شىمكەنت قپد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى «قاراسورا-2022» جەدەل-پروفيلاكتيكالىق ءىس-شاراسى بارىسىندا ءىرى كولەمدە ەسىرتكى زاتتارىن ساقتاپ, ونى وتكىزۋمەن اينالىسقان ءۇش ازاماتتى ۇستادى, دەپ حابارلايدى Egemen.kz.
ونىڭ ەكەۋىنەن 2 پوليەتيلەندى پاكەتتە بولعان ەسىرتكى زاتتارى تابىلسا, ولارمەن ءسىبايلاس بىر ازاماتتان قاپقا سالىنعان ەسىرتكى زاتى تابىلعان.
«ساراپتاما قورىتىندىسىنا سايكەس, تاركىلەنگەن زاتتار كەپتىرىلگەن ماريحۋانا ەكەندىگى انىقتالىپ, جالپى سالماعى – 7 كەلى 188 گر قۇرادى. اتاپ ءوتۋ قاجەت, قۇرىقتالعان قىلمىستىق توپتىڭ مۇشەلەرىنىڭ بارلىعى بۇرىن قىلمىستىق جاۋاپكەرشىلىككە تارتىلىپ, سوتتى بولعان. بۇگىندە اتالعان ازاماتتارعا قاتىستى سوتقا دەيىنگى تەرگەپ-تەكسەرۋ جۇمىستارى جۇرگىزىلۋدە. كۇدىكتىلەر قاماۋعا الىندى», دەپ جازىلعان حابارلامادا.