مىڭ تاعزىم ساعان, مايدانگەر!

ارداگەرلەرگە العىس

ۇلى وتان سوعىسىنداعى جەڭىسكە بيىلعى 9 مامىردا 69 جىل تولدى. وسى ايتۋلى مەرەكەگە وراي وتانىمىزدىڭ بارلىق ەلدى مەكەندەرىندە ارداگەرلەرگە زور سىي-قۇرمەت كورسەتىلۋدە. ياعني مەرەكەلىك داستارقاندار جايىلىپ, باسقا دا ءتۇرلى سالتاناتتى شارالار ۇيىمداستىرىلىپ جاتىر. بۇدان بولەك, قالىپتاسقان ءداستۇر بويىنشا, جەرگىلىكتى بيلىك ۇلى وتان سوعىسىنىڭ بارلىق قاتىسۋشىلارىنا ءبىر رەت بەرىلەتىن اقشالاي جاردەماقى تاعايىندادى. سونىمەن قاتار, كەيبىر وڭىرلەر ارداگەرلەردىڭ ءبىر ايلىق كوممۋنالدىق تولەمدەرىن وتەپ بەرۋگە شەشىم قابىلدادى.    ارينە, جاردەماقى كولەمى ءار ءوڭىردىڭ الەۋمەتتىك-ەكونوميكالىق جاعدايىنا قاراي ءارتۇرلى بولىپ وتىر. بىراق ماسەلە ونىڭ ناقتى كولەمىندە بولماسا كەرەك. ەڭ باستىسى – ەلىمىزدە ارداگەرلەرگە لايىقتى قۇرمەت كورسەتىلۋ ۇستىندە.  *اقتوبە وبلىسى ۇلى وتان سوعىسىنىڭ وت -جالىنىنان وتكەن مايدانگەرلەر قاتارى سيرەپ قالدى. قازىر وبلىستا نەبارى 211 ۇلى وتان سوعىسىنا قاتىسۋشى تۇرادى. سولاردىڭ 160-تان استامى اقتو­بە قالاسىنىڭ تۇرعىنى. جەر­گىلىكتى بيلىك ولارعا بار­لىق تۇرمىستىق جاعداي تۋعى­زىپ كەلەدى. مايدانگەرلەر «ارداگەر» ەمحاناسىندا دەن­ساۋلىعىن تەك­سەرتىپ, ەمدە­لەدى. وڭىردەگى سوعىس اردا­گەر­لەرىنىڭ بارلىعى تۇرعىن ۇيمەن قامتاماسىز ەتىلگەن. ماي­دان­گەرلەردىڭ كوممۋنالدىق ءتو­لەمدەرىن وتەۋگە ءار ارداگەرگە اي سايىن جەرگىلىكتى بيۋدجەت ەسە­بىنەن 10 مىڭ تەڭگە تولەنەدى. ولار قوعامدىق كولىكتە تەگىن جۇرەدى. ۇلى جەڭىستىڭ 69 جىل­دىعىنا وراي ۇلى وتان سوعى­سىنا قاتى­سۋشىلاردىڭ ارقاي­سىسىنا وب­لىستىق بيۋدجەتتەن 100 مىڭ تەڭگە بەرىلدى. اقتوبە قالا­سىن­دا تۇراتىندار ءۇشىن وتان قورعاۋ­شىلار كۇنى داس­تارحان جايىلىپ, سىي-سيا­پات جاسالدى. وسى شارا بارى­سىندا قالادا تۇراتىن ءۇش سوعىس ارداگەرىنە جانە ءۇش ۇلى وتان سوعىسىنا قاتىسۋشىنىڭ جەسىرىنە پاتەر سەرتيفيكاتتارى تاپسىرىلدى. ساتىبالدى ءساۋىرباي, «ەگەمەن قازاقستان». *الماتى وبلىسى ەلىمىزدە قالىپتاسقان ءداستۇر بويىنشا الماتى وبلىسىنىڭ اكىمى اڭسار مۇساحانوۆ 9 مامىر – جەڭىس كۇنى مەرەكەسىنە وراي تالدىقورعاندا ۇلى وتان سو­عىسى ارداگەرلەرىن قابىلداپ, سىي-سياپات كورسەتتى. جالپى, جە­تىسۋ جەرىندە 471 ۇوس اردا­گەرى بولسا, سونىڭ 320-سى سۇرا­پىل سوعىسقا قاتىسۋشى, 152-ءسى مۇگەدەك جاندار. وبلىس اكى­مى­نىڭ كەزدەسۋىنە 100 ارداگەر شاقى­رىلىپ, وبلىستىق بيۋدجەت­تەن ولاردىڭ ارقايسىنا ءبىر جولعى ماتەريالدىق كومەك رەتىندە 50 مىڭ تەڭگەدەن بەرىلدى. ارداگەرلەر باسقوسۋىندا مايدانگەرلەر سول­تانباي جارىقباەۆ پەن گريگوري حارچەنكو مىنبەگە كوتەرىلىپ, كەشەگى كۇن ەستەلىكتەرىن تىلگە تيەك ەتە تۇرىپ بۇگىنگى وسكەلەڭ ءومىر­گە ريزاشىلىقتارىن ءبىلدىردى. ءال­بەتتە, ەلباسىنا, وبلىس اكىمىنە العىستارىن دا اعىتا ءبىلدى. قارتتار كوڭىلدەرىن اۋلاي بىلگەن اڭسار مۇساحانوۆ قۇتتىقتاۋ سوزبەن شەكتەلمەي, ارداگەرلەرگە اق داستارقاننان ءدام تاتقىزىپ, وسى كۇنى وبلىستىڭ ءار تۇكپىرىنەن ارنايى كەلگەن قاريالاردىڭ قوناقۇيدە ورنالاسىپ, دارىگەرلەر تەكسەرۋلەرىنەن وتۋىنە دە جاعداي تۋعىزدى. نۇربول الدىباەۆ, «ەگەمەن قازاقستان». * اتىراۋ وبلىسى اتىراۋ وبلىسىندا دا جە­ڭىس كۇنى قارساڭىندا سوعىس ار­دا­گەرلەرىنىڭ ارقايسىسىنا ەرەكشە سىي-قۇرمەت كورسەتۋ شارالارى باس­تاۋ الدى. جۇرتشىلىقپەن ءجۇز­دەسكەن مايدانگەرلەر قارۋ­لاس­تارىنىڭ ەرلىگى جايىندا ەستەلىكتەر ايتىپ, بۇگىنگى بەي­بىت ءومىردىڭ قىمباتتىعىن, ءتاۋ­ەل­سىزدىكتىڭ قادىر-قاسيەتىن جاس­­تار ساناسىنا سىڭىرۋدە مۇز جاس­­تانىپ, قار جامىلىپ, قان ماي­دان­نىڭ قيىندىعىن كورگەن سوعىس ارداگەرلەرىنىڭ ارقايسىسىنا جەر­گىلىكتى بيلىك تاراپىنان 100 مىڭ تەڭگەدەن قارجىلاي سىياقى بەرۋى كوزدەلۋدە. وبلىستىق ارداگەرلەر كەڭە­سى­نىڭ توراعاسى قاتيموللا ريزۋا­نوۆ­تىڭ ءمالىم ەتكەنىندەي, قازىر اتى­راۋ وبلىسىندا ەكىنشى دۇنيە­جۇ­زىلىك سوعىسقا قاتىسىپ, كەيىننەن بەيبىت ومىردە ەرىنبەي ەڭبەك ەتكەن مايدانگەرلەردىڭ ەڭ ۇلكەنى – عا­سىر­لىق عۇمىردىڭ ءدامىن تاتقان باي­عازى بايەت ۇلى يندەر اۋدانىنىڭ ەسبول اۋىلىندا تۇرادى. بۇل مايدانگەر ءدال جەڭىس كۇنىندە, ياعني  9 مامىردا 100 جاسقا تولعالى وتىر. – وق پەن وتتىڭ ورتاسىنان ورالعان سوعىس ارداگەرلەرىنىڭ قاتارى اتىراۋدا دا ازايىپ بارادى. ءدال قازىر مۇنايلى وڭىردە سوعىسقا قاتىناسقان 100 سوعىس ارداگەرى بار. ءوڭىر باسشىلىعى جەڭىس كۇنى قارساڭىندا سوعىس ارداگەرلەرىنىڭ ارقايسىسىنا 100 مىڭ تەڭگەدەن سىياقى بەرۋگە شەشىم قابىلدادى. بۇعان قوسا سوعىس ارداگەرلەرىنىڭ كوممۋنالدىق قىزمەتتەرگە تولەمى ءۇشىن بيۋدجەتتەن اي سايىن 10 000 تەڭگەدەن بەرىلىپ كەلەدى, – دەيدى قاتيموللا ريزۋانوۆ. جولداسبەك شوپەعۇل, «ەگەمەن قازاقستان». * جامبىل وبلىسى جىل وتكەن سايىن ۇلى وتان سوعىسى ارداگەرلەرىنىڭ قاتارى ازايىپ كەلە جاتقانى جاسىرىن ەمەس. بۇرىن ءار اۋىلدان, ۇلكەن كوشەلەردىڭ بويىنان كەۋدەسىنە جارقىراتىپ وردەن-مەدالىن تاققان ارداگەرلەردى ءجيى كورۋشى ەدىك. ءتىپتى ەكى ءۇيدىڭ بىرىندە «بۇل ۇيدە سوعىس ارداگەرى تۇرادى» دەگەن تاقتايشالار قاعۋلى تۇراتىن. ۋاقىت ءوز دەگەنىمەن جۇرەدى ەكەن. بۇگىنگى كۇنى جامبىل وبلىسىندا 304 ۇلى وتان سوعىسىنىڭ ارداگەرى, 2377 ولارعا تەڭەستىرىلگەن, 456 تىلدا جۇمىس اتقارعان ازاماتتار تۇرادى. جەڭىس مەرەكەسى قارساڭىندا جەرگىلىكتى بيۋدجەت ەسەبىنەن سوعىس ارداگەرلەرىنىڭ ارقايسىسىنا 100 مىڭ تەڭگەدەن, ولارعا تەڭەستىرىلگەندەرگە 20 مىڭ تەڭگەدەن, ال, تىلدا جۇمىس اتقارعاندارعا 10 مىڭ تەڭگەدەن ءبىر جولعى ماتەريالدىق جاردەماقى تولەۋ قاراستىرىلعان. ارينە, وتان ءۇشىن وت كەشىپ, كەۋدەسىن وققا توسقان وسىناۋ ارداگەرلەرگە قانداي سىي-سياپات جاساساڭ دا جاراسادى. جانە تەك جەڭىس مەرەكەسى تۇسىندا عانا ەمەس, جىل بويى ۇمىتپاي, قولدان كەلگەن قامقورلىقتىڭ ءبارىن جاساپ وتىرۋ قاجەت. ءاربىر ارداگەر قامقورلىقتى سەزىنۋى ءتيىس. ورالحان ءداۋىت, «ەگەمەن قازاقستان». * قوستاناي وبلىسى وسىدان جەتپىس جىل بۇرىن سۇراپىل سوعىستا جاۋعان وققا قارسى تۇرعان مايدانگەرلەر بۇگىندە تاۋەلسىز ەلدەگى بەيبىت كۇننىڭ باقىتىن سەزىنىپ وتىر. وبلىستا قازىر قان مايداننىڭ كۋاگەرىندەي 435 سوعىس ارداگەرى تۇرادى. جەڭىس كۇنى قارساڭىندا ۇلى وتان سوعىسىنا قاتىسۋشىلار مەن مۇگەدەكتەرىنە 25 ايلىق كور­سەتكىش كولەمىندە, ياعني 46300 تەڭگە سىياقى بەرىلدى. بۇل وب­لىس­تىڭ بارلىق اۋداندارى مەن قالالارىنىڭ بيۋدجەتتەرى ەسە­بىنەن جۇزەگە استى. مۇنىڭ سىرتىندا سوعىس ارداگەرلەرىنە تۇر­مىستىق قاجەتتىلىكتەرى ءۇشىن اي سايىن بەرىلەتىن 11112 تەڭگە ءجار­دەماقىنىڭ كولەمى مامىر ايى­نان باستاپ 18520 تەڭگەگە جەتتى. جەڭىلدىكتەرى مەن كەپىلدىكتەرى جونىنەن ۇلى وتان سوعىسىنا قاتىسۋشىلار مەن مۇگەدەكتەرىنە تەڭەستىرىلگەن اۋعان سوعىسىنىڭ ارداگەرلەرى, بەيبىت كۇندە ەر­لىك­پەن قازا تاپقان اسكەري قىز­مەت­كەرلەردىڭ جەسىرلەرى, وسى كاتەگورياعا جاتاتىن باسقا كىسىلەر جەڭىس مەرەكەسىندە ەسكەرۋسىز قال­عان جوق. ولارعا 9260 تەڭگە ءبىر جول­عى سىياقى بەرىلدى. وبلىستا ۇلى وتان سوعىسى كەزىندە تىل اۋىرتپالىعىن كو­تەر­گەن, جەڭىستى جاقىنداتۋعا ۇلەسىن قوسقان 10267 ادام تۇرادى. ولار دا جەڭىس مەرەكەسى قۇرمەتىنە 9260 تەڭگەدەن سىياقى الدى. ءنازيرا جارىمبەتوۆا, «ەگەمەن قازاقستان». * قىزىلوردا وبلىسى ەر ەتىگىمەن قان كەشكەن, ات اۋىزدىعىمەن سۋ ىشكەن سۇراپىل سوعىسقا قاتىسقان ارداگەرلەردى قالاي ارداقتاساق تا ارتىقتىق ەتپەيدى. قىزىلوردا وبلىسىنداعى ەكىنشى دۇنيەجۇزىلىك سوعىسقا قاتىسقان مايدانگەرلەر مەن ولارعا تەڭەستىرىلگەن ازاماتتارعا بيۋدجەت ەسەبىنەن الەۋمەتتىك كومەكتەر كورسەتىلىپ جاتىر. مىسالى, 119 مايدانگەرگە 148160 تەڭگەدەن بەرىلمەك. ال سوعىستا قازا تاپقان جاۋىنگەرلەردىڭ ەكىنشى رەت نەكەگە تۇرماعان جەسىرلەرىنە دە وسى كولەمدە كومەك كورسەتىلدى. سونداي-اق, سوعىس جىلدارىندا تىلداعى جانقيارلىق ەڭبەگi مەن مiنسiز اسكەري قىزمەتi ءۇشiن كسرو-نىڭ وردەن-مەدالدارىمەن ماراپاتتالعان 196 ادامعا 92600 تەڭگەدەن سىياقى تولەندى. ال سوعىس ۋاقىتىندا فاشيستەر مەن ولاردىڭ وداقتاستارى قۇرعان كونتسلاگەرلەردىڭ, گەتتولاردىڭ جانە باسقا دا ەرىكسىز ۇستاۋ ورىندارىنىڭ جاسى كامەلەتكە تولماعان بۇرىنعى تۇتقىندارىنا 148 160 تەڭگە كولەمىندە بەرىلەدى. ەڭ اقىرى 1941-1945 جىلدار ارالىعىندا كەمىندە التى اي جۇمىس ىستەگەن ازاماتتارعا 55560 تەڭگەدەن وتەماقى جاسالدى. ال قىزىلوردا وبلىسىندا ونداي ادامداردىڭ سانى 6874 ەكەن. جالپى, وبلىس بويىنشا بارلىعى 7193 ارداگەرگە 411 285,8 مىڭ تەڭگە الەۋمەتتىك كومەك تولەندى. ەرجان بايتىلەس, «ەگەمەن قازاقستان». * ماڭعىستاۋ وبلىسى قازىرگى تاڭدا ماڭعىستاۋ وبلىسىندا 77 سوعىس ارداگەرى تۇرادى. مە­رەكە قارساڭىندا ولاردىڭ بار­لى­عىنا 100 مىڭ تەڭگەدەن الەۋمەتتىك كومەك كورسەتىلدى. سونداي-اق, 847 ۇوس ارداگەر­لەرىنە تەڭەستىرىلگەن تۇلعالارعا 50 مىڭ, 5 سوعىس ارداگەرلەرى جە­سىر­لەرىنە 40 مىڭ, سوعىستان ورالماعان 115 ساربازدىڭ ايەل­دەرىنە جانە 46 بەيبىت ۋاقىتتا ءاس­كەري قىزمەت اتقارۋدا قاي­تىس بولعاندار وتباسىلارىنا, 1150 سوعىس كەزىندەگى تىل ەڭبەك­كەر­لەرىنە 10 مىڭنان, 122 اۋعان سوعىسى جانە چەرنوبىلداعى اەس اپاتى مۇگەدەكتەرىنە 60 مىڭ, 31 چەرنوبىل اپاتىن جويۋعا قاتىسۋشىلارعا 20 مىڭ تەڭگەدەن سىياقى بەرىلدى. بۇل سىيلار ءۇشىن جەرگىلىكتى بيۋدجەتتەن بارلىعى 2393 ادامعا 71 ملن. 300 مىڭ تەڭگە ءبولىندى. جەڭىس مەرەكەسىنە وراي ماڭعىستاۋ وبلىسى اكىمدىگى 77 ۇوس ارداگەرىنە الەۋمەتتىك كومەك كورسەتۋ بويىنشا وبلىستىق باسقارمالار مەن اۋماقتىق مەملەكەتتىك قىزمەتكەرلەردىڭ, قۇقىق قورعاۋ سالاسىنىڭ, اقتاۋ اسكەري گارنيزونىنىڭ, ونەركاسىپتىك كاسىپورىنداردىڭ جاۋاپتىلار كەستەسىن بەكىتتى. اتالعان جاۋاپتى تۇلعالار 15-25 مىڭ تەڭگە كولەمىندە ازىق-ت ۇلىك, 100 مىڭ تەڭگەگە دەيىن ماتەريالدىق كومەك كورسەتتى. سونىمەن قاتار, جاۋاپتى تۇلعالار ارقىلى وبلىس اكىمى اتىنان قارجىلاي سىي-سياپات تاپسىردى. اقتاۋ قالالىق اكىمدىگى باس­تاماسىمەن 20 سوعىس ارداگەرىنە قۇرىلىس ۇيىمىمەن قارجىلىق كومەك كورسەتىلدى. ال اۋداندار, قالالار اكىمدەرى ارداگەرلەر مەن تىل قىزمەتكەرلەرىنە ارناپ سالتاناتتى جيىن ۇيىمداستىرسا, جاستار جاعى ءتۇرلى اكتسيالارمەن قولداۋ كورسەتتى. گۇلايىم شىنتەمىرقىزى, «ەگەمەن قازاقستان».  * وڭتۇستىك قازاقستان وبلىسى كۇن وتكەن سايىن مايدانگەر ۇرپاق وكىلدەرى ازايىپ بارادى. وڭتۇستىك قازاقستان وبلىسىندا وسىدان ون كۇن بۇرىن 1941-1945 جىلدارعى ەكىنشى دۇنيەجۇزىلىك سوعىستىڭ 550 ارداگەرى بار ەدى. ۇلى جەڭىس مەرەكەسىنە ەكى كۇن قالعانعا دەيىن ولار ون ەكى ادامعا كەمىدى. جەرگىلىكتى بيۋدجەتتەن ۇوس ارداگەرلەرىنە اقشالاي كومەك كورسەتىلدى. ورتا ەسەپپەن العاندا ارقايسىسىنا 111 مىڭ تەڭگەدەن كەلەدى. 25463 تىل ەڭبەككەرىنە دە كوڭىل ءبولىنىپ, اۋداندار مەن قالالاردا ءىس-شارالار وتكىزىلىپ, اقشالاي-زاتتاي سىيلىقتار تاپسىرىلدى. 6 مامىردا وبلىستىق ارداگەرلەر كەڭەسىنىڭ ۇيىمداستىرۋىمەن وپەرا جانە بالەت تەاترىندا, وسى ونەر ورداسى ارتىستەرىنىڭ كۇشىمەن اۋداندار مەن قالالاردان جينالعان ارداگەرلەرگە كونتسەرت قويىلىپ, دەمەۋشىلەر ەسەبىنەن «مانچەستەر» مەيرامحاناسىندا داستارقان جايىلدى. مارحابات بايعۇت, «ەگەمەن قازاقستان». * پاۆلودار وبلىسى وبلىستا جەڭىس مەرەكەسىنە  بايلانىستى كوپتەگەن شارالار وتۋدە. «مايدان جولى» ەسكە الۋ توبى سوعىس كەزىندە قازا بولعان پاۆلودارلىقتاردىڭ زيراتتارىن ىزدەۋ ءۇشىن رەسەيدىڭ نەۆەل قالاسىنا اتتاندى. بىرنەشە رەت جولعا شىققان بۇل ساپارعا «قازاقستان ەلەكتروليز زاۋىتى» اق  دەمەۋشىلىك جاساۋدا. مالىمەتتەر بويىنشا, 1941-1945 جىلعى سوعىسقا  وبلىستان 46 مىڭنان اسا ادام قاتىسىپتى. ارنايى ەكسپەديتسيا  مۇشەلەرى ءىز-ءتۇزسىز كەتكەن 50-گە جۋىق جاۋىنگەردىڭ ەسىمدەرى مەن قاي جەردە جەرلەنگەندەرى جايىندا اقپارات تاپتى. وبلىستان 31 ادام كەڭەس وداعى باتىرى اتاعىن الدى. ال, بۇل كۇندەرى وبلىستا سوعىس ءورتىن كورگەن 306 ارداگەر قالىپتى. بيىل وسى 306 ارداگەرگە وبلىستىق بيۋدجەت قارجىسىنان ارقايسىسىنا 127 778 تەڭگەدەن  اقشا ءبولىنىپ, ەسەپ-شوتتارىنا ءتۇسىرىلىپتى. پاتەرلەرىنە جوندەۋ جۇمىستارى جۇرگىزىلۋدە. سول ءبىر وتكەن اۋىر كۇندەردىڭ مايدان جولى قازىر مەكتەپتەردە  «ەلىن قورعاۋ  – ەرگە سىن» اتتى اسكەري-سپورتتىق جارىس­تارمەن, تاقىرىپتىق كەزدەسۋلەرمەن اتاپ وتىلۋدە. سۇلتانماحمۇت تورايعىروۆ اتىنداعى وبلىستىق كىتاپحانادا  «ۆ پامياتي پوكولەني», شافەر مۋزەي ۇيىندە «سلەد پوبەدى», اسكەري داڭق مۋزەيىندە «قازا بولعانداردىڭ داڭقى ۇمىتىلمايدى» تاقىرىبىندا  فوتوقۇجاتتار كورمەلەرى اشىلدى. جۇسىپبەك ايماۋىتوۆ اتىنداعى  مۋزىكالى تەاتردىڭ ارتىستەرى «مايدان اندەرىن ەسكە الايىق» اتتى ءان كەشىنە شاقىرۋدا.   ال, «دوستىق» ءۇيىنىڭ كەڭ زالىندا وبلىستىق مۇراعاتتار ءبولىمى  دايىنداعان «بوزداقتار» اتتى وبلىستان مايدانعا اتتانعاندار جايلى شىققان 3 ەستەلىك كىتاپتىڭ تۇساۋكەسەرىنە ازىرلىك جاسالۋدا. فاريدا بىقاي, «ەگەمەن قازاقستان». * سولتۇستىك قازاقستان وبلىسى ۇلى جەڭىستىڭ 69 جىلدىعىن قىزىلجار وڭىرىندە كەڭىنەن اتاپ ءوتۋدىڭ كەشەندى ءىس-شارالارى جاسالىپ, بۇگىندە كوزى ءتىرى 343 مايدانگەرگە جان-جاقتى قامقورلىق كورسەتۋ بەلگىلەنگەن. ول ءۇشىن جەرگىلىكتى بيۋدجەتتەن 57,7 ميلليون تەڭگە, قايىرىمدىلىق اكتسيالاردان 8,6 ميلليون تەڭگە بولىنگەن. سوندا سوعىس ارداگەرلەرى مەن مۇگەدەكتەردىڭ ارقايسىسى 117600 تەڭگە مولشەرىندە قار­جى­لىق كومەككە يە بولادى. سونداي-اق, ەكى مىڭعا جۋىق مايدانگەرلەردىڭ جەسىرلەرى, تىل ەڭبەككەرلەرى, لەنينگراد قۇرساۋىندا بولعان جاندارعا جەرگىلىكتى قازىنادان 17,2 ميلليون تەڭگە ءبولىنىپ, 9260 تەڭگە كولەمىندە اقشالاي كومەك بەرىلەدى. بۇدان تىسقارى ءىرى كاسىپ­ورىندار مەن جەكەلەگەن كاسىپ­كەرلەر سوعىس جانە تىل اردا­گەرلەرىنە اقشالاي, زاتتاي سىي-سياپات جاسايتىن بولسا, «جاس تي­مۋر­شىلار» ءۇي-ءۇيدى ارالاپ, قولعابىس كومەگىن ۇيىمداستىرادى. پەتروپاۆل قالالىق ارداگەرلەر كەڭەسىنىڭ توراعاسى گريگوري كۋحاردىڭ مالىمدەۋىنشە ەسكى ۇيلەردە تۇرىپ جاتقان سوعىس ارداگەرلەرىنە 100 مىڭ تەڭگەدەن كومەك بەرۋ, «جەڭىس» ساياباعىن جاڭعىرتۋدى جالعاستىرۋ, ستەلا ورناتۋ, ارداگەرلەر ءۇيىن سالۋ شارالارى قاراستىرىلعان. ءومىر ەسقالي. «ەگەمەن قازاقستان». * شىعىس قازاقستان وبلىسى شىعىس وڭىرىندە ۇلى وتان سوعىسى مەن تىل ارداگەرلەرىنە بىرقاتار الەۋمەتتىك كومەكتەر كورسەتىلۋدە. ماسەلەن, وسكە­مەن­دە ءار سوعىس ارداگەرىنە 70 مىڭ تەڭگەدەن جاردەماقى بەرىل­سە, سەمەي قالاسىنداعى اردا­گەر­لەردىڭ ارقايسىسى 50 مىڭ تەڭگە كولەمىندە الەۋمەتتىك كومەك الدى. سونىمەن بىرگە, ارداگەرلەر ءۇشىن ەلەكتر قۋاتىن ءۇش اي بويى تەگىن پايدالانۋ جانە ءتۇرلى جەڭىلدىكتەر قاراستىرىلعان. جالپى, شىعىس قازاقستان وب­لىسىندا 747 ۇوس ارداگەرى بار. ال جەڭىلدىكتەرى جاعىنان ۇلى وتان سوعىسى ارداگەرلەرىنە تەڭەس­تىرىلگەن تۇلعالار سانى – 2616, سوعىس مۇگەدەكتەرىنە تەڭەس­تىرىلگەندەر – 4360, تىل ەڭ­بەك­كەرلەرى 30133 ادامدى قۇ­رايدى. ۇلى جەڭىستىڭ 69 جىلدىق مەرەكەسىندە ءوڭىر باسشىسى ب.سا­پار­باەۆ وبلىستىڭ تۇكپىر-تۇكپى­رىنەن كەلگەن 75 ارداگەرمەن كەزدەستى. باسقوسۋدا ارداگەر­لەر سوعىس جىلدارىنداعى اۋىرت­پالىقتار مەن مايدانداس دوس­تارىن ەسكە الىستى. وسكەمەندە 300-گە جۋىق سوعىس ارداگەرى تۇرسا, ونىڭ ىشىندە 30 قاريا – جەكە سەكتور تۇرعىنى. كەلىسىمى بويىنشا ولاردىڭ اۋلاسىنا «مۇندا ۇوس ارداگەرى تۇرادى» دەگەن جازۋى بار تاقتايشالار ورناتىلدى. جاستاردان قۇرالعان ەڭبەك جاساقتارى ارداگەرلەرگە قول ەڭبەگى تۇرعىسىنان كومەك كورسەتىپ, ۇيلەرى مەن اۋلالارىنا تازالىق جۇمىستارىن جۇرگىزدى. دۋمان اناش, «ەگەمەن قازاقستان».