الداعى ۋاقىتتا فرانتسيادا يادرولىق سىناقتارعا قارسى حالىقارالىق ءىس-قيمىل كۇنىنە وراي كورمە ۇيىمداستىرىلماق. مىنە, وسى ءىس-شاراعا قازاقتىڭ اتاقتى سۋرەتشىسى كارىپبەك كۇيىكوۆتىڭ قاتىسۋى ءۇشىن ەل ازاماتتارى, قامقور جاندار قارجىلاي كومەك قولىن سوزىپ وتىر.
حالىقارالىق انتيادرولىق قوزعالىستىڭ بەلسەندى مۇشەسى ك.كۇيىكوۆتى ەل-جۇرت اۋزىمەن, اياعىمەن سۋرەت سالاتىن تالانتتى سۋرەتشى, اتوم جوباسىنىڭ قۇرمەتتى ەلشىسى رەتىندە تانيدى. ونىڭ ەڭبەگىن تەك قازاقستاندىقتار عانا ەمەس, الەم حالقى جوعارى باعالايدى. مىنە, وسىنداي ازامات الگىندەي جوعارى دەڭگەيلى كورمەگە قاتىسۋعا ءتيىس.
بيىلعى قىركۇيەكتە فرانتسيانىڭ رەنن جانە پاريج قالالارىندا كارىپبەك كۇيىكوۆ يادرولىق قارۋعا قارسى تاقىرىپتاعى شىعارمالارىن ۇسىنباق. ول ەندى جولكىرەگە قارجى جيناۋعا كومەكتەسكەندەردىڭ ارقاسىندا ول جاققا بارا الادى. بۇعان دەيىن ك.كۇيىكوۆ جەرلەستەرىنە ۇندەۋ تاستاپ, ەسەپ-شوت اشقان بولاتىن. ك.كۇيىكوۆتىڭ ۇندەۋى ءبىر-ەكى كۇندە الەۋمەتتىك جەلىدە كەڭىنەن تاراپ, قايىرىمدى جاندار سۋرەتشىنىڭ فرانتسياعا بارۋى ءۇشىن قاراجات جيناي باستادى. ءبىر اپتاعا جەتەر-جەتپەس ۋاقىت ىشىندە ولار قاجەتتى سوما – 6,5 مىڭ ەۋرونى (3,1 ملن تەڭگە) جيناپ ۇلگەردى.
«بۇل ازاماتتىق باستاما وسى كوكتەمدە تۋعان. ارينە, جوبانى مەملەكەتتىك قارجىلاندىرۋ تۋرالى ءسوز بولعان جوق. فرانتسيا تاراپى كورمەلەردى ۇيىمداستىرىپ وتىرعانىمەن, بىراق ولاردا مەنىڭ ساپارىم ءۇشىن قاراجات قارالماعان. سوندىقتان ءبىز وسىلايشا قايىرىمدىلىق اكتسياسىن باستاۋدى ءجون كوردىك», دەيدى سۋرەتشى.
ك.كۇيىكوۆ ساپارعا شىعۋ ءۇشىن قاراجات جيناۋعا كومەكتەسكەن قازاقستاندىقتارعا العىسىن ءبىلدىردى. «بەلسەندىلىك تانىتىپ, قولداۋ كوسەتكەن قازاقستاندىقتاردىڭ مەيىرىمدىلىگى مەنى شىن جۇرەكتەن تاڭعالدىردى. جەرلەستەرىم جوبا يدەياسىن سونشالىقتى تەز ءارى جوعارى دەڭگەيدە قولدايدى دەپ كۇتپەگەن ەدىم. اتسالىسقانداردىڭ بارلىعىنا العىسىمدى بىلدىرەمىن. بۇل – ماعان جەكە قولداۋ كورسەتۋ عانا ەمەس, مەنىڭ ەڭبەگىمدى, مەن ءۇشىن ءومىرىمنىڭ ءمانىنىڭ, قانشاما جىل بويى يادرولىق سىناقتاردان زارداپ شەككەن تۋعان جەرىمدى قورعاۋ جولىنداعى كۇرەسىمنىڭ باعالانۋى, سونداي-اق بۇل – ءبارىمىز سياقتى بەيبىت اسپان استىندا ءومىر ءسۇرۋ مۇمكىندىگىنە يە بولامىز دەپ ۇمىتتەنەتىن بولاشاق ۇرپاقتى قورعاۋداعى قادام», دەيدى كارىپبەك كۇيىكوۆ.
قازاقستاننىڭ فرانتسياداعى باس كونسۋلدىعى دا ستراسبۋرگتە قازاقستاندىق سۋرەتشىنىڭ كورمەسىن وتكىزۋدى ۇسىنۋدا. وسىلايشا, كارىپبەك كۇيىكوۆتىڭ تۋىندىلارى ءۇش قالادا: رەنن, پاريج جانە ستراسبۋرگتە كورسەتىلەدى.
كارىپبەك كۇيىكوۆتىڭ انتيادرولىق تاقىرىپتاعى كارتينالارى جاپونيادا, اقش-تا, شۆەيتساريادا كورمەگە قويىلعان. ال فرانتسيادا كورسەتىلمەگەن ەكەن. كارىپبەك جاڭا تۋىندى جاساپ, رەنن قالاسىنا تارتۋدى جوسپارلاپ وتىر.