«جاسىل دامۋ» اق «وندىرۋشىلەردىڭ كەڭەيتىلگەن مىندەتتەمەلەرى» وپەراتورى جشس-نىڭ راستالعان مىندەتتەمەلەرى بويىنشا «EcoQolday» جوباسىنىڭ قاتىسۋشىلارىنا تولەم جۇرگىزۋدى باستادى. ورىنداعان مىندەتتەمەلەرىن راستايتىن قۇجاتتارىن ۋاقتىلى ۇسىنعان 26 كومپانياعا بۇگىندە 105 ميلليون تەڭگەدەن استام قارجى تولەندى.
ەستەرىڭىزگە سالا كەتەيىك, اۆتوكومپونەنتتەر مەن قاپتاما قالدىقتارىن جيناپ, كادەگە جاراتۋ بويىنشا «EcoQolday» جوباسىنا قاتىسقان كاسىپورىنداردىڭ راستالعان مىندەتتەمەلەرى ورىندالاتىنى تۋرالى حابارلانعان بولاتىن. «وندىرۋشىلەردىڭ كەڭەيتىلگەن مىندەتتەمەلەرى» وپەراتورىمەن جاسالعان بۇرىنعى شارتتار شەڭبەرىندە مىندەتتەمەلەرىن ورىنداعان, كورسەتىلگەن قىزمەتتەردى قۇجات جۇزىندە راستاعان كونتراگەنتتەرگە 2021 جىلدىڭ ءتورت توقسانى ءۇشىن تولەم جۇرگىزىلەدى.
تولەمدەردى الۋ ءۇشىن «وندىرۋشىلەردىڭ كەڭەيتىلگەن مىندەتتەمەلەرى» وپەراتورى جشس-مەن جاسالعان شارتتىڭ قۇقىقتار مەن مىندەتتەمەلەرىن كاسىپورىندار «جاسىل دامۋ» اق-عا بەرۋ جونىندە جازباشا كەلىسىم مەن نەگىزدەمەلىك شارتقا قوسىمشا ۇشجاقتى كەلىسىم جانە 2022 جىلعى ءساۋىردىڭ 30 دەيىنگى سالىستىرۋ اكتىلەرىن ۇسىنۋى قاجەت.