قازاقستان رەسپۋبليكاسى ۇكىمەتىنىڭ قاۋلىسىمەن ءال-فارابي اتىنداعى قازاق ۇلتتىق ۋنيۆەرسيتەتىنە زەرتتەۋ ۋنيۆەرسيتەتى مارتەبەسى بەرىلدى, دەپ حابارلايدى Egemen.kz.
بۇگىندە ءال-فارابي اتىنداعى قازۇۋ – الەمدەگى ەڭ ۇزدىك 150 ۋنيۆەرسيتەت قاتارىنا ەنگەن قازاقستان مەن ورتالىق ازياداعى جالعىز جوعارى وقۋ ورنى.
ءبىر جىل ىشىندە ءبىلىم ورداسى QS WUR جاھاندىق رەيتينگى بويىنشا توپ-200 ىشىندە 25 پوزيتسياعا جوعارىلاپ, 175-تەن 150-ورىنعا كوتەرىلدى.
وسىلايشا ءال-فارابي اتىنداعى قازۇۋ قازاقستاننىڭ جوعارى وقۋ ورىندارى اراسىندا عانا ەمەس, ورتالىق ازيا مەن تمد ەلدەرى بويىنشا دا كوشباسشى ەكەنىن دالەلدەدى.
ايتا كەتسەك, ۋنيۆەرسيتەتتىڭ ءبىلىم بەرۋ باعدارلامالارىنىڭ شامامەن 25 پايىزى QS by Subject پاندىك رەيتينگىندە توپ-500 دەڭگەيىندە ۇسىنىلعان.
ۋنيۆەرسيتەت قۇرىلىمىندا 16 فاكۋلتەت پەن 68 كافەدرا, 8 عىلىمي-زەرتتەۋ ينستيتۋتى جانە 29 عىلىمي ورتالىق بار. 140-قا جۋىق عىلىمي جانە وقۋ-زەرتتەۋ زەرتحانالارى جۇمىس ىستەيدى.
قازىرگى ۋاقىتتا ءبىلىم الۋشىلاردىڭ كونتينگەنتى شامامەن 26 مىڭدى قۇرايدى. جىل سايىن شەتەلدىك ستۋدەنتتەر سانى ارتىپ كەلەدى – الەمنىڭ 30 ەلىنەن 2,5 مىڭنان استام شەتەلدىك باكالاۆرياتتا, ماگيستراتۋرادا جانە دوكتورانتۋرادا وقيدى.
وقىتۋشى-پروفەسسورلار قۇرامىنىڭ سانى 3000-نان اسادى. ۋنيۆەرسيتەت پروفەسسورلارىنىڭ اراسىندا 10 اكادەميك, 7 ۇلتتىق عىلىم اكادەمياسىنىڭ كوررەسپوندەنت-مۇشەسى, 14 عىلىم جانە تەحنيكا سالاسىنداعى مەملەكەتتىك سىيلىقتىڭ لاۋرەاتى بار.
ءبىلىم ورداسىن دامىتۋدىڭ نەگىزگى ۆەكتورى – ينتەرناتسيونالداندىرۋ. ۋنيۆەرسيتەت 500-دەن استام شەتەلدىك جوعارى وقۋ ورىندارى جانە عىلىمي ورتالىقتارمەن ىنتىماقتاستىق ورناتقان.
بيىل الەمنىڭ 30 ەلىنەن 100-دەن استام شەتەلدىك پروفەسسورلار مەن عالىمدار قازۇۋ-دا ساباق بەرەدى. سونداي-اق ءبىلىم ورداسىنىڭ 40-تان استام پروفەسسورى ۆەنگريا, گەرمانيا, موڭعوليا, فرانتسيا, اقش, رەسەي, تۇركيا, وزبەكستان جانە باسقا شەتەلدەردىڭ ۋنيۆەرسيتەتتەرىندە ءدارىس وقىدى.
2022 جىلى ۋنيۆەرسيتەتتىڭ 41 وقىتۋشىسى مەن قىزمەتكەرى قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ءبىلىم بەرۋ ستيپەندياسىنىڭ يەگەرلەرى اتاندى. قازىرگى ۋاقىتتا ولاردىڭ باسىم كوپشىلىگى اقش, ەۋروپا, سونداي-اق جاپونيا جانە تۇركيا ۋنيۆەرسيتەتتەرىندە تاعىلىمدامادان وتۋدە.
بيىلعى مامىر ايىندا قازاقستان پرەزيدەنتىنىڭ تۇركيا مەن قىرعىز رەسپۋبليكاسىنا مەملەكەتتىك ساپارى اياسىندا قازۇۋ-دىڭ ىستامبۇل جانە بىشكەك قالالارىندا فيليالدارى اشىلدى.
قازىرگى تاڭدا ۋنيۆەرسيتەت ەلدىك جانە حالىقارالىق ستراتەگيالىق مىندەتتەردى شەشۋدە ايتارلىقتاي الەۋەتكە يە. ءال-فارابي اتىنداعى قازۇۋ-دىڭ الداعى دامۋ باعىتى – الەمدىك دەڭگەيدەگى زەرتتەۋ ۋنيۆەرسيتەتىنە اينالۋ جانە حالىقارالىق عىلىمي-ءبىلىم بەرۋ كەڭىستىگىندە العا جىلجۋ.