قازاقستان حالقى اسسامبلەياسىنىڭ «قازاقستان-2050» ستراتەگياسى: بەيبىتشىلىك, رۋحانيات جانە كەلىسىم مادەنيەتى» اتتى ءححى سەسسياسىندا الداعى ۋاقىتتا ەلىمىزدەگى ۇلتارالىق تاتۋلىقتى, تۇراقتىلىقتى نىعايتۋ جولىندا, بىرلىگىمىزدى بەكەمدەۋگە بايلانىستى تاپسىرمالار جۇكتەلدى. كەلەر جىل «قازاقستان حالقى اسسامبلەياسىنىڭ جىلى» دەپ جاريالاندى. بىرلىگىمىز –جاراسىمدى, ماقساتىمىز – ايقىن.
وبلىس ورتالىعىنداعى دوستىق ۇيىندە وتكەن جيىنعا ءوڭىرىمىزدەگى بارلىق ەتنومادەني ءبىرلەستىكتەردىڭ, جاستار قۇرىلىمدارى مەن ارداگەرلەر كەڭەسى, قوعامدىق جانە ءدىني ۇيىمداردىڭ وكىلدەرى قاتىستى. مىسالى, جەلەزين اۋدانىنداعى «نەۋپوكوەۆ» شارۋا قوجالىعىنىڭ باسشىسى ۆلاديمير نەۋپوكوەۆتىڭ ايتۋىنشا, تىڭ يگەرۋ كەزىندە كەلگەن اتا-اناسى قازاق جەرىنە باۋىر باسىپ قالىپتى.ۇرپاق جالعاستى. اۋىلدا كوكتەمگى ناۋقان باستالدى, جۇمىس, شارۋا قوجالىعىندا ءبارى دە كۇندىز-ءتۇنى ەڭبەك ەتۋدە.
اقسۋ قالاسى «سلاۆيان» ەتنومادەني بىرلەستىگىنىڭ ءتورايىمى ۆالەنتينا سولداتكينا الداعى ۋاقىتتا اقسۋ قالاسىندا دا دوستىق ءۇيى بوي كوتەرمەكشى ەكەنىن, ونىڭ اسسامبلەيا جۇمىسىنا سەرپىن, جىگەر قوسارى انىق ەكەنىن, بۇل جاڭالىققا قۋانىشتى ەكەنىن جەتكىزدى. ال وبلىستىق چەشەن-ينگۋش ەتنومادەني بىرلەستىگىنىڭ بەلسەندى مۇشەسى حابا ماحمۇدوۆا دا ساياسي قۋعىن-سۇرگىنگە ۇشىراعان, قازاق جەرىنەن تىنىشتىق تاپقان ۇلتتىڭ ۇرپاعى ەكەن. ۇلكەندەر بىزگە ىلعي دا «قازاق جۇرتىن قۇرمەتتەڭدەر! باۋىرىمىز دەپ بىلىڭدەر!» دەپ تاربيەلەپ, امانات ايتىپ كەتتى.سوندىقتان, اماناتقا داق تۇسىرمەيمىز, اسسامبلەيانىڭ بولاشاق بالالارى ءوسىپ كەلەدى, دەيدى بىزبەن اڭگىمەسىندە.
وبلىس اكىمى قانات بوزىمباەۆ ءوز بايانداماسىندا ەلىمىزدەگى بىرەگەي قوعامدىق ينستيتۋتتىڭ ۇلگى الارلىق قىزمەتتەرىن ايتىپ ءوتتى. ەلباسى وبلىستارداعى قازاقستان حالقى اسسامبلەياسىنىڭ الداعى اتقارار مىندەتتەرىن جاقسارتۋدى, وڭىردەگى ۇلتارالىق تۇراقتىلىقتى ساقتاۋ باعىتىندا بەلسەندى, جۇيەلى جۇمىس جاساۋ كەرەكتىگىن ەسكەرتكەن بولاتىن:
– بىرىنشىدەن, وبلىستىق قازاقستان حالقى اسسامبلەياسى جۇمىسىنا ۇيىمداستىرۋ جانە قارجىلىق جاعىنان قولداۋ كورسەتىلەدى. بۇل باعىتقا جىل سايىن جەرگىلىكتى بيۋدجەتتەن 20 ميلليون تەڭگەدەن استام قاراجات ءبولىنىپ كەلدى. ءبىرلەستىك جەتەكشىلەرىنە گرانتتار تاعايىندالادى, ۇلتتىق كيىمدەر تىگۋگە قوسىمشا قارجى بەرىلەدى. ەكىنشىدەن, قازاق ءتىلىن جانە وزگە ەتنوستاردىڭ تىلدەرىن دامىتۋ قاجەت. ۇشىنشىدەن جاستارعا پاتريوتتىق, تولەرانتتىلىق تاربيە بەرۋگە جۇمىلۋ باستى نازاردا. تورتىنشىدەن, ۇلتارالىق كەلىسىم تاقىرىبىنداعى عىلىمي-زەرتتەۋ جۇمىستارىنا كوڭىل بولىنسە, بەسىنشىدەن, اقپاراتتىق-ناسيحات, بەلسەندىلىك قاجەت, –دەگەن ەدى وبلىس اكىمى.
ال, بۇل كۇندەرى سۇلتانماحمۇت تورايعىروۆ اتىنداعى ۋنيۆەرسيتەتتە دە ستۋدەنتتىك اسسامبلەيا جانىنان ارنايى كافەدرا اشىلدى. جانە دە دوستىق ءۇيى جانىنداعى «مەديا-ورتالىقتا» «شاڭىراق» اتتى گازەت شىعادى. جيىندا وبلىستاعى ەرتىس, ماي, ۋسپەن, باياناۋىل اۋداندارىندا جەرگىلىكتى اسسامبلەيانىڭ اۋدان ورتالىقتارىنداعى فيليالدارىن اشۋعا تاپسىرما بەرىلدى. مەملەكەتتىك ءتىل – قازاق ءتىلىن ۇيرەنۋشى وقۋشى بالالار ءۇشىن جازعى كانيكۋل كۇندەرى لينگۆيستيكالىق لاگەر جۇمىسىن باستاماقشى. وڭىردە ءومىر ءسۇرىپ جاتقان ءتۇرلى ەتنوستاردىڭ ءمادەني قۇندىلىقتارىن, سالت-ءداستۇرلەرىن تانىستىرۋ جولىندا ەتنوتۋريزم, «ءۇش تۇعىرلى ءتىل» باعدارلامالارىن جۇزەگە اسىرۋ ماقساتىندا تۋريستىك مارشرۋتتار جولعا شىعىپ, بالالارعا ارنالعان كىتاپتار, سوزدىكتەر جارىق كورەدى.
جيىن بارىسىندا ق.بوزىمباەۆ ۇلتارالىق كەلىسىم مەن تاتۋلىقتى نىعايتۋ ىسىنە ۇلەس قوسىپ جۇرگەن, ءبىزدىڭ گازەتىمىزدىڭ وتكەندەگى ءبىر سانىندا سۇحبات بەرگەن «ەلپيدا» گرەك ەتنومادەني بىرلەستىگىنىڭ ءتورايىمى ليۋدميلا يفاندوپۋلوعا ەلباسى نۇرسۇلتان نازارباەۆتىڭ اتىنان قحا-نىڭ قوعامدىق «بىرلىك» التىن مەدالىن تابىستادى.
فاريدا بىقاي,
«ەگەمەن قازاقستان».
پاۆلودار وبلىسى.