امەريكانىڭ كەنتۋككي شتاتىندا ءىرى سۋ تاسقىنى بولدى. تابيعي اپاتتىڭ سالدارىنان 30 ادام قايتىس بولىپ, جۇزدەگەن ادام ءىز-ءتۇزسىز جوعالدى, دەپ حابارلايدى Egemen.kz ۆۆس اگەنتتىگىنە سىلتەمە جاساپ.
نوسەرلى جاۋىننان پايدا بولعان تاسقىندار وتكەن اپتانىڭ ورتاسىندا باستالدى. كەنتۋككيدىڭ جەكەلەگەن اۋداندارىندا ءبىر تاۋلىكتە 20 سانتيمەتردەن استام جاۋىن ءتۇستى. ال ۋايتسبۋرگ قالاسىنداعى كەنتۋككي وزەنىنىڭ دەڭگەيى بىرنەشە ساعاتتا 6 مەترگە كوتەرىلدى. اپات سالدارىنان 12 مىڭنان استام ءۇي شارۋاشىلىعى جارىقسىز قالدى, جۇزدەگەن ءۇي مەن كاسىپورىن سۋ استىندا قالدى.
ۇلتتىق مەتەورولوگيا قىزمەتىنىڭ اۋا رايىن بولجاۋ ورتالىعى كەنتۋككيدىڭ شىعىس جانە ورتالىق بولىگىندە سۋ تاسقىنى قاۋپى ءالى دە ساقتالىپ وتىرعانىن ەسكەرتتى.
شتات بيلىگى مەن قۇتقارۋشىلار قازا بولعاندار سانى ارتاتىنىن بولجاپ وتىر. جوعالعان ادامداردى ىزدەستىرۋ جۇمىستارى بىرنەشە اپتاعا سوزىلۋى مۇمكىن.
«بۇل تاريحتا بولماعان ەڭ دۇلەي ءارى ادام شىعىنى كوپ بولعان سۋ تاسقىنى. قۇتقارۋ جۇمىستارى ءجۇرىپ جاتىر», دەدى شتات گۋبەرناتورى ەندي بەشير.