ەلورداداعى ۇلتتىق اكادەميالىق كىتاپحانادا زاڭعار جازۋشى مۇحتار اۋەزوۆتىڭ 125 جىلدىعىنا وراي تۇرىك تىلىنە اۋدارىلعان اكادەميك زەينوللا قابدولوۆتىڭ «مەنىڭ اۋەزوۆىم» رومان-ەسسەسىنىڭ تۇساۋكەسەرى ءوتتى, دەپ حابارلايدى Egemen.kz.
تۇساۋكەسەرگە مادەنيەت جانە سپورت ءمينيسترى داۋرەن اباەۆ, حالىقارالىق تۇركسوي ۇيىمىنىڭ باس حاتشىسى سۋلتان راەۆ, مەملەكەت جانە قوعام قايراتكەرى مۇرات اۋەزوۆ, سونداي-اق, زەينوللا قابدولوۆتىڭ ۇرپاقتارى, پرەزيدەنتتىڭ كەڭەسشىسى باۋىرجان ومار ۇلى جانە باسقا دا زيالى قاۋىم وكىلدەرى مەن بەلگىلى عالىمدار قاتىستى.
سونداي-اق تۇركسوي ۇيىمىنىڭ باس حاتشىسى, بەلگىلى قالامگەر-دراماتۋرگ سۇلتان راەۆ تۇركى الەمىنە سىڭىرگەن قىزمەتى ءۇشىن تۇركى اكادەمياسىنىڭ ناۋاي اتىنداعى التىن مەدالمەن ماراپاتتالدى.