فۋتبولدان قازاقستان ۇلتتىق قۇراماسىنىڭ باس باپكەرى ماگومەد اديەۆ باق وكىلدەرىنەن ەڭ ءجيى جولداناتىن سۇراقتارعا قاتىستى پىكىر ءبىلدىردى, دەپ حابارلايدى Egemen.kz.
«بۇگىندە قازاقستان قۇراماسىنىڭ جۇمىسىنا عانا زەيىن اۋدارامىن. قازاقستان فۋتبول فەدەراتسياسىمەن كەلىسىمشارتىم بار. الدا ماڭىزدى ەكى ويىن كۇتىپ تۇر. سول سەبەپتى كەلىسىم اياقتالماي قىزمەتىمنەن كەتپەيمىن. ەشقانداي كۇمان كەلتىرۋدىڭ قاجەتى جوق.
جاقىندا عانا قازاقستان كۋبوگىنىڭ «اقتوبە» – «تاراز» ويىنىنا باردىم. تالداۋ جۇمىستارى جۇرگىزىلدى. ءبىزدىڭ باپكەرلىك شتاب بەلارۋس جانە ازەربايجان ويىندارىنا تولىق دايىندىق جۇرگىزىپ جاتىر.
كەيبىر باق-تا تاراعان اقپاراتتارعا توقتالا كەتسەك, ءار باپكەردىڭ ومىرىندە ونداي اڭگىمەلەر بولىپ تۇرادى. مەن قازىرگى تاڭدا قازاقستاندامىن. كۇزدە وتەتىن ۇلتتار ليگاسىنىڭ ويىندارىنا بىرقاتار ۇمىتكەردى قاراپ جاتىرمىن», دەدى ۇلتتىق قۇرامانىڭ باس باپكەرى.