قورعانىس مينيسترلىگىندە مەملەكەتتىك قىزمەتتىڭ 93%-ى ەلەكتروندى فورماتقا كوشىرىلدى. بۇل تۋرالى قورعانىس ءمينيسترىنىڭ ورىنباسارى دارحان احمەديەۆ ورتالىق كوممۋنيكاتسيالار قىزمەتىنىڭ الاڭىندا ايتتى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
«قازىرگى ۋاقىتتا قورعانىس مينيسترلىگى تسيفرلىق ترانسفورماتسيالاۋ ستراتەگياسىن ازىرلەۋدە. جاڭا تەحنولوگيالار مەملەكەتتىك قىزمەت كورسەتۋ سالاسىن عانا ەمەس, اسكەري باسقارۋ مەن ۆەدومستۆوارالىق ۇيلەستىرۋ جۇيەسىن دە قامتىپ وتىر», دەلىنگەن حابارلامادا.
قورعانىس ءمينيسترىنىڭ ورىنباسارى دارحان احمەديەۆ تسيفرلاندىرۋ سالاسىنداعى بەس باسىمدىقتى اتادى. ولار: «IT-ينفراقۇرىلىم جانە تەحنولوگيالار», «پروتسەستەر مەن دەرەكتەر», «ادامدار مەن داعدىلار», «يننوۆاتسيالار» جانە «كيبەرقاۋىپسىزدىك».
بريفينگ بارىسىندا سپيكەر ازاماتتارعا اقپاراتتىق جۇيەلەردىڭ رەينجەنيرينگى مەن cloud تەحنولوگيالارعا كوشۋ مۇمكىندىكتەرىنە نازار اۋداردى. دەرەكتەردى ينتەگراتسيالاۋ ازاماتتاردىڭ ءارتۇرلى انىقتامالار الۋ ءۇشىن مەملەكەتتىك ورگاندارعا جۇگىنۋ قاجەتتىلىگىن بولدىرماۋعا مۇمكىندىك بەرەدى.
ودان وزگە بۇل اسكەرگە شاقىرۋدى كەيىنگە قالدىرۋ جانە ودان بوساتۋ قىزمەتىن الا الاتىن ستۋدەنتتەرگە دە قاتىستى. مۇمكىندىگى شەكتەۋلى بولعان جاعدايدا ازاماتتار بىردەن اسكەردەگى قىزمەتتەن بوساتىلادى. كوشى-قون جاعدايىندا اسكەري مىندەتتىلەر مەن اسكەرگە شاقىرىلۋشىلاردى اسكەري ەسەپكە قويۋ جانە ودان شىعارۋ قاجەتتىلىگى دە جويىلادى.
«ەلەكتروندىق ۇكىمەت» قىزمەتى ارقىلى تىركەۋ كۋالىگى دە رەسىمدەلەدى. بۇل مەملەكەتتىك قىزمەتتەردى كورسەتۋگە كوشۋ رەسۋرستارىن ايتارلىقتاي ۇنەمدەپ, جەمقورلىق جاساۋ تاۋەكەلدەرىن ازايتادى.
دارحان احمەديەۆتىڭ ايتۋىنشا, اسكەري باسقارۋ ورگاندارىندا تسيفرلىق قىزمەتكە وفيتسەرلەر تاعايىندالادى. ولار كونكۋرس بويىنشا ىرىكتەلىپ, ۆەدومستۆونىڭ بىرىڭعاي تسيفرلىق دامۋ ساياساتىنىڭ جولسەرىگى جانە باستاماشىسى بولماق.
سونىمەن قاتار ول تالدىقورعان قالاسىنىڭ اۆياتسيالىق بازاسىندا ىسكە اسىرىلاتىن جوبا جايلى دا ايتىپ بەردى. وندا جاقىندا وتاندىق وتىز IT-كومپانيانىڭ توپ-مەنەدجەرلەرى بولىپ قايتتى. قىزمەت جانە كوممۋنيكاتسيا پروتسەستەرىن اۆتوماتتاندىرۋ مۇمكىندىكتەرىن زەرتتەگەننەن كەيىن تسيفرلىق يندۋستريا ليدەرلەرى 14 باعىتتا شەشىمدەر ەنگىزۋدى ۇسىندى.
جالپى قورعانىس ءمينيسترىنىڭ ورىنباسارى دارحان احمەديەۆ تسيفرلىق ترانسفورماتسيالاۋ ستراتەگياسىن ىسكە اسىرۋ قازاقستان اسكەرىنىڭ جاۋىنگەرلىك ازىرلىگى مەن جاۋىنگەرلىك قابىلەتىن ارتتىرۋعا ىقپال ەتەتىنىن اتاپ ءوتتى.