ەنەرگەتيكا مينيسترلىگىنىڭ كوميسسياسى جۇمىسىن اياقتاپ, پەتروپاۆلداعى 2-جىلۋ-ەلەكتر ورتالىعى مۇرجاسىنىڭ نەدەن قۇلاعانىن انىقتادى, دەپ حابارلايدى Egemen.kz.
قر ەنەرگەتيكا مينيسترلىگى ءباسپاسوز قىزمەتىنىڭ مالىمەتىنشە, كوميسسيا پەتروپاۆلداعى جىلۋ-ەلەكتر ورتالىعى ءتۇتىن مۇرجاسىنىڭ قۇلاۋ سەبەپتەرىن تولىق انىقتاۋ ماقساتىندا قۇرىلىپ, قازاندىقتاردىڭ جۇمىس تارتىبىنە, ودان شىعاتىن گازداردىڭ پارامەترلەرىنە, ءتۇتىن مۇرجاسىن پايدالانۋ رەجيمىنە, مۇرجاداعى ءتۇتىن گازدارىنىڭ ولشەمدەرىنە ەنەرگەتيكالىق ساراپتاما تاعايىندالعان ەدى. سونداي-اق №1 ءتۇتىن مۇرجاسىنا دا تەحنيكالىق قۇرىلىس ساراپتاماسى جۇرگىزىلدى.
ناتيجەسىندە كوميسسيا مۇرجانىڭ قۇلاۋىنىڭ بىرنەشە سەبەبىن اتادى:
- ءتۇتىن مۇرجاسىن سالۋدىڭ جوبالاۋ جانە بەتونداۋ كەزەڭىندە اقاۋلار جىبەرىلگەن;
- ءتۇتىن مۇرجاسى تيىسىنشە پايدالانىلماعان, ياعني جوسپارلى-الدىن الا جوندەۋ جۇمىستارى, كەزەكتى تەكسەرۋلەر مەرزىمىندە جۇرگىزىلمەگەن;
- قازاندىقتاردان تىس شىعاتىن گازداردىڭ تەمپەراتۋراسى بولىگىندە قازاندىقتاردىڭ جۇمىس رەجيمدەرىن ساقتاماۋ;
- قازاندىقتاردىڭ جوعارى اپاتتىلىعى جانە قازاندىقتاردىڭ اۆاريالىق توقتاتىلۋىنان كەيىن مازۋتتى پايدالانا وتىرىپ, كوندەنساتتىڭ تۇزىلۋىنە جانە تومەن تەمپەراتۋرالى كورروزياعا قاتىستى گاز جولى مەن ءتۇتىن مۇرجاسىنىڭ جۇمىس جاعدايلارىنىڭ ناشارلاۋىنا اكەپ سوققان ءجيى ىسكە قوسىلۋى;
- پەتروپاۆل 2-جەو باسشىلىق قۇرامى مەن جاۋاپتى ماماندارى تاراپىنان ءتيىستى باقىلاۋدىڭ بولماۋى.
وسىلايشا, جوعارىدا اتالعان فاكتورلاردىڭ جيىنتىعى ءتۇتىن مۇرجاسىنىڭ قۇلاۋىنا سەبەپ بولدى.
كوميسسيا جۇمىسىنىڭ ناتيجەلەرى بويىنشا وسىنداي تەحنولوگيالىق بۇزۋشىلىقتارعا جول بەرمەۋ جونىندەگى نەگىزگى ۇيىمداستىرۋشىلىق جانە تەحنيكالىق ءىس-شارالار ازىرلەندى.
ال انىقتالعان زاڭ بۇزۋشىلىقتار مەن كەمشىلىكتەر دەرەكتەرى بويىنشا قازاقستان رەسپۋبليكاسىنىڭ زاڭناماسىنا ساي ءتيىستى شارالار قابىلدانادى.
ستانتسيا جابدىقتارىنىڭ ىستەن شىعىپ, بىرنەشە رەت توقتاۋىنا سەبەپ بولعان 2021-2022 جىلدارداعى كۇزگى-قىسقى كەزەڭىندەگى جوندەۋ ناۋقانى بارىسىندا جىبەرىلگەن كەمشىلىكتەر ءۇشىن ديرەكتورلار كەڭەسىنىڭ شەشىمىمەن «سەۆكازەنەرگو» اق جاۋاپتى باسشىلارىن لاۋازىمىنان بوساتۋ جانە لاۋازىمىن تومەندەتۋ تۇرىندەگى تارتىپتىك شارالار قابىلداندى.
الداعى جىلىتۋ ماۋسىمىنا ساپالى دايىندالۋ جانە سەنىمدى وتكىزۋ ماقساتىندا «سەۆكازەنەرگو» اق پەتروپاۆل 2-جەو جۇمىسىن قالىپقا كەلتىرۋ بويىنشا جول كارتاسىن ىسكە اسىرىپ جاتىر. جول كارتاسىنىڭ ورىندالۋى قر ەنەرگەتيكا مينيسترلىگىنىڭ باقىلاۋىندا, اپتا سايىن كوشپەلى مونيتورينگ جۇرگىزىلەدى. وسىنداي كوشپەلى كەڭەس 17 شىلدەدە پەتروپاۆل 2-جەو-دا قر ەنەرگەتيكا مينيسترلىگى وكىلدەرىنىڭ قاتىسۋىمەن ءوتتى, وندا جول كارتاسىنىڭ ورىندالۋ بارىسى تەكسەرىلدى.
ەسكە سالا كەتەيىك, 20 ناۋرىزدا پەتروپاۆلداعى جىلۋ-ەلەكتر ورتالىعىنىڭ ءتۇتىن مۇرجاسى جارتىلاي وپىرىلىپ قۇلاعان ەدى. سالدارىنان جۇمىسشى ايەل مەرت بولدى.