بۇل ناگرادا ارادا 70 جىل ۋاقىت وتكەندە مايدانگەردىڭ ۇلى باقىتبەك مۇقاش ۇلىنىڭ قولىنا تابىس ەتىلدى.
مۇقاش ساتاباەۆ سوعىسقا 41-ءدىڭ كۇزىندە اقسۋدىڭ قۇركول اۋىلىنان اتتانىپتى. سوعىستا اۋىر جاراقات الىپ ەلگە ورالادى. وبلىستاعى لەبياجى, اقسۋ اۋداندارىنىڭ ءورت ءسوندىرۋ ءبولىمشەسىندە ەڭبەك ەتىپ, 1974 جىلى قايتىس بولادى. كەيىن, سوعىس اياقتالعان سوڭ, 1947 جىلى مۇقاش ساتاباەۆقا سمولەنسك قالاسى ماڭىنداعى شايقاستا كورسەتكەن باتىلدىعىنا وراي «ەرلىگى ءۇشىن» مەدالى بەرىلەدى. بۇل رەسمي قۇجات وسى ۋاقىتقا دەيىن رەسەي قورعانىس مينيسترلىگىنىڭ ورتالىق مۇراعاتىندا ساقتالىپ كەلىپتى.
ەندى, مىنە, سول مەدال مايدانگەردىڭ ۇلىنىڭ قولىنا ءتيدى. وبلىس ورتالىعىنداعى «دوستىق» ۇيىندە رەسەيدىڭ وسكەمەندەگى باس كونسۋلى سەرگەي اننەنكوۆ ناگرادانى باقىتبەك مۇقاش ۇلىنا سالتاناتتى تۇردە تابىس ەتتى.
– مارقۇم اكەمىزدىڭ مەدال العانىن 2012 جىلى عانا ءبىلدىك. وبلىستاعى قورعانىس ىستەرى ءجونىندەگى دەپارتامەنت ارقىلى رەسەيدىڭ قورعانىس مينيسترلىگىمەن بايلانىس جاساپ, مەدالدى ەلگە الدىرۋعا ارەكەت جاسادىق. بۇل – ءبىزدىڭ اۋلەت ءۇشىن ابىروي. ماراپاتتى اكەمىز ءوزى بىلمەي كەتسە دە, ەرلىگى سوڭىندا قالعان ۇرپاعىنا جەتتى, – دەيدى باقىتبەك مۇقاش ۇلى.
فاريدا بىقاي,
«ەگەمەن قازاقستان».
پاۆلودار.