بيىل اتىراۋ وبلىسىنىڭ اۋىلدارىن گازداندىرۋعا 1 ملرد تەڭگە بولىنگەن, دەپ حابارلايدى Egemen.kz.
ەنەرگەتيكا ءمينيسترى بولات اقشولاقوۆتىڭ مالىمەتىنە سۇيەنسەك, اتىراۋ وبلىسىندا گازداندىرۋ دەڭگەيى 98,7% قۇراپ وتىر. قازىر ءوڭىردىڭ 660 مىڭ تۇرعىنى تابيعي گازبەن قامتاماسىز ەتىلگەن.
«ۇلتتىق ەكونوميكا مينيسترلىگى بەكىتەتىن اتىراۋ وبلىسىنداعى تابيعي گازدىڭ تۇپكىلىكتى باعاسى 1 تەكشە مەتر ءۇشىن 5,3 تەڭگەنى, ال, اتاۋلى الەۋمەتتىك كومەك الۋشىلارعا 1 تەكشە مەتر گاز باعاسى 4,2 تەڭگەنى قۇرايدى. بۇل – ەلىمىزدەگى ەڭ تومەن باعا», دەدى بولات اقشولاقوۆ.
ءمينيستردىڭ دەرەگىنە قاراعاندا, بيىل بەكىتىلگەن رەسپۋبليكالىق بيۋدجەتتە 3 جاڭا جوبانى ىسكە اسىرۋعا 1 ملرد تەڭگە كوزدەلگەن.
«بۇل – يساتاي اۋدانىنداعى قىزىل ءۇي, جاسقايرات اۋىلدارىن گازبەن جابدىقتاۋ, سونداي-اق, قىزىلقوعا اۋدانىنىڭ تاسقۇدىق, سوركول, سارىقۇماق, بىلقىلداقتى, قوڭىراۋلى, كەنباي ەلدى مەكەندەرىنە گاز قۇبىرى جەلىلەرىن سالۋ جوبالارى. اتالعان جوبالاردى ىسكە اسىرۋ ينفراقۇرىلىمدى جۇرگىزۋگە, شامامەن 1 300 ادامدى گازبەن قامتاماسىز ەتۋگە مۇمكىندىك بەرەدى», دەپ ءمالىم ەتتى ەنەرگەتيكا ءمينيسترى.
سونداي-اق, مەملەكەت باسشىسىنىڭ تاپسىرماسىنا سايكەس, «ماقات-سولتۇستىك كاۆكاز» ماگيسترالدى گاز قۇبىرى لۋپينگىنىڭ قۇرىلىسى» ينۆەستيتسيالىق جوباسى ىسكە اسىرىلىپ جاتىر. بۇل مۇنايلى ءوڭىردىڭ وركەندەۋ قاجەتتىلىگىن ەسكەرە وتىرىپ, تابيعي گازدىڭ قوسىمشا كولەمىن تاسىمالداۋعا جول اشادى.