قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردىنىڭ گرۋزيا سىرتقى ىستەر ءمينيسترى يليا دارچياشۆيليمەن كەزدەسۋى ءوتتى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
كەزدەسۋ بارىسىندا ەكى ەلدىڭ سىرتقى ساياسي ۆەدومستۆولارىنىڭ باسشىلارى ديپلوماتيالىق قاتىناستاردىڭ ورناعانىنا 30 جىل تولۋىنا وراي قۇتتىقتاۋلارمەن الماسىپ, ولاردىڭ دوستىق پەن ءوزارا قۇرمەت رۋحىندا قارىشتى دامىپ كەلە جاتقانىن اتاپ ءوتتى.
مينيسترلەر قازاقستان-گرۋزيا ىنتىماقتاستىعىنىڭ نەگىزگى باعىتتارى مەن پەرسپەكتيۆالارىن تالقىلادى. سونداي-اق حالىقارالىق كۇن تارتىبىندەگى وزەكتى ماسەلەلەر دە قارالدى. وسى تۇرعىدا مينيسترلەر ەكى ەلدىڭ حالىقارالىق ۇيىمدار, سونىڭ ىشىندە بۇۇ جانە ەقىۇ اياسىنداعى ءوزارا ءىس-قيمىل دەڭگەيىن جوعارى باعالادى. تاراپتار ساۋدا قاتىناستاردا ەلەۋلى الەۋەتتىڭ بار ەكەنىن راستادى جانە تاۋار اينالىمى كولەمىنىڭ وسۋىنە جانە نومەنكلاتۋراسىن ءارتاراپتاندىرۋىنا سەرپىن بەرۋ ءۇشىن ناقتى شارالار قابىلداۋعا كەلىستى. 2022 جىلدىڭ ءبىرىنشى جارتىcىنىڭ قورىتىندىسى بويىنشا 150 ملن اقش دوللارىنا جەتكەن ءوزارا ساۋدانىڭ بەس ەسە ءوسۋى - بۇل ودان ءارى بىرلەسكەن جۇمىس جولىنداعى ماڭىزدى مارەنىڭ ءبىرى.
سونىمەن قاتار كولىك جانە كوممۋنيكاتسيا سالاسىنداعى ىنتىماقتاستىقتى دامىتۋعا ەرەكشە نازار اۋدارىلدى. سۇحباتتاستار وڭتۇستىك كاۆكازداعى باستى قازاقستاندىق اكتيۆتەر – باتۋمي مۇناي تەرمينالى مەن پورتتى پايدالانا وتىرىپ, حالىقارالىق ترانسكاسپي كولىك باعىتىن دامىتۋ ماسەلەلەرىن تالقىلادى.
مادەني-گۋمانيتارلىق بايلانىستاردى جانداندىرۋدىڭ زور ماڭىزى اتاپ ءوتىلدى.