مەديتسينالىق قالدىقتارعا قويىلاتىن سانيتاريالىق-ەپيدەميولوگيالىق تالاپتاردى بۇزعانى ءۇشىن الماتى جانە جەتىسۋ وبلىستارىنىڭ دەنساۋلىق ساقتاۋ وبەكتىلەرىنە 14 ملن تەڭگەگە ايىپپۇل سالىندى, دەپ حابارلايدى Egemen.kz.
«الماتى وبلىسىنىڭ سانيتاريالىق قىزمەتى دەنساۋلىق ساقتاۋ وبەكتىلەرىندە قالدىقتاردى جيناۋعا, زالالسىزداندىرۋعا جانە ساقتاۋعا قويىلاتىن سانيتاريالىق-ەپيدەميولوگيالىق تالاپتاردىڭ بۇزىلۋىنا بايلانىستى جالپى سوماسى 14 ملن تەڭگەگە 74 ايىپپۇل سالدى. ونىڭ ىشىندە مەديتسينالىق قالدىقتاردى جيناۋ, ساقتاۋ جانە ەسەپكە الۋ مەرزىمدەرى بويىنشا زاڭ بۇزعان جەكە تۇلعالارعا 69 ايىپپۇل, لاۋازىمدى تۇلعالارعا 3 ايىپپۇل جانە مەديتسينالىق قالدىقتاردى ۋاقىتشا ساقتاۋ ءۇي-جايىن جاراقتاندىرۋ جانە جابدىقتاۋ جونىندەگى نورمالاردى ساقتاماعانى ءۇشىن زاڭدى تۇلعالارعا 2 ايىپپۇل سالىندى», دەلىنگەن الماتى وبلىستىق سانيتاريالىق-ەپيدەميولوگيالىق باقىلاۋ دەپارتامەنتى ءباسپاسوز قىزمەتىنىڭ حابارلاماسىندا.
بۇگىنگى تاڭدا دەپارتامەنتىنىڭ باقىلاۋىندا 1793 مەديتسينالىق ۇيىم بار.
مەديتسينالىق ۇيىمداردىڭ ءاربىر قۇرىلىمدىق بولىمشەسىندە مەديتسينالىق قالدىقتارمەن جۇمىس ىستەۋ سحەماسى ازىرلەنىپ, مەديتسينالىق قالدىقتاردى جيناۋ جانە ۋاقىتشا ساقتاۋ ءۇشىن جاۋاپتى تۇلعالار بەكىتىلگەن.
مەديتسينالىق قالدىقتار ارنايى ءبىر رەت قولدانىلاتىن پوليەتيلەن پاكەتتەرگە جانە قاقپاعى تىعىز جابىلاتىن ىدىستارعا جينالادى. ولار مەديتسينالىق قالدىقتاردىڭ كلاسىنا بايلانىستى بەلگىلەنەدى.
بەكىتىلگەن كەستەگە سايكەس مامانداندىرىلعان ۇيىمدارمەن جاسالعان كەلىسىمشارت نەگىزىندە شىعارىلىپ, جويىلادى.
بۇل مەكەمەلەردە قالدىقتاردى دۇرىس جويۋعا ارنالعان پەشتەر مەن جابدىقتار بار.
دەپارتامەنتتىڭ اۋماقتىق باسقارمالارىنىڭ باقىلاۋىندا مەديتسينالىق قالدىقتاردى جويۋمەن اينالىساتىن 14 ۇيىم بار.
ونىڭ بىرەۋى وڭدەۋ قۋاتى ساعاتىنا 120 كيلوگرامنان استام بولعاندىقتان ەپيدەميالىق ماڭىزى جوعارى, قالعان 13-ءى ەپيدەميالىق ماڭىزى بولماشى وبەكتىلەر سانالادى.
جىل باسىنان بەرى مەديتسينالىق قالدىقتاردىڭ «ا» سىنىبىنىڭ قالدىقتارى – 5721, 906 توننا, «ب» سىنىبىنداعى ەپيدەميولوگيالىق قاۋىپتى قالدىقتار – 18620,075 توننا, «ۆ» سىنىبىنىڭ ەپيدەميولوگيالىق اسا قاۋىپتى قالدىقتار – 3360,991 توننا, «گ» سىنىبىنداعى توكسيكولوگيالىق مەديتسينالىق قالدىقتاردان – 3616 دانا شىعارىلدى.
ولار - باكتەريتسيدتىك, ليۋمينەستسەنتتى, قۇرامىندا سىناپ بار, جارىق ديودتى شامدار, تەرمومەترلەر, گيگرومەترلەر جانە رەنتگەن پلەنكالارى.