گرۋزيادا كوز جۇمعان اسەل ايتپاەۆانىڭ ولىمىنە قاتىستى ادامعا ۇكىم شىقتى

«2022 جىلعى 2 تامىزدا نۇر-سۇلتان قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا م-گە قاتىستى جابىرلەنۋشىنىڭ دارمەنسىز كۇيىن پايدالانىپ زورلاۋ (قك-ءتىڭ 120-بابىنىڭ 1-ءبولىمى), سونداي-اق ابايسىزدا جابiرلەنۋشi ا-نىڭ ولىمىنە اكەپ سوققان ادامدار توبىنىڭ الدىن الا ءسوز بايلاسۋىمەن ادامدى ساتۋ فاكتىسى بويىنشا ايىپتاۋ ۇكىمى شىعارىلدى (قك-ءتىڭ 128-بابىنىڭ 2-ءبولىمى 4-تارماعى)», دەپ حابارلايدى ەلوردا سوتىنان.

سوتتا انىقتالعانداي, م جابىرلەنۋشى ا-عا گرۋزيادا 500 اقش دوللار جالاقى تولەيتىن جۇمىس ۇسىنىپ, اتالعان ەلگە بارۋىنا كومەكتەسكەن.

«ايىپتى م جابىرلەنۋشى ا-نىڭ ۇيقىلى-وياۋ كۇيىن جانە دارمەنسىزدىگىن پايدالانىپ ونى زورلاعان. ودان كەيىن م جابىرلەنۋشىنى جىنىستىق قاتىناسقا ماجبۇرلەۋ ارقىلى پايدا تابۋ ماقساتىندا گرۋزيا ازاماتى ب-عا تاپسىرعان. سودان سوڭ جابىرلەنۋشى ا زورلىق-زومبىلىقتان قۇتىلۋ ءۇشىن 9 قاباتتان سەكىرىپ, قايتىس بولدى», دەيدى ۆەدومستۆودان.

حابارلامادا ايتىلعانداي, پروكۋرور سوتتالۋشىعا زورلاۋ فاكتىسى بويىنشا (قك-ءتىڭ 120-بابىنىڭ 1-ءبولىمى) 5 جىلعا جانە ادامدى ساتۋ فاكتىسى بويىنشا (قك-ءتىڭ 128-بابىنىڭ 2-ءبولىمى 4-تارماعى) 11 جىل 3 اي مەرزىمگە باس بوستاندىعىنان ايىرۋ جازاسىن تاعايىنداۋدى سۇرادى.

وسىلايشا كىنالىنى جالپى مەرزىمى 15 جىلعا باس بوستاندىعىنان ايىرا وتىرىپ, جازاسىن ماكسيمالدى قاۋىپسىزدىكتەگى مەكەمەدە وتەۋ ۇسىنىلدى.