كاسىپكەردى ولتىرگەن كۇدىكتىلەر ۇستالدى

تامىزدىڭ 6-سى كۇنى كەشكى ساعات 19:55 شاماسىندا ورال قالاسىنداعى يساتاي-ماحامبەت كوشەسىنىڭ بويىنداعى «راحات-لۋكۋم» كاراوكە-مەيرامحاناسىن­دا بەلگىسىز ەكى ادام 1973 جىلى تۋعان كاسىپكەر ازاماتتى پىشاقتاپ كەتكەنى تۋرا­لى اقپارات الەۋمەتتىك جەلىگە تەز تارادى. العان جاراقاتىنان اتويان اتىنداعى ستاديون ماڭىندا قايتىس بولعان كاسىپ­كەر­دىڭ ەسىمى ەركىن مۇقانعاليەۆ ەكەنى, «گۇلشەتاي» (بۇرىنعى «استوريا» مەيرامحاناسى) كافەسى مەن «ماحاببات» مەيرامحاناسىنىڭ يەسى بولعانى ايتىلا باستادى.

كوپ كەشىكپەي-اق بەينەباقىلاۋ كامەراسىنان وقيعانىڭ قالاي بولعانى انىق كورىندى. قارا كيىم كيگەن قوس جىگىت پەن كاسىپكەر ءبىر ۇستەلدىڭ باسىندا اۋەلى قاراما-قارسى وتىرادى. كۇدىكتىنىڭ ءبىرى ورنىنان تۇرىپ, كاسىپكەردىڭ جانىنا تىقسىرا جايعاسادى, كاسىپكەر ىعىسىپ, ورنىنان تۇرعان ساتتە ەكىنشىسى – قابا ساقالدى, شولاق شالبارلى جىگىت كىشكەنە سومكەدەن پىشاققا ۇقساس نارسەنى سۋىرىپ الىپ, وڭ قولىمەن مويىن تۇسىنان سىلتەپ قالادى. سوققىنىڭ جەدەل ءارى ءدال بولعانى سونداي, بەينەجازبادا اينالاعا شاشىراعان, ىتقىپ شىققان قان «فونتانى» انىق كورىنگەن. قاسكويدىڭ ءبىرى وقيعا ورنىنا كەلگەن مەيرامحانا قىزمەتكەرىن قاقپايلاپ, كومەككە جىبەرمەسە, ەكىنشىسى كاسىپكەرگە تاعى دا بىرنەشە سوققى جاسايدى.

بۇدان كەيىن كوشەدەگى بەينەباقىلاۋ كامەراسى قارا كيىمدى قوس جىگىتتىڭ قاشىپ بارا جاتقان بەينەسىن جازىپ العان. ال­عاش­قى بەينەجازباداعى پىشاق سىلتە­گەن قابا ساقالدى, شولاق شالبارلى جىگىت­تىڭ ەكى قولى قىپ-قىزىل قان ەكەنى انىق كورىنەدى.

ارينە, پوليتسيا قىزمەتكەرلەرى بولعان وقيعاعا وراي قىلمىستىق كودەكستىڭ 99-بابى بويىنشا ءىس اشىلىپ, سوتقا دەيىنگى تەرگەۋ امالدارىن باستاپ كەتتى. كۇ­دىك­تىنىڭ ءبىرى ساقالدى, شولاق بالاقتى بولعانىنا قاراپ, حالىق اراسىندا كىسى ولتىرۋشىلەردى دەسترۋكتيۆتى ءدىني اعام وكىلدەرى ەكەن دەگەن قاۋەسەت جەلدەي ەستى. بىراق باتىس قازاقستان وبلىستىق پوليتسيا دەپارتامەنتى قىلمىستىڭ استارىندا تۇرمىستىق كەلىسپەۋشىلىك جاتقانىن, ناقتىراق ايتقاندا, جالاقى ماسەلەسىنەن تۋعانىن حابارلادى. «كۋاگەرلەردىڭ كور­سەتۋىنە قاراعاندا, كىسى ءولتىرۋدىڭ نە­گىز­گى سەبەبى – تۇرمىستىق سەبەپتەن, ياعني تولەنبەگەن جالاقى ماسەلەسىنەن تۋىنداعان. كۇدىكتىلەردىڭ ۋاححابيزم نەمەسە باسقا دا تەرىس ءدىني اعىمداردىڭ راديكالدى يدەيالارىن ۇستانعانى نەمەسە تاراتقانى تۋرالى مالىمەت جوق», دەلىنگەن پوليتسيا تاراتقان اقپاراتتا.

كۇدىكتىلەردىڭ كىم ەكەنى جانە فوتو­سۋرەتى كەشىكپەي-اق ءمالىم بولدى. باتىس­قازاق­ستاندىق پوليتسيا 7 تامىز كۇنى اسا اۋىر قىلمىس جاسادى دەگەن كۇدىكپەن 1991 جىلى تۋعان رۋسلان قوجانتاەۆ پەن 2001 جىلى تۋعان تۇرلان امانگەلدىگە ىزدەۋ جاريالادى. ولاردىڭ سۋرەتى وبلىستىڭ بۇكىل اۋدانىنا جانە كورشىلەس وڭىرلەرگە, ءتىپتى رەسەي فەدەراتسياسىنىڭ شەكارالاس ايماقتارىنا دا تاراتىلدى. اسىرەسە ورال قالاسىنىڭ ىرگەسىندەگى ساياجايلار اسكەر مەن قۇقىق قورعاۋ قىزمەتكەرلەرىنىڭ كۇشىمەن قورشاۋعا الىنىپ, جول بويىندا كولىكتەردى تەكسەرۋ باستالدى. جارىق كۇندە, حالىقتىڭ كوز الدىندا, اسقان قاتىگەزدىكپەن جاسالعان قىلمىس جۇرتتى شوشىتىپ, قوعام نارازىلىعىن تۋدىردى. ورالداعى وسىناۋ قىلمىستى جەدەل اشۋ ماسەلەسىن رەسپۋبليكا ىشكى ىستەر ءمينيسترى ءوز باقىلاۋىنا الدى.

«قىلمىس جاسالعان ساتتەن باستاپ باتىس قازاقستان وبلىسى پوليتسيا دەپار­تامەنتىنىڭ جەكە قۇرامى تۇگەل جۇمىل­دى­رىلىپ, كۇدىكتىلەردى قۇرىقتاۋ ءۇشىن كەڭ كولەمدە جەدەل ىزدەستىرۋ جۇمىستارى جۇرگىزىلىپ, قىلمىس ورنىنا جاقىن جەردە ورنالاسقان بارلىق باۋ-باقشا, ساياجاي تەكسەرىلدى. 2022 جىلدىڭ 8 تامىزى كۇنى ساعات 10:30 شاماسىندا ورال قالاسى كوكتەم سايا­جايىندا وسى قىلمىستى جاساعان كۇ­دىك­تىلەر – 1991 جىلى تۋعان جانە 2001 جىلى تۋعان ەكى ازامات قۇ­رىق­تالىپ, پوليتسيا دەپارتامەنتىنە جەت­كىزىلدى», دەدى باتىس قازاقستان وبلىسى پوليتسيا دەپارتامەنتى باستىعىنىڭ ءبىرىنشى ورىنباسارى جانبولات جانشين.

كۇدىكتىلەرگە قىلمىستىق كودەكستىڭ 99-بابى 2-تارماعى بويىنشا ايىپ تاعىلعان, بۇل قىلمىسقا 20 جىلدان ءومىر بويى باس بوستاندىعىنان ايىرۋعا دەيىن جازا قاراستىرىلعان.

ورالداعى وقيعا الەۋمەتتىك جەلىلەردە ەرەكشە تالقىلانىپ جاتىر. كەيبىر جە­لىدە مارقۇم كاسىپكەردى «كىسى اقىسىن جەيتىن, جۇرتقا جاعىمسىز تۇلعا» رەتىندە قوعامدىق پىكىر قالىپتاستىرۋ ارەكەتى دە بايقالىپ قالادى. تاعى ءبىر نۇسقادا «مەيرامحانادا كاۋاپ ءپىسىرۋشى بولىپ قىزمەت ەتكەن كۇدىكتىنىڭ ۇنەمى اينالاسىنا راديكالدى يدەيالاردى تاراتىپ, ارىپتەستەرىمەن ءتىل تابىسا الماعانى ءۇشىن جۇمىستان قۋىلعانى» تۋرالى اڭگىمە ايتىلادى. كوپشىلىكتىڭ پىكىرى «تەرىس ءدىن وكىلدەرىنە مەملەكەت تاراپىنان قاشان توقتام بولادى؟!» دەگەن تالاپ-تىلەككە تولى. قالاي بولعاندا دا ورال قالاسىندا بولعان وسىناۋ جانتۇرشىگەرلىك كىسى ءولىمى تەرەڭ زەرتتەۋدى كۇتەدى. سونىڭ ىشىندە تەرگەۋ ورىندارى وقيعانىڭ سەبەبى مەن سالدارىن جاسىرماي, جالپىعا جاريالاۋى كەرەك-اق.

باتىس قازاقستان وبلىسى