قيىر-قيىر باعىتتارعا اسىققان شيىر-شيىر جول كوپ. جول قانشا كوپ بولسا دا, جول ۇستىندە ءبىر-بىرىمەن جارىسا العا ۇمتىلىپ, شارتاراپقا جوڭكىلگەن كولىكتەر لەگى تولاس تاپپايدى. جول بويىندا وقىس وقيعالار كوبەيىپ بارادى.
ءتۇرلى اپاتتىڭ سەبەبى تەحنيكالىق اقاۋ, كولىك تەتىكتەرىنىڭ ءجۇرىپ كەلە جاتقاندا ىستەن شىعۋى, جول ساپاسى عانا ەمەس, وكىنىشكە قاراي, ادامي فاكتوردىڭ اسەرى دە ەرەكشە باسىمدىققا يە. ىشىمدىك ءىشىپ كولىك جۇرگىزەتىندەر مەن بەيقامدىققا بەرىلۋ, ياعني ساقتىق شارالارىن ۇمىتىپ جولدا ۇيىقتاپ كەتۋ, ءوزارا جارىسۋ نەمەسە كەيبىر تاكسي جۇرگىزۋشىلەرى اراسىنداعى ءوزارا باسەكەلەستىك جاعدايلارى جولداعى قايعىلى وقيعالارعا نەگىز بولىپ تۇر.
جۋىردا ماڭعىستاۋ وبلىسىندا جول بويىندا ەكى جۇرگىزۋشى تۇسىنىسپەي قالىپ, ءبىر-بىرىنە قول جۇمساۋعا دەيىن بارعان. ەرەگىس ناتيجەسىندە العان سوققىلار سالدارىنان 67 جاستاعى قارت جۇرگىزۋشى قايتىس بولىپ, ەكىنشى تاراپ, ياعني جاس جۇرگىزۋشى جىگىت قۇقىق قورعاۋشىلاردىڭ قولىنا ءتۇستى. وسىلايشا, ەكى ادامنىڭ تاعدىرى تالقان بولدى, ارتىندا قايعىدان زار ەڭىرەپ وتباسىلارى قالدى.
جول-كولىك وقيعالارىنا سەبەپشى بولاتىن ادامي فاكتوردىڭ ءبىرى – مىنەز-ق ۇلىقتان تۋىندايتىن كەلەڭسىز قىلىقتار. كەيبىر تاكسيستەردىڭ جولاۋشىعا تالاسىپ, جولىنداعىنى باسىپ وزىپ, ۋاقىتپەن جارىسا جۇيىتكىتە جونەلۋىنىڭ سوڭى تالاي قايعىلى جاعدايمەن اياقتالدى. بىراق ول قاسىرەتتەن ساباق الىپ, ساباعا ءتۇسىپ جاتقاندار شامالى. مۇنى جولعا شىققان جان وڭاي اڭعارادى. باسىپ وزۋ ءۇشىن تار جەردە قارسى جولاققا شىعۋ, ارنايى بەلگىلەرمەن تىيىم سالىنعان تۇستاردى كوزگە ىلمەۋ, جول بويىندا قالعىپ كەتۋ جاعدايلارى ءجيى كەزدەسىپ ءجۇر. ءوزارا باسەكەلەستىك, قۇستاي ۇشىپ جارىسۋ, جولاۋشىعا تالاسۋ – بەلسەندىلىك, جاۋاپكەرشىلىك ەمەس, تەك قۇنىعۋ عانا. ءاربىر جۇرگىزۋشى ءوز موينىندا كولىگىندەگى نەمەسە جول ۇستىندەگى بۇكىل جولاۋشىنىڭ تاعدىرى, جاۋاپكەرشىلىگى, وبال-ساۋابى بارىن سەزىنبەيتىندەي. ءبىرىن-ءبىرى جارتى جولدا قالدىرسام, بۇرىن جەتىپ جولاۋشىنى الدىمەن قارماعىما ىلسەم دەگەن ولەرمەندىك جۇرگىزۋشىلەر اراسىندا تەكەتىرەس, ەرەگىسكە ۇلاسىپ, ۇرىس-كەرىس, بوقتاپ-بالاعاتتاۋ, جۇدىرىق الا جۇگىرۋ سىندى ورەسكەل ارەكەتتەرگە ۇلاسادى. بۇعان ماڭعىستاۋ وبلىسىندا ەكى جۇرگىزۋشى اراسىندا ورىن بولعان دالەل.
جول بويىندا مىنەز كورسەتىپ, مىقتىلىقتى دالەلدەيتىن ورىن ەمەس, ول بارىنشا قاۋىپتى كەڭىستىك, جول ۇستىندە قانداي جاعدايدا دا سابىر مەن ۇستامدىلىققا باسىمدىق بەرىپ, بايسالدىلىق پەن اقىلعا جەڭدىرىپ وتىرۋ قاجەت-اق. بىراق بۇل – وتە قيىن نارسە, ءوزىنىڭ ەرىك-جىگەرىن باعىندىرا ءبىلۋ كەز كەلگەننىڭ قولىنان كەلە بەرمەيتىن قاسيەت. ال «جول ۇستىندە جىندى» بولىپ ءجۇرۋ – وڭاي, ول جەڭىلتەك مىنەز يەلەرىنە ءتان.
جول ۇستىنە, ءاربىر تاسىمال ماسەلەسىنە تەك تابىس دەپ ەمەس, تاعدىرشەشتى ساپار دەپ قاراۋ كەرەك. جول بويىندا ءتارتىپ ساقتاۋدى جۇرگىزۋشىلەر قاشان باستى جاۋاپكەرشىلىك ەتىپ ۇستانار ەكەن؟!
ماڭعىستاۋ وبلىسى