توبىل-تورعاي وڭىرىندە كوروناۆيرۋس ىندەتىنىڭ ءوسىمى بايقالادى. بۇعان قوسا, رۋدنىي قالاسىندا ميدىڭ قابىنۋىنا اكەلىپ سوعاتىن قاۋىپتى مەنينگيت تىركەلدى.
وبلىستا ىندەت جۇقتىرعاندار وسى اپتانىڭ باسىندا عانا ونعا جەتپەي تۇر ەدى, اينالدىرعان ەكى-ءۇش كۇننىڭ ىشىندە ناۋقاستار سانى جيىرمانىڭ ۇستىنە شىعىپ كەتتى. وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى انجەلا بەكسۇلتانوۆانىڭ ايتۋىنشا, قوستانايداعى ينفەكتسيالىق ورتالىق قايتا اشىلدى. قازىر ەمدەۋ مەكەمەسىندە ون شاقتى ادام جاتىر. مۇنىڭ سىرتىندا, اۋىر ناۋقاستار جاتاتىن تاعى 125 توسەك دايىن تۇر.
جۇرتشىلىقتى سوڭعى اپتا ىشىندە ىندەتتىڭ تارالۋ قارقىنىنىڭ ءۇش ەسە ءوسىپ كەتكەنى, وعان قوسا ەل ىشىندە ءسىرلى مەنينگيتتىڭ ەتەك الا باستاعانى الاڭداتىپ وتىر. ماسەلەن, ماۋسىم, شىلدە ايلارىندا وڭىردە بۇل ەنتەروۆيرۋستىق ينفەكتسيانىڭ اۋىر تۇرىمەن 41 ادام اۋىرىپ شىعىپتى. ناۋقاستاردىڭ 80 پايىزى – 14 جاسقا دەيىنگى جاس بالالار. دارىگەرلەردىڭ سوزىنە قاراعاندا, قاۋىپتى ۆيرۋس, اسىرەسە جازدىڭ اپتاپ ىستىعىندا ورشەلەنە تارايدى.
– ءبىز سۋ قۇبىرلارىنان, اۆتوماتتاردان, سۋبۇرقاقتار مەن وزەندەردەن سۋ الىپ, تالداۋ جۇرگىزدىك. ءبارى تازا. ەشقانداي ينفەكتسيا قوزدىرعىشىن تابا المادىق, – دەيدى وبلىستىق سانيتارلىق-ەپيدەميالىق باقىلاۋ دەپارتامەنتىنىڭ جۇقپالى جانە پارازيتتىك اۋرۋلاردى ەپيدەميالىق باقىلاۋ ءبولىمىنىڭ باسشىسى گ ۇلىم دوسىموۆا.
قوستاناي وبلىسى