مادەنيەت ۇيىندە قازاقستان حالقى اسسامبلەياسى توراعاسىنىڭ ورىنباسارى, پارلامەنت سەناتىنىڭ دەپۋتاتى اناتولي باشماكوۆتىڭ قاتىسۋىمەن وبلىستىق اسسامبلەيانىڭ ءحىح سەسسياسى ءوتتى. وندا نۇرسۇلتان نازارباەۆتىڭ قازاقستان حالقى اسسامبلەياسىنىڭ ءححى-سەسسياسىندا سويلەگەن سوزىنەن تۋىندايتىن مىندەتتەردى جۇزەگە اسىرۋ شارالارى بەلگىلەندى.
ايماق باسشىسى وبلىستىق قازاقستان حالقى اسسامبلەياسىنىڭ توراعاسى سامات ەسكەندىروۆ جيىندى كىرىسپە سوزبەن اشىپ, «قازاقستان-2050» ستراتەگياسى: بەيبىتشىلىك, رۋحانيات جانە كەلىسىم» تاقىرىبىندا وتكەن سەسسيادا ەلباسى بىرلىكتى ەل بولۋ, ۇلتتى ۇلى ىستەرگە ۇيىستىرۋ, بەيبىتشىلىك, رۋحانيات, كەلىسىم قۇندىلىقتارىنىڭ باستاۋى مادەنيەتتەن باستالاتىنىن, تولەرانتتىلىق, دوستىق پەن باۋىرلاستىق يدەيالارى قازاقستاندىقتار ءۇشىن ءومىر ءسۇرۋ مازمۇنىنا اينالعانىن اتاپ كورسەتكەنىن جەتكىزە كەلىپ, ورتاق وتانىمىزدى وركەندەتۋ جولىندا سولتۇستىكقازاقستاندىقتاردىڭ ايانباي ەڭبەك ەتەتىنىنە سەنىم ءبىلدىردى. وبلىستىق اسسامبلەيا مەن ءتيىستى ۆەدوموستۆولار الدىنا اسسامبلەيانىڭ جانە اتا زاڭىمىزدىڭ 20 جىلدىق مەرەيتويلارىن ءوز دارەجەسىندە اتاپ ءوتۋ, «بەيبىتشىلىك پەن كەلىسىمنىڭ «جول كارتاسى» مەگە-جوباسى اياسىندا» دوستىق ەستافەتاسىن لايىقتى قارسى الۋ, وبلىستىق اسسامبلەيانىڭ سايتىن جاساۋ, «جاسىل ەل» باعدارلاماسى بويىنشا دوستىق پەن كەلىسىم ساياباعىن اشۋ سياقتى بىرقاتار تاپسىرمالار جۇكتەدى. ودان ءارى ەۋرازيالىق ينتەگراتسيانىڭ مەملەكەت باسشىسى بەلگىلەپ بەرگەن ستراتەگيانىڭ باسىم باعىتتارىنا توقتالدى. قىزىلجار ءوڭىرى رەسەيدىڭ شەكارالاس تۇمەن, ومبى, قورعان وبلىستارىمەن ەكونوميكالىق, ساۋدا-ساتتىق ءورىسىن كەڭەيتىپ كەلەدى. كەدەن وداعى شەڭبەرىندە 2010 جىلدان بەرى جالپى تاۋار اينالىمى 15 پايىزعا ءوسىپ, 777 ميلليون دوللاردى قۇرادى. ەكسپورت 2,5 ەسە, يمپورت 8,5 پايىز ۇلعايدى.
«باربانگ» كۇردتەر قاۋىمداستىعىنىڭ وبلىستىق فيليالىنىڭ جەتەكشىسى راشيد ناديروۆ, ع.ءمۇسىرەپوۆ اۋدانىنداعى «ترەمبيتا» ۋكراين ەتنومادەني بىرلەستىگىنىڭ ءمۇشەسى ناتاليا پەتروۆا ءوز ۇسىنىس-تىلەكتەرىن مەملەكەتتىك تىلدە جەتكىزدى.
باسقوسۋدا ا.باشماكوۆ ەلباسى تاپسىرمالارىن جەرگىلىكتى جەرلەردە كەڭىنەن ناسيحاتتاۋ جايىن اتاپ ءوتتى.
«قور ورتالىعى» جشس ديرەكتورى جاسۇلان احمەتوۆكە, «ۆيدەرگەبۋرت» نەمىس ەتنومادەني بىرلەستىگىنىڭ ءتورايىمى ەلۆيرا كوۆزەلگە قازاقستان حالقى اسسامبلەياسىنىڭ قوعامدىق «بىرلىك» التىن مەدالى سالتاناتتى تۇردە تاپسىرىلدى. ۇلتارالىق بىرلىكتى ساقتاۋعا جانە ناسيحاتتاۋعا ەلەۋلى ۇلەس قوسقان ءبىر توپ ادام اسسامبلەيانىڭ قۇرمەت گراموتاسىمەن, العىس حاتىمەن ماراپاتتالدى.
وبلىستىق اسسامبلەيا توراعاسىنىڭ ورىنباسارلىعىنا «ۆايناح» چەشەن-ينگۋش قوعامدىق ۇيىمىنىڭ توراعاسى مۇسا داداەۆ سايلاندى.
سەسسياعا قاتىسۋشىلار وبلىس جۇرتشىلىعىنا ارناپ ۇندەۋ قابىلدادى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.