق كاسىپورىندارىن قولداۋعا باعىتتالعان. ماسەلەن, ولجاس وتەمىسوۆ باسقاراتىن شارۋا قوجالىعىنىڭ ەگىس القابى شامامەن 700 گەكتارداي عانا.
– بۇل باعدارلاما قازاقستان رەسپۋبليكاسىنىڭ اۋىلشارۋاشىلىق تەحنيكالارى پاركىن جاڭارتۋ مۇمكىندىكتەرىن كەڭەيتەدى. «اگروماشحولدينگ KZ» اق جانە «قوستاناي تراكتور زاۋىتى» جشس زاۋىتتارى بويىنشا جەڭىلدەتىلگەن ليزينگ باعدارلاماسى اياسىندا ىسكە اسىرۋعا دايىن تەحنيكانىڭ بار ەكەنىن سەنىمدى تۇردە ايتا الامىز. بۇل ESSIL كومبايندارى, سونداي-اق LOVOL جانە كيروۆەتس تراكتورلارى, – دەيدى «اگروماشحولدينگ KZ» اق كوممەرتسيالىق ديرەكتورى نيكولاي پارحومەنكو.
ارقالىق وڭىرىندەگى «كوكتەم» جانە سارىكول اۋدانىنداعى «مايباسوۆا زارينا ماگومەدوۆنا» شارۋا قوجالىقتارى دا جەڭىلدەتىلگەن باعدارلاما بويىنشا قىمبات «كيروۆەتس» تراكتورلارىن الىپ وتىر.
– شارۋاشىلىقتا ەكى ESSIL-740 كومباينى بار, بۇگىن جەڭىلدەتىلگەن ليزينگ باعدارلاماسى بويىنشا قوستاناي تراكتور زاۋىتىنان شىققان كيروۆەتس ك-735 تراكتورىن ساتىپ الدىق. جىلدىق پايىزى تومەن. جاقىندا قوسىمشا 1 500 گەكتار جەر العانبىز. جاڭا تەحنيكانى ءدال كەرەك كەزىندە الدىق, – دەيدى شارۋاشىلىق باسشىسى سۇلتانبەك سەيىتوۆ.
باعدارلاما اياسىندا قوستاناي تراكتور زاۋىتى مەن «اگروماشحولدينگ KZ» زاۋىتى 1 500-دەن استام تراكتور-كومباين قۇراستىرىپ شىعارعان. قازىرگى قولدا بار تەحنيكا شارۋالاردىڭ ءبىر جىلدىق سۇرانىسىن وتەۋگە تولىق جەتەدى دەيدى زاۋىت باسشىلارى.
«قازاگروقارجى» وبلىستىق فيليالى ماماندارىنىڭ ايتۋىنشا, باعدارلامانىڭ شارتتارى شارۋالار ءۇشىن اسا ءتيىمدى: جىلدىق سىياقى مولشەرلەمەسى – 6 پايىز. ەڭ باستىسى, شاعىن شارۋاشىلىقتار باستاپقى قارجى قورىن جيناماي-اق, تەحنيكا ساتىپ الۋ مۇمكىندىگىنە يە بولىپ وتىر. ليزينگ مەرزىمى – 10 جىل. وعان قوسا, تەحنيكا ساتىپ العان ادامنىڭ نەگىزگى قارىزىن قايتارۋعا تاعى 10 جىل ۋاقىت بەرىلمەك.
قوستاناي وبلىسى