ەلىمىزدە جىل باسىنان بەرى 6000 بالا كوروناۆيرۋس جۇقتىرعان. بۇل تۋرالى وكق-دە وتكەن ءباسپاسوز ءماسليحاتىندا دەنساۋلىق ساقتاۋ ءمينيسترى اجار عينيات ايتتى, دەپ حابارلايدى Egemen.kz.
«جىل باسىنان بەرى كوروناۆيرۋسپەن 6 مىڭنان استام بالا اۋىردى. قازىرگى تاڭدا اۋرۋحانالاردا 423 بالا ەمدەلىپ جاتىر. ءاربىر بالانىڭ دەنساۋلىعىن مينيسترلىكتىڭ دەڭگەيىندە قاراپ وتىرامىز. جەدەل شتابىمىز بار ەكەنىن, بالالاردىڭ دەنساۋلىعى ۇنەمى قارالىپ وتىراتىنىن ايتقان بولاتىنمىن», دەدى ۆەدومستۆو باسشىسى.
سونداي-اق, ول اتالعان بالالاردىڭ سىرقاتتى قالاي وتكەرىپ جاتقانىنا توقتالدى.
«قازىر اۋىرىپ جاتقان بالالاردىڭ 21 پايىزى جەڭىل, 77 پايىزى ورتاشا, 0,7 پايىزى اۋىر وتكەرىپ جاتىر. ياعني, قازىر 3 بالا رەانيماتسيادا جاتىر. ول بالالاردىڭ دەنساۋلىعىن دارىگەرلەر, سونىڭ ىشىندە رەسپۋبليكالىق دەڭگەيدەگى ماماندار ەمدەۋگە ارالاسىپ وتىر», دەدى مينيستر.