بۇگىن ۇكىمەت وتىرىسىندا ەنەرگەتيكا ءمينيسترى بولات اقشولاقوۆ كۇزگى ەگىس جۇمىستارى كەزىندە ديزەل وتىنىنىڭ باعاسى قالاي سارالاناتىنىن ايتتى, دەپ حابارلايدى Egemen.kz.
«ەنەرگەتيكا مينيسترلىگى ترانزيتتىك كولىك ءۇشىن جانە شەكارا پەريمەترى بويىنشا ديزەلدىك وتىنعا سارالانعان باعا بەلگىلەيتىن بۇيرىق جوباسىن ازىرلەدى. باعالار تۇرعىلىقتى جەرىنە, تۇتىنۋ كولەمىنە جانە كولىك تۇرىنە قاراي سارالانادى. بۇيرىق جوباسى بويىنشا ءبىزدىڭ ازاماتتارىمىز ءۇشىن جۇرگىزۋشى كۋالىگى بولعان جاعدايدا ليميت – 100 ليتر ديزەل وتىنى ءۇشىن قازىرگى باعامەن 230-260 تەڭگە. سونداي-اق جۇك كولىگى ءۇشىن ەگەر جۇرگىزۋشى كۋالىگى جانە كولىكتىڭ قازاقستان اۋماعىندا تىركەلگەنىن راستايتىن تىركەۋ كۋالىگى مەن قۇجاتتار بار بولسا, قازىرگى ليميت – 300 ليتر بولادى», دەدى ب.اقشولاقوۆ.
ونىڭ ايتۋىنشا, قالعان ادامدارعا ديزەل باعاسى قىمبات بولادى.
«قالعان ادامدار توبىنا جانە كورسەتىلگەن كولەمدەردەن ارتىق ديزەل ءۇشىن 1 ليتر وتىن باعاسى 450 تەڭگەدەن ساتىلادى. بۇيرىق جوباسى 18 تامىزعا دەيىن «اشىق نقا» سايتىنا ونلاين تالقىلاۋ ءۇشىن ورنالاستىرىلدى», دەدى ول.
ءوز كەزەگىندە پرەمەر-مينيستر اتالعان بۇيرىق جوباسىن تەزىرەك پىسىقتاپ, 20 قىركۇيەكتەن باستاپ قولدانىسقا ەنگىزۋدى تاپسىردى.