مينيسترلىك پياز باعاسىنىڭ قىمباتتاۋ سەبەبىن ءتۇسىندىردى

«پيازدىڭ جوعارى شىعىمدىلىعىنا قاراماستان, ونىڭ ىشكى نارىقتاعى قۇنى وتە جوعارى. جىل باسىنان بەرى پيازدىڭ باعاسى 109%-عا ءوستى (ەكى ەسەدەن استام), بۇل سوڭعى ءتورت جىلداعى ەڭ جوعارى ءوسىم. سونىمەن قاتار, ونىڭ اپتا سايىن ورتاشا ەسەپپەن 2-3%-عا ءوسۋى بايقالادى», دەدى مينيسترلىكتىڭ رەسمي وكىلى الىشەر ومىرزاق.

ۆەدومستۆونىڭ مالىمەتىنشە, قازىر رەسپۋبليكا بويىنشا پيازدىڭ ورتاشا باعاسى 191 تەڭگەنى قۇرايدى, بۇل رەتتە الماتى وبلىسىندا ەڭ جوعارى باعا 308 تەڭگە مولشەرىندە تىركەلدى.

«قازاقستاندىق ىشكى نارىقتاعى پيازدىڭ جوعارى قۇنى كورشى نارىقتاعى سۇرانىستىڭ وسۋىمەن جانە وعان جوعارى ەكسپورتتىق باعالاردىڭ بەلگىلەنۋىمەن بايلانىستى, بۇل پيازدى قازاقستان رەسپۋبليكاسىنان تىس جەرلەرگە اكەتۋ كولەمىن ارتتىردى», دەپ قوستى الىشەر ومىرزاق.

ونىڭ ايتۋىنشا, 20 شىلدەدە الەۋمەتتىك ماڭىزى بار ازىق-ت ۇلىك تاۋارلارىنىڭ باعالارى ماسەلەلەرى جونىندەگى كەڭەستە پيازعا باعا بەلگىلەۋ ماسەلەسى قارالدى.

«اۋىل شارۋاشىلىعى مينيسترلىگىنە ىشكى باعانى قالىپتاستىرۋ ماقساتىندا ىشكى نارىقتىڭ وسى ونىممەن قامتاماسىز ەتىلۋىنە تالداۋ جۇرگىزۋ, وڭىرلەرگە پياز جەتكىزۋ جانە كەلىسىمشارت جاساۋدى ۇيىمداستىرۋ, سونداي-اق سىرتقى ساۋدا قىزمەتى ماسەلەلەرى جونىندەگى ۆەدومستۆوارالىق كوميسسياعا پياز اكەتۋگە تىيىم سالۋ نەمەسە شەكتەۋ ەنگىزۋدىڭ ورىندىلىعى تۋرالى ماسەلە شىعارۋ تاپسىرىلدى», دەدى مينيسترلىك وكىلى.

بۇل رەتتە, تاۋاردى باقىلاۋسىز اكەتۋ فاكتىلەرىن بولدىرماۋ ماقساتىندا فيتوسانيتاريالىق رۇقسات بەرۋدى توقتاتا تۇرۋ تۋرالى شەشىم ۆاك وتىرىسىندا وسى ماسەلە قارالعانعا دەيىن قابىلداندى.

«22 شىلدەدە ۆاك وتىرىسىندا جانە ءامات ماسەلەلەرى جونىندەگى كەڭەستە اعىمداعى كەزەڭدە پياز اكەتۋگە تىيىم سالۋدى ەنگىزۋدىڭ ورىنسىزدىعى تۋرالى ۇستانىم ايتىلدى, ويتكەنى جۇرگىزىلگەن تالداۋ قازاقستاننىڭ ىشكى نارىعىندا پياز تاپشىلىعىنىڭ پايدا بولۋ قاۋپى جوق ەكەنىن كورسەتتى جانە بۇگىنگى كۇنى وڭىرلەردىڭ پيازبەن قامتاماسىز ەتىلۋى 34 مىڭ توننانى قۇرايدى, بۇل ايلىق تۇتىنۋدىڭ 132%-ىن قۇرايدى. وسىعان بايلانىستى فيتوسانيتاريالىق رۇقساتتاردى بەرۋ قايتا جاڭعىرتىلۋى ءتيىس», دەدى الىشەر ومىرزاق.

بۇدان باسقا, 22 شىلدەدە ۆاك وتىرىسىنان كەيىن وڭىرلەرمەن سەلەكتورلىق كەڭەس بارىسىندا اشم-گە كۆوتالاۋ كەزىندە فيتوسانيتاريالىق رۇقساتتار مەن ليتسەنزيالاۋ ارقىلى ءادىل باعالار بويىنشا ىشكى نارىقتى قامتاماسىز ەتۋ تەتىكتەرىن ازىرلەۋ, سونداي-اق ۇلتتىق قاۋىپسىزدىك كوميتەتىنىڭ شەكارا قىزمەتىمەن (كەلىسىم بويىنشا) بىرلەسىپ, پيازدى فيتوسانيتاريالىق رۇقساتتارسىز اكەتۋگە تىيىم سالۋ جونىندەگى زاڭناما تالاپتارىنىڭ ورىندالۋىن قامتاماسىز ەتۋ تاپسىرىلدى.

«اشم-گە 15 قىركۇيەككە دەيىن ءامات ساناتىنا جاتاتىن كوكونىس ونىمدەرىنىڭ ىشكى نارىعىن قامتاماسىز ەتۋ تاۋەكەلدەرىنە تالداۋ جۇرگىزۋ تاپسىرىلدى. بۇگىندە پياز ەكسپورتىنا تىيىم جوق», دەپ تۇيىندەدى مينيسترلىك وكىلى.بۇعان دەيىن ساۋدا مينيسترلىگى قازاقستاننىڭ كەيبىر ايماقتارىندا پيازدىڭ باعاسى 360 تەڭگەگە دەيىن كوتەرىلگەنىن حابارلادى. وسىعان بايلانىستى ۆاك وتىرىسىندا اۋىل شارۋاشىلىعى مينيسترلىگىنە ساۋدا كوميتەتىمەن جانە وبلىس اكىمدىكتەرىمەن بىرلەسىپ باعانىڭ ءوسۋ سەبەپتەرىن انىقتاۋ تاپسىرىلعان ەدى.